Maatiyos 28
28
Rabaakohi ugut
(Markos 16:1-10; Luukas 24:1-12; Yohannis 20:1-10)
1Kado, Sambatko sarrah, baxuurot afti lellecille maaxak, Magdalat Maryam kee aki Maryam amaa qabre yabloona yedeyin. 2Taykinna lel, Maddari malaykatti carsheeko oobeh yinemhi sabbatah, naba kirdidimo tekke, yemeeteh lel amaa duma yeydedebbeh bukakke akko defeye. 3Kaa xibar lel xankarhah, kaa sartim lel barad balih caddummih higgiduk yine. 4Amaa dhawrheenit lel kaa mashshih arharhenyaako rabtemih yimmingidin. 5Amaa malaykatti laakin amaa sayyokke: “Masqalakke takarimeh yine Yeesus wagiyak taniinim eerhegeh aniyok, mimashshiitina. 6Akah yerhxeekah rabaako ugutemhi sabbatah, usuk talle miyane. Amowa, usuk carhah alle yinekke ubula. 7Sarrah, iba lacteenih aduwantaaki kaa katattaynitih, usuk rabaako ugutem akah warisha, taykinna lel, Galiila fanah sin afadde aduuk yane; amalle kaa tabloona kitin. Ubula, sinah warisheh aniyo” akko yerhxe. 8Amaymih, usun amaa qabreeko gilix kee mango xedenlih yewciinih yerdinyaako kaa katattaynitih warishen. 9Taykinna lel Yeesus ten geyeh: “Nagaa!” akko yerhxe. Usun lel kab-yerhxinyaako kaa iba yibbirhiinih akah yucbudin. 10Sarrah Yeesus: “Mimashshiitina, aduwantaaki yi saculuh Galiilalle yadawna akah warisha, amalle lel yi yabloona kinon” akko yerhxe.
Dhawrheenitti ware
11Amaa sayyo aduuk, taykinna, amaa dhawrheenitko gari daafo fanah yedeynih, amaa sheekhat manabottitih tekkem inkoh akah warishen. 12Dikti naba maraalih yekettiinih zatteyeenimko sarrah, amaa caskarah mango fiddat solaadi akah yoxoynih: 13“Ta xiyawah: ‘Kaa katattaynit nanu dhiinak bar yemeetiinih garacen’ terhxiinih akah warisha. 14Tayim masxadaadari cokkak guftemko, nanu kaa nishshimineh gidcatko sin nayyaaco kino” akko yerhxin. 15Amaymih amaa fiddat solaadi bishshiiteenih, usun akah ten yeemeriiniikah aben. Ta wari lel Yahuud fanadde faax-yerhxeh, kaafa fanah yane.
Naba farto
(Markos 16:14-18; Luukas 24:36-49; Yohannis 20:19-23)
16Kado amaa inikan kee taman katattayniya, Yeesus alle yadawna akah warishe Galiilaati koomalle yedeyin. 17Kaa yublin gedda laakin akah yucbudin, gari laakin lammaa-garbiten. 18Yeesus lel kab-yerhxeh: “Umbuka reeza carshe kee baarholle yoh tomxowweh tane. 19-20Amaydo, aduwantaaki, umbuka ummat, Abba, Barha kee Quddus kin Ufayih migacalle ten tiythimmiqhiinih, inkoh anu sin eemereh aniyom aboona ten uydurusantaaki katattaynit akko aba. Taykinna, anu lel ta waqhti abayshima fanah umman max sinlih aniyo” akko yerhxe.
ទើបបានជ្រើសរើសហើយ៖
Maatiyos 28: SCC
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
©2024 Wycliffe Ethiopia
