Luc 1
1
Ebandôe ématenda Luc tsangône
1Luc amatenda mbe: Wee ami, Théophile, me nagôbeenda mbe avo oma amatenda tsangône éamane mamabuéa va gatse asô n’anyô. 2Amanigôa mane mamabeendu ahngô n’ane amadenganô v’ebandô. Te ane ameetsô ôtômu mbe: Nigôani mabégôme maNzambé éma. 3Me va yami kuka dôta nameevôa ane amadenganôni gôémenya gamabandôa ébégôe na gandéké éangô ngu na ndéô nedué. Namanyôngéô égôtendéa mane mookiô me, éwe Théophile kumaka épôni. 4Nagôtendéa nane te gôéwanyeda mane mookiô me na mane mameekédu éwe mapie.
Môsi g’ôba amavigédu na Nzambé ameevéda ôbôtu aJean-Baptiste
5Gô ndéône ématôma Hérode tsengene éaJudée, gômabaka môdeekedi adigondoku inedi Zacharie. Amabaka gô géômbé sadeekedi adigondoku amatômu n’Abia. Môgaya aZacharie te Elisabeth. Tétene éaElisabeth te Aaron, angô tétene éadeekedi muetso adigondoku. 6Zacharie na Elisabeth amagobeda Nzambé gô mabégô metso. Ahsikékôé ta n’ebégô évo ématsikéô ahngô gô mitômamie na gô mige miaKumu Nzambé. 7Ivô ahngô asibaké na muana gôébégô Elisabeth amabaka te gékômba. Na muetso abaé amabaka te aka ébôôtô.
8Nyovo Zacharie amabaka gô eba aNzambé gô éyanzee éedi éedeekeda digondoku. Te ndéône yedi éeyanza na géômbé sedi. 9Adeekedi adigondoku amatséva na nzéké gôésevoa môvo va gatse aô gôétumba môyombo ambônga amôsôba va mbene aNzambé gô tsongo éadisambô édigaa amuene Nzambé. 10Oma muetso amabaka mitie gô môkii gôévovo na Nzambé gô ndéône étumbu môyombo ambônga éamôsôba. 11Vamabaka Zacharie gô tsongo éadisambô, môsi g’ôba amavigédu na Nzambé vandé angô. Môsi g’ôba amatema gô géeyo gémôgôô sagétumbéô samôyombo. 12Vameena Zacharie angô, amakuadima na ônzenze. Gomo ômatsôpa angô. 13Môsi g’ôba amavovo mbe: Ewe Zacharie, ômbieena gomo. Nzambé amookô môdukée woo. Môgayoo Elisabeth angagôbôtéa muanamômôgôô. Omôôga te mbe Jean. 14Omuene ôngatsôkéa ôbôtue wedi na gényônga gévôni. N’avo oma ayekani angatsôkéa te mônongovo. 15Muanoo angaba môma môvôni va mbene aKumu Nzambé. Môsi g’ôba amamônigôa mbe: Muanee ône asanganyua maduku. Asanganyua ta na meba mavo meedangi. Angaba amayôa na Gédidi SaNzambé gô môtémedi bandôa g’ôbôtu edi. 16Angatévéda ana aIsraël ayekani nzéane na gôndé Nzambé, Kumune éaô. 17Amuene angaba va mbene aNzambé gédidi gévo na ngudi dipo na Elie, môpandôédine ambeego amatasa maNzambé. Angavambéda téteye na anaô. Angakoa ane akékôani aka agobedi amane manyôngéô Nzambé. Angeekéda oma gôéba kuanakue ganyôngéô Kumu Nzambé.
18Ivô Zacharie amatsuma ôgie ône paga mbe: Tubéda me éne éngamenyéda me mbe ôsapata. Osabômu mbe wa na môgayami muetso abaé tôka te ébôôtô. 19Vane môsi g’ôba amamôaabéa mbe: Me te Gabriel. Me te môyanzine aNzambé. Amatôma me mbe naviga gôébeenda éwe tsangône édué éamôsôba. 20Géé éwe, ôtsuma ôgie wedi paga. Buéyé mbe nane, ébégôe éngabuéa mônongovo gamanyôngéô Nzambé. Ivô éwe, ôngakoga ôka n’obôbô na ôsangadôbubua ngu na vangeenanô ébégôe éevédiô éwe.
21Gômadinga Zacharie gô eba aNzambé gô tsongo éadisambô, ane amamôenéakani amatsapéô. 22Vamakusa Zacharie gô eba asiôngôédô évovo. Vane oma amamenya mbe Zacharie eeni ébégô évôni gô gatse eba aNzambé gôbaki angô. Zacharie asibubuéké amahsombeda géombége.
