I Corinthiens 9
9
Manyanga mameetsô ayanzi aNzambé
1Ane atsuma paga gôndé me Paul, aanakani. ?Me Paul namaba g’ôvéga‐a? Tsibé. ?Me Paul tsisevou na tsitômu na Jésus‐Christ‐a? ?Me tsiene na miso mami Kumu asô n’anyô Jésus‐a? ?Anye kaka gémbégéa gétubéda éyanzee éami‐a? 2Buéyé mbe avo avovo mbe: Paul asisevou na asitômu na Jésus‐Christ, ti n’anye onôngavovo te ga ahngô‐a? Anye nôsabômu ône amatôma me. Ene étubéda na gô pie mbe me namatômu na Christ te anye, gômaweseda me anye gôévamba na Kumu asô n’anyô.
3Nôeni gaabéa me ane apatéa me. Me mbe: 4?Tambô tsaba na ngudi gôéaa na gôényua gô éne éyanzéa me anye‐a? 5?Tsaba na ngudi yebaa môgeto môvo môma aChrist akénga n’ami geenda akasô‐a? Akasô amasevouni na amatômukuni, na dôta aneya aKumu Jésus n’amuene Pierre eenda te nane. 6Akasô adiia gô meekédume ?ivô wa na Barnabas tôngayanza mene mayanza gôébôngôa yôtô yasô‐a? 7Tasani. ?Môgode akea gôégenya akenea te amuene‐a? ?Na môgaabi atsaga, asadônga gô éne égaabangô‐a? ?Môkenene ataba asadôngédu na tabaye dikenea angô‐a?
8Me tsavovo gô mane meenanô matsengene matévo. Oôkôni gawanya mangô na mane mamatsika Moïse mbeego. 9Amatenda mbe: Inzua éyunzani ésawatôkô nyama buedi mbe yangô épanga éaa.#9:9 Paul amagunya tsava éanyama étetu mbe boeuf. ?Tambô Nzambé akebangana gôndé inzua‐a? 10?Asakebangana gôndé wa n’anyô oma‐a? Menyani mbe ébégôe ématendu te gôndé wa n’anyô oma. Buedi mbe môyunzi na inzua ayanza muetso abaé na môkasa na asabômu mbe: Tsoongone éami te éne éyunza me. 11Tômani éyanza va gatse anyô gôéengéda anye gô mabégô maNzambé. Okô tônôduka mbe: Baka ôkabô amane madiianye gôétôbôngôa yôtôye ?tambô tôndé na génôngô‐a? 12Namookô mbe akasô adiia gôndé anye. ?Tambô me tsaba na mitayi gôénôbeenda mbe: Keneani me‐a? Nandé na mitayi.
Buéyé vane, tsinôduké sôma. Me namakenea memuene géduké anye sôma gôébôngôa ôtô ami kabaga nanôôkéda ébaku na kabaga gô ébakue éne nôkina Tsangô Eamôsôba éaJésus‐Christ. 13Anye nôsabômu mbe ayanzie eba aNzambé adiia môyakôe waô te gône. Na adeekedi adigondoku adiia gô digondokuye dine ôkabôe waô. 14Mônongovo Kumu amatôma mbe: Ane ayanza gôéékéda Tsangô éami Eamôsôba adiia te gô éne.
15Ivô me Paul, buéyé mbe nandé na mitayi gôénôduka sôma tsanôduka sangô. Vatendéa me anye mabégô mema, tsatenda mbe nangadiia sôma. Ti me Paul, nabanda dode yanyô‐môge‐tsangabanda. Tseekéda anye tsangô mbe anye nôvanéa me. Neekéda anye te na gényônga. 16Tsangoongôa ényemôga mbe me nandé gôéékéda Tsangô Eamôsôba éaJésus‐Christ. Neekéda gôébégô namatômu te tômugu. Ti gô maguga mangaba gôndé me ôkô tsiikéda Tsangône édué Eamôsôba. 17Mbe te memuene namateka éyanza éyanzee édué, me mbe nanôduka dode. Ivô me nameetsô éyanzee édué te iitsôgô tambô nayanzéké gamatômu me. 18?Môvanôe wami yéndé? Môvanôe wami te gényôngage géôkô me gôdugéda me éyanza émeetsô me gôéékéda Tsangô Eamôsôba ésavanôkôni. Me tsangasimbuéa ényangee éétsiô me, môékédi aTsangô Eamôsôba éaJésus‐Christ.
19Me Paul tsidigé g’ôvéga. Tsaba môvéga amôma mbe natômu n’edi. Buéyé mbe nane nameengéa memuene g’ôvéga gôéba môvéga oma muetso gômbe vayanzéa me ahngô, nangaweseda ayekani na gôndé Nzambé. 20Vamayanza me va gatse Ajuif namadigaa ga Môjuif gôéweseda ahngô na gôndé Nzambé. Me tsaba gô tsina amige mimatsikéô we na Moise, ivô va gatse ane akenea miangô me dôta namamikenea ga anguene gôéweseda ahngô na gôndé Nzambé. 21Te mônongovo vadigaa me va gatse ane asamenya mige miaMoïse me dôta tsamikenea gômbe nangaweseda omeaa na gôndé Nzambé. Kaka mbe nakina égobeda mige miaNzambé. Nagobeda mitôma miamuene Jésus‐Christ. 22Vadigaa me va gatse ane madeo asisipa buedi gô mabégô maNzambé, éndé te nane. Me nawanyéda moonga na oma muetso gômbe gô minongo mietso miôngôa me éyanza va gatse aô, avo angawesedu na gôndé Nzambé. 23Metso mane, neenda mangô te gôétsigéda Tsangô Eamôsôba gôndé oma muetso na gôékasôgéda môtémami vasinga oma Jésus.
24Anye nôsabômu mbe ane akea matséé akea muetso pita ivô kaka muetso angadiiani. Gôdiia te môvo. Tambô wa n’anyô tôyavôgéni évevea pita buta mbe tôbuéa. 25Eendi amatséva atôma yôtô yaô, na akanéga étséva gôéekeganédu ôtôe. Metso mane madagani eenda mangô gôédiia môsenda apitsi épo. Géé wa n’anyô, tôgenyôgéni yôtô yasô n’anyô gôédiia môsenda amôbô na môbô. 26T’ebandô me Paul nakea pita. Miso mami mabono na nzôô na gôkea me. Me Paul nandé ga môgeenyi asabômôa sagô. 27Natôma ôtôe wami gôéyanzéda angô ganyôngéô me gôéekaganédu angô. Neenda nane kabaga me môékédi aNzambé, nakuba gô mane meekédi me anye mbe: Nôwema, nômbiakuba gô mangô.
ទើបបានជ្រើសរើសហើយ៖
I Corinthiens 9: TSV
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
Alliance Biblique du Gabon (Bible Society in Gabon) 1983