Ephésiens 3
3
Eyanza éndé na Paul gôéyanzéa ane asaba Ajuif
1Me Paul nandé gô eba atsôgôô gô ina aJésus‐Christ, gômeekéda me mbe anye nôsaba Ajuif nôndé nômagésu eba ôvo n’Ajuif. Me nasambéda Nzambé. 2Nômani éôkô gameetsô me na Nzambé gésooge gôénôyanzéa. 3Nzambé amatsutsuéda me étasa émabaka n’edi ga éav’esooe ésinigôganéôkô na mbeego te gôéyanza nzéane éawa n’anyô oma. (Namani énôtendéa ébégô édué gô wene abi. 4Vatanganye éangô nôngookô ganigôgéô me éne ésimenyanganô éaJésus‐Christ.) 5Va mbeego ébégôe éne ésinigôganéô n’oma. Ivô gô ndéô nedué, Nzambé amatsigéda éangô gô ngudi yaGédidi sedi na gôndé ane amatômu na Christ, na dôta gôndé apandôédi amatasa medi. 6Nôeni étasa éaNzambé émabaka ga éav’esooe, te éangôéé. Gô ngudi yaTsangô Eamôsôba éaJésus‐Christ, ane asaba Ajuif amagésu n’Ajuif gôédiia mikuanya mimakôkéga Nzambé gôndé omedi, ane asaba Ajuif aka ôtô ôvo n’Ajuif. Ovanga ômavanga Nzambé gôndé ahngô muetso ôenanô gôndé Jésus‐Christ.
7Me Paul namakou, naka môtsuayi aTsangô Eamôsôba gô ngeba yaNzambé. Nameetsô n’edi gésooge géne gôéyanza gô ngudi yedi. 8Va gatse asi mbumu éaNzambé muetso gô omee abobo, môyusumédue te me. Buéyé mbe nane, Nzambé amasevoa me gôénigôa Tsangô Eamôsôba gôndé ane asaba Ajuif. Tsangône te éokiti agétangégé ôtôdiia gôndé Jésus‐Christ. 9Namasevou dôta gôémenyeda oma muetso éne éngayanza Nzambé gôédugéda étasa éedi gôékônza nzéa gôndé ane asaba Ajuif. Nzambé môkanine ayôma éetso éava tsina, amabaka n’etasa éne bandôa v’ebandô ivô oma asinigôgéô éangô. Emabaka ga émasuégu. 10?Emasuégu gôndé? Emasuégu ngu na ndéô nedué te mbe ane atôma gô étungu éag’ôba atubédu éodo évôni éndé na Nzambé gôgésa angô Ajuif n’ane asaba Ajuif mbumu épo. 11Agésa ahngô gamanyôngéô Nzambé v’ebandô na gamakônzangô gô ngudi yaKumu asô n’anyô Jésus‐Christ. 12Okô mbe tôndé évambevo na Christ, na ôkô mbe tômamôétsa mitémamie gémôtsumé paga, tôndé ti kuanakue gôéwesea na va mbene aNzambé gébé na mikebanganô. 13T’ebandô me Paul nanôbeenda mbe nômbianika gévii, tsangô mbe neena maguga gôndé anye. Magugame meena me te ôndômbee wanyô, tambô tsôkéakani.
Etondo éaChrist gôndé oma
14Vatasa me éne éyanzéa angô wa n’anyô, me nasiba mabongo mami va mbene atéta gôémôneegeda. 15Gôébégô asi mbumu éedi muetso andé gô tsina na g’ôba amoogu inedi apie. 16Ngudi yaNzambé dindé n’okumaka éedi. Namôduka mbe anôétsa ngudiye yedi dine gôésipa na mbe Gédidi sedi gééngéa gô mitéma mianyô. 17Naduka angô mbe Christ adige gô mitéma mianyô vandé anye gébé na paga gôndé angô. Naduka dôta Nzambé mbe anye nôngaba ga géétété gémasuenea mitambamie na gô tsina mbe n’anye nôngasuenea gôésipa gô étondo éaNzambé. Namôduka mbe 18anye n’asi mbumu éaNzambé muetso nôngamenya gandé étondo éaChrist étongoni na évoogani, na étibani éagébé n’okana. 19Anye mbe ti nômenya étondo éaNzambé, buéyé mbe gôsaba môma oongôa émenya ébandôe n’ekôdéôé éangô. Ivô nôngoongôa émenya éangô gôyuésédu mitéma mianyô n’amuene Nzambé.
20Ondômbee wetso ôbaké gôndé Nzambé. Gô ngudi yedi dipôni diyanza gô mitéma miasô n’anyô, angô eenda éne étônyôngéôni, na étôvakani na étôdukani. Na akôndéga na éene ésatômenya édukani. 21Te mbe asi mbumu éaNzambé akumédé angô gô ina aJésus‐Christ môbô na môbô. Amen.
ទើបបានជ្រើសរើសហើយ៖
Ephésiens 3: TSV
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
Alliance Biblique du Gabon (Bible Society in Gabon) 1983