Markos 1
1
Yaythimmiqhe Yohannis arax yasqirribe
1Yeesus Masiix, Yallahi Barha kinyahi, Mece Warih erherha.
2 Nabii Isayasadde akah tunkuttubeh taneekah:
“Taykinna, ku basolle ku arax yasqarrabo le
inni luukta ku nifidde dhirhiyak aniyo,#Mal-aakhi 3:1
3zeeratiih dhaw zibolle yamabbe:
‘Maddarah arax akah isqirriba,
kaa arax rig-ishanta’”#Isayas 40:3.
4Yaythimmiqhe Yohannis, zambi xabbot geyoona ciloh, zibolle toobat anthammaq warroyshak yemeete. 5Umbuka Yahuudaati baarho kee umbuka Yerusaalem xiyaw kayyalle yemeetin. Sinni zambeh yeelemiinih lel Yordaanos nahaaradde kayyah anthimmiqhuk yinin. 6Yohannis lel gaalatti dagar kee qarbat ragad hashshiitak yine. Cawayne kee zibi baska lel beetak yine. 7Usuk lel: “Yottaako ziyaada xayla leti yi sarralle amiituk yane. Anu lel cunuuneh kaa kabelhi ragad akko aftaxo meeda. 8Anu layeh sin iythimmiqhe. Usuk laakin Quddus kin Ufayeh sin yaythammaqho kinni” arhxuk warroyshe.
Yeesus anthammaq
(Maatiyos 3:13—4:11; Luukas 3:21-22; 4:1-13)
9Amaa waqhtedde Yeesus Galiilaati Naazretko yemeeteh, Yordaanos nahaaradde Yohannisih yinthimmiqhe. 10Usuk lel layeko yewce geddaakoh akkanih carshit amfilluuk yuble. Ufayi lel xamaama balih alle oobe. 11Carsheeko lel dhaw yemeete: “Atu yinkixxine yi Barha kito. Anu kottaalih xedeneena kiyo”.
Yeesus cakana
12Ufayi lel akkanih zibolle kaa yeyyeece. 13Marootom lellectiya lel zibolle Sheethanah amcikkinuk suge. Zibi bahayimlih yine, malaykut lel kaa baclayshak yinin.
Yeesus ishi ciyyo erherhisha
(Maatiyos 4:12-22; Luukas 4:14-15; 5:1-11)
14Yohannis yimxibbishek sarrah, Yeesus Galiilalle yemeeteh Yallih Mece Ware warroyshe. 15Usuk lel: “Waqhti yikmileh kinni. Yallih nigsinna kab-terhxeh tane. Totoobiinih Mece Wareh imina” yerhxe.
Yeesus afti katattaynit doora
16Usuk Galiilaati igilhi afko tillaabak, Simcoon kee Indiryaas, Simcoon sacal, caasa tagoofofem kuuk yiniinimhi sabbatah, caasat intile igilille cidak ten yuble. 17Yeesus lel: “Yi kataanta, anu lel xiyaw tagoofofem akah takkiiniikah sinak abo kiyo” akko yerhxe. 18Usun lel caasat intilel xabeenih akkanih kaa katayen. 19Amakkeeko dagum yedee gedda, Zibdit barha Yacqoob kee kaa sacal Yohannis, jalbadde yininya yakkeedo sinni caasat intilel aymamacuk ten yuble. 20Akkanih lel akah deecime. Usun lel Zibdi sinni abba casbentitlih jalbadde xabeenih kaa katayen.
Yeesus najaasa-le ufaye-le xiyawto urusa
(Luukas 4:31-37)
21Kafarnaxuumudde lel oroben. Akkanih lel Sambatah sunagoogedde orobeh aydurusuk yine. 22Sercat dhiiceenit balih akkekkah, reeza le tiya balih ten yuydurusemhi sabbatah, kaa aydarasah cibrah raben. 23Amaa waqhtedde lel ten sunagoogedde najaasa-le ufaye le xiyawti yine. Usuk lel: 24“Ko Naazret Yeesuso, ayim nottaalih lito? Atu notta taylaw temeete? Anu miyatto kitom ku aarhige. Atu Yallih Quddus kin tiya kito” yerhxeh zeere. 25Yeesus laakin: “Sik-erhexaaki, akko ewec!” yerhxeh kaa yoskoolofe. 26Amaa najaasa-le ufayi lel firigrig kaa isheh wac-yarhxe andhaxlih akko yewce. 27Inkoh lel yussuxuttutin, sitta-sitta lel esseren: “Tayim ayim kinni? Cusub darse reezaalih! Najaasa-le ufayit yakkeedo yaamire, usun lel kaa yaabbin” yerhxin. 28Akkanih lel wari kaa zacabah umbuka Galiilaati wakalelle faax-yerhxe.
Yeesus mango mara urusa
(Maatiyos 8:14-17; Luukas 4:38-41)
29Akkanih lel sunagoogeeko yewciinih Simcoon kee Indiryaas caredde Yacqoob kee Yohannislih oroben. 30Simcoon ballö lel lacnah carhah tine. Usun lel akkanih tee zacabah kaalih waanishen. 31Usuk lel teyalle yemeeteh gabadde tee yibbirheh xaf tee ishe. Lacna akah xabteh lel ten takhdamo erherhishshe.
32Ayro dhumteh kasi yekke gedda lel, inkoh laxuttem kee timjinninem alle baahen. 33Umbuka daafo lel carafalle teketteh tine. 34Usuk lel yemfeleele laxuu le mango mara uruse, mango junuun yakkeedo yeyyeece. Kaa yeerhegiinimhi sabbatah lel, junuun waanishaanamko ten deese.
Yeesus Galiilalle warroysha
(Luukas 4:42-44)
35Dhaxiine maaxalle, kaddih dite anuk, uguteh zibo kin makaano fanah yedee, amalle lel yissilliye. 36Simcoon kee kaalih tinem lel kaa goronishen. 37Usun lel kaa geyeenih: “Ummanti ku wagiyaa yane” akko yerhxin. 38Usuk lel: “Anu akah emeetem tayim kinamhi sabbatah, amalle warroysho ciloh, aki diika fanah nadaw hayyaanta” akko yerhxe. 39Usuk lel ten sunagoogitidde warroysha kee junuun ayyaacuk umbuka Galiilalle yuzuure.
Yeesus wuli saknite tiya yaysiffiye
(Maatiyos 8:1-4; Luukas 5:12-17)
40Wuli sakniteti alle yemeeteyaako kaa dhaacimak gululluubuweh: “Fadhdhemko yi taysaffawo dhicta” yerhxe. 41Raxmah uluc akko xarhemhi sabbatah lel ishi gaba dhirhiyeyaako kaa dhageh: “Anu farha. Imsiffii” akko yerhxe. 42Akkanih sakna akah xabteh lel yimsiffiye. 43Dhacumaatih kaa asuuseyaako lel akkanih kaa dhirhiye. 44“Ubul haye, tiyah miwarishin, laakin aduwaaki ishi nabse shekh uybulluu. Tenah shahaada takko lel ishi thahaarah Moosa yeezezem bah” akko yerhxe. 45Usuk laakin yewceyaako, amayim warroysho kee ware faax-isho erherhishe. Amaymih lel Yeesus farhe ginah daafodde orobo mirhiicinna. Usuk laakin zibo kin makaanolle yine. Xiyaw umbuka wakaliilaako alle amiituk yinin.
ទើបបានជ្រើសរើសហើយ៖
Markos 1: SCC
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
©2024 Wycliffe Ethiopia