Markos 9
9
1Yeesus lel: “Talle daw-yerhxeh yane maradde, Yallih nigsinna xaylaalih tamiitem yabliinindah rabaako dhacame wayo le mari adde yaniinim, rummah sinak arhxiyuk ane” akko yerhxe.
Anqayaayar
(Maatiyos 17:1-13; Luukas 9:28-36)
2Lixa lellecik sarrah Yeesus, Bithroos, Yacqoob kee Yohannis isheelih beyeh, sinni ulah wuli dherh koomalle ten yeyyeece. Ten afalle lel kaa xibar yinqiyyireyaako, 3kaa sari lel zifishsham yekkeh, mangum caddowe, taginah lel baarholle walaa inketti micaddoysha. 4Eliyaas kee Moosa lel amalle akah yumbulluynih Yeesuslih waanishak yinin. 5Bithroos lel Yeesusuk: “Mudarris, nanu talle nanniyem mecem kinni. Talle adooxa daasa siraxnoo; tiya kottah, tiya Moosah, tiya lel Eliyaasah” akko yerhxe. 6Amayim lel mangum birriigeenimhi sabbatah yarhxem sorheh kinni. 7Camburre ten agoogishsheyaako lel, carsheeko wuli dhaw camburredde yemeeteh: “Tati yinkixxine yi Barha kinnik, kaa oobbaanta” yerhxe. 8Gar-heeko gura-mizgalle kulux-yerhxin gedda lel, Yeesusko bextih walaa inketta maballinnooni.
9Amaa koomaako oobak lel Xiyawti Barhi rabaako ugutandah, tamaa yubliinim walaa inkettah warishaanamko ten yeemere. 10Amaymih ta gondo sinnedde yibbirhiinih, ta rabaakohi ugut hi macna ayim yakkem sitta esserak yinin. 11“Aymihi sercat dhiiceenit yookomeh yamaato leti Eliyaas kinni yarhxiinim?” yerhxiinih kaa esseren. 12Usuk lel: “Ummannim akah tineekah yadabbo rummah Eliyaas yookomeh yamaato alle tane. Aaginah kinniho Xiyawti Barhih sabbatah mango cazaab yablo kee ilaacimo alle tanem tunkuttubeh tanem? 13Laakin Eliyaas yemeeteh yanem kee tamaa kaa sabbatah akah tunkuttubeekah, farhinnannim akko abeenim sinah warishak aniyo” akko yerhxe.
Najaasa-le ufaye le cindhookih urusnan
(Maatiyos 17:14-21; Luukas 9:37-43)
14 Katattaynitille yemeetin gedda lel, mango xiyawah makarimeenim yublin, sercat dhiiceenit lel tenlih yenkeexedin. 15Akkanih amaa mango xiyaw kayya yublin gedda, mangum cibrah rabenyaako yerdiinih yemeetinyaako salaam akko yerhxin. 16Usuk lel: “Ayimti sabbatah kinni tenlih ankeexeduk taniinim?” yerhxeh ten essere. 17Amaa mango xiyawko wuliti lel: “Mudarris, naxar kaa wayshiisha ufayi kaa yibbirhemhi sabbatah yi barha kolle baaheh aniyo. 18Kaa abbirhinnan gedda, kaa cida, afko caafo baahah lel ikok xarqam-ishah lel kafa. Amaymih ku katattaynit akah yayyaacoona ten essere, usun lel mirhiicinnooni” akko yerhxe. 19Usuk lel: “Ko imaan malit kin ijow! Anu manda fanah sinlih sugo liyo? Manda fanah lel sinalle curo liyo? Talle yolle bah” akko yerhxe. 20Amaa cindhooka alle baahen. Amaa ufayi kayya yuble gedda, amaa cindhooka akkanih firigrig kaa ishe. Usuk baarholle radeh lel yombokookoleh afko caafo baahe. 21Yeesus lel: “Tayim alle tekkemko ayidhdha kaleh yane?” yerhxeh kaa abba essere. Usuk lel: “Cindhaaneeko kinni. 22Kaa yaylawo mangole gedda gira kee layedde kaa cida. Atu abto dhictam teellemko lel, nolle raxmat, ni xat” akko yerhxe. 23Yeesus lel: “‘Dhictemko yok arhxuk tane?’ Yaamineti ummannim dhiica” akko yerhxe. 24Akkanih lel amaa cindhookih abba wac-yerhxeyaako: “Aaminek, yi imaan wayto xat!” yerhxe. 25Yeesus mango xiyaw yerdiinih amiituk yuble gedda, amaa najaasa-le ufaye yoskoolofeh: “Ko naxar-male kee cokka-male kin ufaye, akko tewceyaako malammih caduruh adde orobe wayto, ku aamiriyuk ane” akko yerhxe. 26Zeereyaako dhacumaatih firigrig kaa ishemko sarrah akko yewce, amaa cindhooki lel rabe tiya balih yekkemhi sabbatah, tenko mango mari: “Rabe” yerhxin. 27Yeesus laakin gabadde kaa yibbirheyaako xaf kaa isheh, usuk lel daw-yerhxe. 28Usuk caredde orobe gedda lel kaa katattaynit ulah: “Aymihi nanu kaa nayyaaco tannem?” arhxuk kaa esseren. 29Usuk lel: “Ta gina le cayna-le ufayi, salaatko bextih walaa inkimih yawco mirhiica” akko yerhxe.
