Hakaroma 13
13
Ghutawedhi ghokuyirughana yoyikuru
1Kehe munu gha kone kutawa kwawakuru, awa ha mupa. Yoyishi mbadiko ngcamu dhi dha dhira kushwagha kwaNyambi, nawakuru wa hadi po. Awa ne Nyambi gha wa paka po. 2Kehe yu ghokushwena ngcamu dhawo. Gha neman̂anyena kumuragho waNyambi. Noyu ghokwiman̂anyena mbo ghana wana mahumbithero. 3Munu ne mbadi gha kona kuyapa ghukuru, ngeshi ku ghuna kutenda ghuhunga. Shimengwa ku ghuna tendi ghuyi. Wa haka kupara kupira woma ndi? Tende keho ne ghuhunga, nawakuru mbo hana kukughu. 4Yoyishi, ghukuru ne ghukareri waNyambi kuthitambo thoye. Ene ngeshi ha ghu tendi ghuyi, kare ndani nothinu thokukuyapitha. Yoyi hakuru mbadi ha kara nyara‐nyara nongcamu dhomahumbithero. Namukuru yu, naye karo mukareri waNyambi ghokukona kuhumbitha muyi. 5Yodigho, wa kona kutawa. Kadi yoyi wa yapa mahumbithero. No pamurandu tha kara thinu thomudhimu diywi dyomahumbithero.
6Po muna ruwereranga karo diketo. Yoyi hakuru ne hakareri waNyambi, no shime ha rughana thirughana thawo. 7Mu tape kwawahe yi yawafumanena. Ngeshi diketo ne diketo. Ngeshi manyinga ne manyinga. Ngeshi difumanekero dyomuwoma ne dyamuwoma. Karo ngeshi dikuto ne dikuto.
Ruhakitho ne marikanyithero ghomuragho
8Mwa kara nomurandu kwamunu, shimengwa mukuhakathane. Yoyishi oyu ghokuhaka muyendhendi, ghana rikanyitha muragho. 9Miragho dhodhihe ne dhino eshi: “Wa tjora ghurugho, wa pagha, wedha, wa rumbera,” ngambi ngo poghudi muragho ghumweya. Dhodhiheya dha kara mumuragho ghofotji ghuno eshi: “Hake muyendhoye thika di wa kuhaka ghothinda.” 10Ruhakitho ne mbadi rwa tenda ghuyi kwamuyendha. Yo rwa karera ruhakitho eshi marikanyithero ghomuragho.
Diyuwa ne pepi didi
11Shime yingi yokunyanda, yoyi muna dimuka eshi, panye dhidi nako. Viri dhokumupindutha ne dhina kumo po. Yoyishi, nako dhomakomweneno ghetu ne dhina kokera, pan̂anyi‐n̂anyi thika di twa tawire. 12Ghuthiku ne ghuna piti. Tamba dive diyuwa. Mu tu shagheke noyirughana yomakokore. Gho tu kuyenge noyitwa yomunyenge. 13Tu pare thiwana thika di tuna paranga mutenyamwiru. Wa kara po ghudakwi nodishawana, kadi wa kupira ghukushuki, yipara yoyimango, kupira mvo no kupira nya. 14Eyi ne kadi kemo. Mu kuyenge mwe Hekudyetu Jesus Kristusi. No mwa tokomena thikuma yirumbera yoyimango eshi yi mu shambererithe.
ទើបបានជ្រើសរើសហើយ៖
Hakaroma 13: MHW1986
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
Mbunga dhoBayibili dhaNamibia (Bible Society of Namibia) 1986
