Hakaroma 5
5
Mbuyo dhoghuhunga
1Yoyi twa hungama mumatawero, yo twa wanena thiraro kwaNyambi paHekudyetu Jesus Kristusi. 2Papendi twa wanine twe matawero no ndhira dhohoro, kate kuthin̂eke thi tudi natho. Gho tuna kushamberera karo kumakurupero ghetu, kudifamanekero edi gha tu turekera Nyambi. 3Ene kadi yoyi pithayo keho. Atwe twa shamberera karo mumaghukukutu ghetu. Yoyi twa dimuka eshi: Maghukukutu, gha reta ghudhughutjima. 4No ghudhughutjima wa reta ghushemwa ghomatawero. Ghushemwa ghomatawero ne, wa reta makurupero. 5Makurupero, kadi wa kufa honyi. Yoyishi Nyambi gha tapire ruhakitho rwendi paMupepo ghoKupongoka mumitjima dhetu, Mupepo yu ne yo gha tupire.
6Apa twa pirire ngcamu, gha fererire Kristusi hakakudhira kutawa mwaNyambi, munako dhi dhapwire kutureka kare. 7Munu, kadi wa kukona kutapa moyo wendi nyara‐nyara. Ngambi muhunga naye, kadi ya kukona. Shemwa, kwamunu ghomuhunga mbo ghana tjimapa kufa. 8Ene Nyambi gha tu neghedha ruhakitho rokukwetu, paKristusi yu gha tu fererire. Oku shime twayiharuri. 9Yoyi twa hungama pamanyinga ghedni, yo yina karera ngeno eshi, paPendi mbo tupwa kughamwena karo kumahumbithero ghaNyambi. 10Kuninga eshi, apa twa karire shime twakan̂ore, payifa yaMwanendi twa kushemwithanithire naNyambi. Po yina karera thikuma kemo eshi twe, apa twa pwire kushemwithanitha, mbo tupwe kughamwena pamoyo waMwanendi. 11Keho ne kadi yoyi pithayo keho, Atwe karo tuna shamberera thikuma mwaNyambi, paHekudyetu Jesus Kristusi. Papendi yu twa wanine makushemwithanitho.
Adami naKristusi
12Shime karo yino: Pamunu yofotji dyeyire diharwero mukaye, no padiharwero ne kufa. Kemo dyo yengenine yifa mwawanu wahe. Yoyi wahe ha harurire. 13Diharwero dya karire kare mukaye kughutho ghokutapa muragho. Ene diharwero, mbadi ha di ghayaranga ngeshi ku mbadiko muragho. 14Ngambi kemo kufa kwatungire kutunda kwaAdami, kate kwaMosesi. No kwawanu awa ha dhirire kuharura pamuhingo ghofotji, thika di gha reghire Adami.
Pano poghadi makuyuvero pakatji kaAdami no Yu mbo gheya. 15Keho noyitapa yothin̂eke, kadi pofotji nomareghero. Yofotji gha fire pawanu hohengi. Thin̂eke thaNyambi ne, nothitapa thamunu yofotji, Jesus Kristusi, oyu gheyire gha dhi vurithe kwawengi. 16Thitapa thaNyambi ne kadi yira diharwero dyamunu yofotji. Pamareghero ghamunu yofotji, weyire po ghughandhi, ho wa retire matetero. Ene pamirandu dhodhingi, pa tundire thitapa thon̂eke, gho tha retire ghuhunga. 17Pamareghero ghamunu yofotji, po kwatanga kutunga kufa, mwamunu yofotji. Ene payofotji Jesus Kristusi, shime kuwana wingi. Oyu gha tambura wingi ghothin̂eke nothitapa thoghuhunga, mbo ghana para no mbo ghana tungu.
18Thika di gheyire matetero kwawanu wahe pamunu yofotji. Kemo karo tha retire thitenda thoghuhungami, ghuhunga no moyo kwawahe. 19Kenge wa twarire ghuthururu wayofotji kwawengi, ha kare hayiharuri, kemo dyo mbo ghu twara ghutawedhi wamunu yofotji, hengi kughuhunga.
20Muragho nagho weyire po ghuvurithe murandu. Ene pa wengipire murandu, thin̂eke natho tha vurire thikuma. 21Thitambo ne tha karire ngeno. Thika di dya tungire diharwero mukufa, kemo dha kona kutunga nadho n̂eke karo, paghuhunga kate kumoyo ghororuheya paJesus Kristusi ghoHekudyetu.
ទើបបានជ្រើសរើសហើយ៖
Hakaroma 5: MHW1986
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
Mbunga dhoBayibili dhaNamibia (Bible Society of Namibia) 1986
