I Corinthiens 6
6
Mônigôani awa n’anyôene ana aTétee
1Me Paul natsapéô gôndé anye. One andé na môsôsô na muana aTéta n’edi asanigôa asi mbumu éa Nzambé gôékônza ébégôe. N’angô akea gôésunda môkedi gôndé évovi ésavamba na Nzambé. ?Ene ékegea nayee? 2?Nôsamenya mbe te anye asi mbumu éaNzambé nôngatsundéda oma muetso ava tsina‐a? Anye va mbene nôngatsundéda gébégôbégô satsinane nyetso ?na deo noo nôsoongôa étsundéda pesu avibégô‐a? 3?Anye nôsamenya mbe wa n’anyô tôngatsundéda asi g’ôba ayanzie aNzambé‐a? Tambô tôsangoongôa édagéô étsundéda mane mamonyoe ava tsina. 4Te gatsapéô me Paul gôndé anye. Vandé anye n’ebégô éamonyo ôdôô gôékônza, anye nôkea nôkéwanyéda gévovi sane asamenya mabégô magô mbumu éaNzambé. 5Navovo nane gôénôétsa tsoyi. ?Tambô va gatse anyô gôsaba ta na môma môvo andé n’eodo gôékônza ébégôe‐a? 6Ana aTétee n’anyô agô mbumu éaNzambé asundana va mbene ane ahsavamba na Nzambé. ?Anye nônyôngéô te nane‐a?
7Me Paul namenya mbe ngudi yanyô digôgi. Nôsabadô kuanakue. Anye gô mbumu éaNzambé mbe nôdônga, ana aTéta n’anyô abaé mbe asaba na môsoso. Okô môkanyô atuba ébégô, buedi gôébidéda buéyé mbe nôndé na mitayi tsika angô eesuéké. 8Tambô kaka ane asaneegeda Nzambé anôénda ébégô. Ivô te anyene n’anyene asi mbumu éaNzambé nôétsana diési na nôeesuéanéani. 9Nômbiabômu. Abévie asangeengéa g’ôkumu aNzambé. Menyani mbe abévie te angua, asi matasame meengéa gô gésasô na makusa te gô gésasô, na agobedi ambumba yegoni, n’akeyi agésasô n’ane ayanza gésasô amôgôô anguene n’anguene, ageto anguene n’anguene. 10Na eesui, n’asi onzôô okitie, n’asi édangi, n’atokoni, n’asi môkôbé. Omee ane asangeengéa g’ôkumu aNzambé. 11Nôeni minongomie mimabaka avo va gatse anyô. Ivô nômagôgédu ébévee éanyô na nômasevou na nômayuu gôéba oma aNzambé. Gô ina aKumu Jésus‐Christ na gô ngudi yaGédidi SaNzambé nômatsimamédu ti eembe nôsabadô n’oési va mbene aNzambé.
Tôyanzédéni yôtô yasô n’anyô gô géneega saKumu
12Avo va gatse anyô nôvovo mbe: Gô éetso, me tsaba na môge. Ii, te buedi. Ivô menyani mbe mavo mabégô masanyepa gôndé wa n’anyô gôéénda. Me Paul noongôa évovo dôta mbe gô éetso me tsaba na môge. Ivô me tsanyôngéô éyanza ta na ébégô évo kabaga éangô étsôpa me g’ôvéga. 13Anye dôta mbe: Môyakô ômeendéô te ébuyi na ébuyi dôta émavangéô te môyakô. Ii, na gô pie. Buéyé nane Nzambé nyovo angabunzéda te éetso, na môyakôe na ébuyie. Ivô menyani mbe yôtô yasô n’anyô oma disivangô gôéénda gésasô. Yôtô yasô n’anyô dindéké te yaKumu Jésus na angô dôta andé Kumu ayôtô yasô n’anyô. 14Nzambé amakundua Kumu Jésus g’ôwa. Gô ngudi yedi angatôkundua g’ôwa te mônongovo.
15Nôsabômu mbe yôtô yasô n’anyô te éemé éotô aJésus‐Christ. Ti gôndé wa n’anyô gôégésa géémé saotô aChrist na géne saotô agétôa sagésasô, géndégégé. 16Anye mavooe nôsamenya mbe mômôgôô agésangana na gétôa sagésasô aka n’edi ôtô ôvo. Matendeo MaNzambé matônigôa mbe: Angô abaé aka ôtô ôvo. 17Menyani dôta mbe ône amagésangana môtémovo na Kumu Jésus aka môvo n’edi.
18Busungani gésasô. Mabégô metso mabévani moongôa môma éyanza mabévéda ôtô amôkedi. Ivô môkeyi agésasô abévéda te ôtôe wedi amuene. 19?Anye madeo nôsiôkô mbe yôtô yasô n’anyô te yeba yaGédidi SaNzambé‐a? Sangô te géne gémeetsô wa n’anyô na Nzambé gédigaa gô mitéma miasô n’anyô. Yôtôye yasô n’anyô kaka yawa n’anyôene. 20Nzambé amavana wa n’anyô n’osunu ôvôni. Tambô tôyanzédékéni yôtô yasô n’anyô gôékuméda Nzambé.
ទើបបានជ្រើសរើសហើយ៖
I Corinthiens 6: TSV
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
Alliance Biblique du Gabon (Bible Society in Gabon) 1983