Yeesus malammih ishi rabi kee rabaakohi ugut yaakumeh warisha
(Maatiyos 17:22-23; Luukas 9:43-45)
30Amakkeeko yedeynih lel Galiilaati fantaako tillaaben. Tayim lel walaa inketti yaarhago mifarho. 31Amayim lel ishi katattaynit: “Xiyawti Barhi xiyaw gabadde rado kinni, kaa yagdafoona lel kinon. Usun kaa yagdafoona kinon, maddaxit lellec lel rabaako uguto kinni” arhxuk ten aydurusuk yinemhi sabbatah kinni. 32Usun laakin ta zirho duhoona mirhiicinnooni, kaa esseroona lel mashshiiten.
Ummannimko nabati miyatto kinni?
(Maatiyos 18:1-5; Luukas 9:46-48)
33Kafarnaxuumulle lel yemeetin. Usuk caredde orobe gedda lel: “Ayim kinni araxadde adde zattowak tiniinim?” yerhxeh ten essere. 34Ummannimko nabati miyatto kinamadde inkidde zattowak yiniinimhi sabbatah sik-yerhxin. 35Usuk lel defeyeyaako amaa lamman kee tamanah deecime. Akko yerhxe lel: “Akkinnanti erhedhdho yakko farhemko, umman tiyahi sarroorima kee umman tiyahi khaddaam yakko alle tane.” 36Wuli cindhooka baaheh lel fanadde kaa hayeyaako, xaraadde kaa yibbirheh: 37“Ta gina le cindhooka yi migacalle kabbaatinnanti, yi kabbaata, yotta kabbaatinnanti lel yotta makiiki kabbaatam, yotta fare tiya kinni” akko yerhxe.
Ni didde akkinnixeti nottah kinni
(Luukas 9:49-50)
38Yohannis: “Mudarris, wuliti ku migacalle junuun ayyaacuk nubleyaako, notta mikataamhi sabbatah lel kaa desno nicikkine” akko yerhxe. 39Yeesus laakin: “Yi migacalle xayla-le abitto abayaako akkanih yi sabbatah umaani waanisho dhiicati miyanemhi sabbatah, kaa mideesina. 40Amayim lel ni didde akkinnixeti nottah kinamhi sabbatah kinni. 41Atin Masiix mara kitiinimhi sabbatah taacaboona layet kobbaaya sinah axayinnanti, caduruh ishi casbe wayo makinam rummah sinak arhxiyuk ane.
Zambedde andafitaanam
(Maatiyos 18:6-9; Luukas 17:1-2)
42Ta yottah yaamine cindha-maraako inketta zambedde sayshe tiyah, naba marhxan fillak akko gaxteyaako badadde cidditam akah ashshe dhadhdhe. 43Ku gaba zambedde ku sayishshemko, tee igric. Lamma gabaalih badinnixe jahannab gira fanah tadiyemko inki gabaalih aniinadde orobtam koh tashshe. [44Jahannab, ‘kaa awwaaxa akko alayinnixe, kaa gira lel adde badinnixe’ makaano kinni.] 45Ku lak zambedde ku sayshemko, kaa igric. Lamma laklih jahannabadde ciddittamko taxinkisheh aniinadde orobtam koh tashshe, [46Jahannab, ‘kaa awwaaxa akko alayinnixe, kaa gira lel adde badinnixe’ makaano kinni.] 47-48Ku inti zambedde ku sayishshemko, teyyeeceh cid. Lamma intiilih ‘kaa awwaaxa akko alayinnixe, kaa gira lel akko badinnixe’#Isayas 66:24 jahannabadde ciddittamko inki intiilih Yallih nigsinnadde orobtam koh tashshe. 49Amayim lel ummanti mulxu-le girah qarcow kinamhi sabbatah kinni. 50Mulxu dhacam mece, laakin mulxu ishi muluuxa teyleemko, malammih mulux-ishshoona aaginah dhictaana? Sinnedde mulxu eellaanta, sinne-sinneh lel salaam aba” akko yerhxe.
ទើបបានជ្រើសរើសហើយ៖
Markos 9: SCC
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
©2024 Wycliffe Ethiopia