23Vamamana Zacharie éyanzee émabaka n’edi amanika na gô ebedi. 24Vamoota ndéône môgayedi amatsua émé. Amabaka gô ebedi somo gô ngonde ditayi. Amatasa gô môtémedi mbe: 25Aanaka éne émanyôngéô Kumu Nzambé éénda gôndé me. Amanôtôa me tsoyine ébaki n’ami va mbene oma.
Môsi g’ôba amavigédu na Nzambé ameevéda ôbôtu aJésus
26Vamaba Elisabeth aka n’emé ngonde môtôba, Nzambé amavigéda môsi g’ôba, inedi Gabriel na gô mbôka étetu mbe Nazareth éndé gô Galilée. 27Môsi g’ôba, Gabriel amatsiga na gôndé tômbô asigésangané na mômôgôô. Inedi Marie. Marie amateteduku na mômôgôô atetu mbe Joseph mbe angamôbaa. Joseph te muanee aDavid, môtômine ambeego. 28Môsi g’ôba amatsiga na gôndé Marie na amavovo mbe: Nagôkômbôa, éwe ôétsiô mate na Nzambé. Kumu Nzambé andéké n’ewe. 29Gô mavovia mema, Marie amakuadima na amatasa gô môtémedi mbe: ?Kômbô nedué ékegea nayee? 30Môsi g’ôba amamônigôa mbe: Marie, ômbiatatéa ta na pedu. Mate maNzambé mandé gôndé éwe. 31Oeni, ôngatsua éme na ôngabôta muanamômôgôô. Ongamôôga te mbe Jésus. 32Angaba môma môvôni. Angatetu mbe Muana ANzambé, Tétedi Kumu angudi yetso. Kumu Nzambé angamôdigéda n’okumaka wetso gandé kumu étômani, gamabaka David tétene yedi éav’ebandô. 33Angatôma omedi asi éongo éaIsraël môbô na môbô. Otômue wedi ôsangaba n’ekôdéô.
34Marie ameevôa môsi g’ôba mbe: ?Ebégôe éne éngaba nayee? Gôébégô me madeo tsigésangana na mômôgôô.
35Môsi g’ôba amamôaabéa mbe: Gédidi SaNzambé géngaviga na gôndé éwe na ngudi yaNzambé dingapika éwe ga ôbôngé. T’ebandô muanee angabôtewe angatetu mbe, One amatômu na Nzambé, na dota Muana ANzambé. 36Menya mbe mônoo Elisabeth, ône aka gébôôtô na ameendô mbe gékômba, aka n’emé éangonde môtôba. 37Bangôa mbe gôndé Nzambé gôsaba ébégô ésangeendégégéani.
38Vane Marie amamôaabéa mbe: Me te môyanzi aKumu Nzambé. Te mbe ayanzé na me éne évovi éwe. Môsi g’ôba amakea.
Marie amakea gôéena Elisabeth
39Gô ndéô nene Marie amatimôga gô ebedi gôéyavôga ékea môtôô na gô môsenge ôdenganô gô mikôdi miagô Judée. 40Ameengéa na gô eba aZacharie na amakômbôa Elisabeth. 41Vamookô Elisabeth ôtimôgiee aMarie, amookô na muanee apupa gô ébuyi. Gédidi SaNzambé gémamôyuéséda môtémee. 42Elisabeth amavovo n’ogi agényônga mbe: Mate maNzambé mandéké n’ewe. Na mangô mootéa mane mageto muetso. Mate medi dôta mandéké gôndé muanee andé n’ewe gô ébuyi. 43Tambô me môma abobo, navigéô na yeene aKumu ami. 44Oeni, vakômbôyi éwe me n’atsatsee, muanee apupi na gényônga gô gatse ebuyi éami. 45Ti gô gényônga géndé n’ewe ôsitsuma paga mbe éne émakudéga Kumu Nzambé na gôndé éwe éngeenanô.
Embô ématôa Marie
46Vane Marie amatôa imbô mbe:
Matasa mami maneegeda Kumu ami épôni.
47Môtémami ôyôa na gényônga gôébégô éaNzambé Mooboyi ami.
48Angô amanyôngéô éasugéda amuene gôébono me, môyanzine wedi abobo.
Na gô pie oma muetso bandôa deo noo ngu na v’ekôdéô,
Angeenda me mbe: ône ameetsô mate na Nzambé.
49Ah Nzambé, Kumu angudi yetso, ameendéa me mabégô mavôni manyônganéôni.
Inedi ématsimamani éôtéa miname metso mava tsina.
50Angô gô ndéô yetso eena môma ngeba gôndé ane amôgobeda na éhdita.
51Amayanza mabégô mavôni n’ogogoe wedi.
Amanôtôga gô nzéane ane andé na mitéma miadienza.
