I Corinthiens 2
2
Tônigôé Christ amakomedu va gésumu sowa
1Vamaviga me Paul na gôndé anye ana aTéta gôénônigôa mabégô mapie maNzambé, mane masinigôganéô na mbeego, tsivovo mavovia mamôpingô gôétsapéda anye. 2Vamabaka me madeo tsiba n’anyô namavanga mbe: Tsangamenya évovo mene mabégô va gatse akasô, buétsé te ti Jésus‐Christ n’owedi va gésumu sowa. 3T’ebandô namatsiga va gatse anyô ga môma abobo natatéa n’onzenze. 4Tsinigôé tsangône na meekédume gavovo asi tsengene n’enyepa éamavovia na éodoe yaô. Namapandôéda mangô na vede gô ngudi ya Gédidi SaNzambé. Ngudiye dine dimeenanô na vede. N’oma asiôngôé étsumadô Nzambé paga. 5Vane vameetsanye Nzambé mitémamie gébé na paga nôsivootu n’eodo éamôma ivô nômavootu, na nômakou te na ngudi yaNzambé.
Eodo éétsô môma na Nzambé
6Buéyé vane me Paul tsabômu éékéda mabégô maditani n’eodo évôni gôndé oma aChrist amoodo gô mabégô maNzambé. Ivô éodoe éne kaka éatsengene, kaka dôta éne éaditômuye dindéké gô tsinane nyetso na kookone yaô dingakea gôébungana. 7Me tsamenya éne éodo. Nanigôa te éodoe émabaka gav’esooe na Nzambé na ésinigôganéô n’oma. Na Nzambé amasevoa éangô mbeego na mbeego, tsinane madeo ésikanô. Ameesevoa gôndé wa n’anyô mbe tôngaba n’ondômbee wedi. 8Va gatse aditômu yetso yava tsina gôsaba ta n’ovo ômenya ône mônongo eodo. Mbe dimabaka n’eangô, yangô mbe disitômé oma gôébôkéda Kumu éondômbee wetso gô gésumu sowa. 9Te gatônigôu gô Matendeo MaNzambé mbe:
Ene émakônza Nzambé gôndé ane ahndé n’edi môvo n’etondo,
Te éne madeo ésienanô na môma, na ésiôkanô na môma.
Na dôta éne ésivakô na môma gô môtémedi.
10Tambô, Nzambé gô ngudi yaGédidi sedi amatsutsuéa wa n’anyô ébégôe éedi ésinigôganéôni. Endé te nane. Gédidi SaNzambé te sangô gétoonegeda buéyé matasa maNzambé masimenyanganôni. 11Gôndé wa n’anyô oma te gédidi géndé na môma gésabômu metso mandé na môma nône. Gôndé Nzambé te mônongovo. One asabômu mane mandé na Nzambé metso, te Gédidi SaNzambé. 12Wa n’anyô asi mbumu éaNzambé tôsiitsô gédidi géndé gô tsengene. Wa n’anyô tômadiia Gédidi géviga gôndé amuene Nzambé na sangô gétôtubéda metso mane matôétsô na Nzambé. 13Wa n’anyô tônigôa mabégôme mane kaka na mavovia mameekédu môma na éodo éamôkedi. Ivô tômanigôa na mavovia matôékédu na Gédidi SaNzambé. Te gatônigôa mabégô mapie maNzambé gôndé ane andéké na Gédidige SaNzambé géne.
14Môma, gamabôtu angô gô tsengene, asangoongôa énigôgéô mabégô mapie matsutsuu na Gédidi SaNzambé. Mabégôme mane mandé matsôga gôndé môma nône. Angô asangoongôa éôkô mangô. Mabégô MaNzambé maseeo te na Gédidi SaNzambé. 15Okô mbe môma andé na Gédidi SaNzambé gô môtémedi te angô amenya ésevoa mabégôme mbe éma mandé mapie, na éma masaba mapie. Vane gôsaba môma angamôeesédani. 16Te gatôtanga gô Matendeo MaNzambé mbe:
?One asabômu matasa maKumu indaa?
?One angoongô Kumu ndongi indaa?
Ivô menyani mbe wa n’anyô tôndéké na matasa maChrist na ôtasédie wedi ôndéké gô mitéma miasô n’anyô.
ទើបបានជ្រើសរើសហើយ៖
I Corinthiens 2: TSV
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
Alliance Biblique du Gabon (Bible Society in Gabon) 1983