II Corinthiens 4
4
Sôma gésasômbégéakani géviga gôndé Nzambé gékeneoko gô gévumbéô gébooni satoto
1Te amuene Nzambé asaba na ninga, ameetsa we eekédi éyanzee éndé n’asô. T’ebandô mitéma miasô misanika gévii. 2Tômakina ésima éatsoyi ééndaka oma v’esooe. We eekédi tôsapatéda éyanza gôédiia oma na tôsapenganéda Mane Mavovo Nzambé. Menyani mbe we eekédi tôsupua na vede mabégô metso mapie. Tôékéda mangô te mbe meengéa gô mitéma mioma. Tôvovo mangô va mbene aNzambé. 3Okô mbe Tsangô Eamôsôba éaJésus‐Christ éékéda we éndé g’okutu, ôkutue ôndé te gô mitéma miane akea gôébungana. 4Asangoongôa ésinga mangô gôébégô Môtômine môbévani atsinane édué amakukéga yôkiia yamitéma miaô n’okutue. Te Môtômine ône iméda ahngô misome mbe kabaga eena gévedege gétanédu na Tsangô Eamôsôba étôtubéda ôndômba ôndé na Jésus‐Christ. Na étônigôa mbe Jésus te gégoni saNzambé. 5We tôsanôékéda tsangô éawéene. Tônôékéda mbe Jésus te Kumu. Gôndé we tôndéké ayanzie anyô gô ina aJésus‐Christ. 6Nzambé va mbeego amavovo mbe: Nanyôngéô mbe gévede gétana va gatse evitsi. Na Nzambé nene te épo na éne étanéda gévede sedi gô mitéma miasô n’anyô. Gévedege sedi géne gétômenyeda nzéa éagévede. Na gô nzéa nene we tôena ôbébayi ôtubéda ôndômba aNzambé gô gédimo saJésus‐Christ.
7Tôndé gôékenea sôma gésasômbégéakani géviga gôndé Nzambé. Tambô we tôkenea sangô tôndé gévumbéô gébooni satoto tôgono na gépede sakiekie. Vane oma angeena mbe: adua te évumbéô étévo. Sômage, te ngudi n’ondômba, gémakuya amuene Nzambé gô évumbéôe éedi. 8Maguga makôndama gôndé we. Tôpikô na mangô ivô tôsanganigô na mangô. Tôsetu na mikebanganô ivô mitéma miasô misanganika gévii. 9Tôdudanô n’akasô ivô Nzambé asatsika we. Tôaagédu na gô tsina ivô tôsadinga étimôga. 10Pitsi yetso tôndé n’owee aJésus gô yôtô yasô na vane monyo aJésus ôenanô dôta gô yôtô yasô. 11Pitsi yetso tôvétsu n’owa gôébégô éaJésus gômbe ngudi yamonyoe wedi dienanô gô yôtô yasô didôngani yava tsina. 12Endé te nane. Owa ôbénga we tôékédani te mbe monyoe ôngabénga anye nôékéduni.
13Matendeo MaNzambé matônigôa mbe: Me nameetsa môtémee wetso gébé na buétsé gô mabégô mema, t’ebandô me navovo mangô. Na we dôta tôsamatsuma paga, tômeetsa mitémamie gô mabégô mema, t’ebandô tôvovo mangô. 14Tôsabômu mbe Nzambé te ône amakundua Kumu Jésus g’ôwa na te angô angatôkunduani dôta g’ôwa na Jésus. Angatôtsigéda n’anye muetso géômbé gévo va mbene edi. 15Eetso étôenani édué ébuéa te gôékasôgéda anye. Gô ngudi yaNzambé omedi angayeka. Vangayeka ahngô, tambô n’asambédie, n’akumédi aNzambé amani éyeka dôta.
Pitsi yetso mitéma miasô mindéké gô éne éseenanôni te eembe éenanô
16T’ebandô tôsagogo. Buéyé mbe yôtô yasô ditsogedu na dibandôa ésega, ivô édidie éasô ékôndégu ngudi na monyo, énya n’enya. 17Tômenya mbe maguga meena we madita, tambô mandé te na soa na masadingani. Na mangô matôkônzéa ôndômba ôvôni ôsakôdékani ôndé vavo na Nzambé. 18Maguga mandé mavôni, na géneegage géndé gévôni ivô évundee éagéneegage éôtéa éne éamaguga. Tôsaténdéda éne éapitsi yedi. Tôténdéda éne éagô mbene éseenanôni. Ene étôenani édinga gô pitsi yatangaga. Ivô éne ésatôenani éndé éamôgunanza gékôdéé.
ទើបបានជ្រើសរើសហើយ៖
II Corinthiens 4: TSV
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
Alliance Biblique du Gabon (Bible Society in Gabon) 1983