52Amasendoa atômie andé digaa gô édigaa éokumaka.
Amabatéda môma abobo na gô tungune éokumaka.
53Ameetsa ôkiti ôvôni gôndé ane amookô nzaa.
Amapatsa ékiti amakeda angô te mogo matévo.
54Amawesea na gôndé omedi, asi Israël gôéwedéa ahngô.
Ahsibômu étubeda étondo éedi
55Gôndé Abraham n’anedi môbô na môbô.
Te éne émavangangô na peeye yasô yambeego.
56Marie amadigaa ngonde ditatô na Elisabeth, vane amanika na gô mbôkedi.
Obôtu aJean-Baptiste
57Ndéône émabôta Elisabeth muanedi amômôgôô émabuéa. 58Ane amabambana yeba na Elisabeth mbôkepo amookô. Kindedi na kinde amômiedi amookô na amatsôkéa n’edi ébégô évôni émayanza Kumu Nzambé gôétubéda angô étondoe éedi. 59Vamabaka muanee aka pitsi génana muetso amadenganô gôémôgeeta. Amanyôngéô émôga inee éatétedi Zacharie. 60Ivô Elisabeth amakékôa mbe: Kaka nane, inedi te Jean. 61Muetso amatsapéô mbe: inee éne madeo ésiôkanô gô mbumune yanyô.
62Gômabaka tétene Zacharie gébôbô, oma amavovo n’edi sombeda mbe: ?Onyôngéô inee amuanee woo éôgu indaa? 63Zacharie amaduka ahngô ôkadô na amatenda mbe: Inee amuanee te Jean. Muetso amasôbasôbana. 64Tsina na tsina ômeni aZacharie ômapunzuga na amabandôa évovo gamavovokô angô na mbeego. Amakuméda Nzambé na ôgie agô ngongo. 65Vane muetso amabambana yebaye n’ahngô amookô ahngô gomo. Tsangône émapaa tsengene nyetso éamikôdimie miaJudée. 66Muetso amookôni amatanganéda na ameevôana mbe: ?O mônongo amuana angaba nayee? Tambô te ngudi yaKumu Nzambé dindé pepe gôndé angô.
Embô ématôa Zacharie
67Gédidi SaNzambé gémeengéa na gôndé Zacharie, tétene amuanee avembo. Amapandôéda matasa maNzambé gô imbô mbe:
68Tôkumédékéni Kumu Nzambé, angô te Nzambé éongo éaIsraël.
Gôébégô andé gôébono omedi na andé gôéoboo ahngô.
69Amatsutsuéda gôndé we Mooboyi môvôni.
Mooboyi ône te Muana amôyanzi edi ambeego, môtômine David.
70Te éne émavovo angô va mbeego gô ngudi yapandôédi amatasa maNzambé.
71Amavanga mbe: Nanganôoboo gô mogo madudeoe wanyô.
Nanganôkuséda buéyé mbe nôndé gô tsina angudi yavingie wanyô.
72Te mbe ngeba yedi dimeenanô gôndé peeye yasô yava mbeego.
Te mbe abangôa éne émavanganangô n’asô.
73Gôébégô Nzambé amasongéa na Téta Abraham mbe: Nôngeena mabégô mema.
74Mabégôme te mbe tôkusédu gô tsina angudi yavingi asô n’anyô.
Te mbe tôngayanzéa Nzambé gébé na gomo amôma.
75Ameenda nane gômbe tôngaba oma amatsimamani aNzambé na gébé n’oési va mbene edi,
Pitsi yasô yetso yava tsina.
76N’ewe muanami, ôngatetu mbe môpandôédi amatasa maNzambé, ône aMôbô na Môbô ootéa muetso.
N’ewe ôngoobégéa gô mbene aKumu éoo gômôbea nzéane.
77Ongamenyeda oma amasevôa Nzambé mbe: Mooboyi avigi.
One angasingéa ébévee éanyô kokoo na angooboo anye.
78Gôébégô Nzambéné éasô n’anyô andé na ngeba na mavôma.
Ahngatanéda wa n’anyô gévede gévôni géviga g’ôba na gégono na kômbéne vatsiga yangô.
79Gévedege géne géngapatsa évitsi gôndé ane adigaa gô tsina éangô na gô tsina otômu owa.
Te gévedege sangô gétévéda makôdôme masô n’anyô gôékea gô nzéa éagétabé.
80Muanee ône amoongôga. Môtémedi ômoodedu. Amadigaa gô tsenge émagasani gébé n’oma ngu na ndéône ématsutsuga angô va mbene oma aIsraël.
ទើបបានជ្រើសរើសហើយ៖
Luc 1: TSV
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
Alliance Biblique du Gabon (Bible Society in Gabon) 1983
