MATHE 22
22
Lo, Xo, Pue" Bic Nyid Dangtu'
(Luk 14:5-24)
1 Aseing Yesu gi dangtu' to" lho: houg: bang: ri « 2Mougkhung: mungdain: gi nya: yuggi zoo: shid re" loxo' pui" ri soin to" da" khokham" dayug yo" du nyid. 3Hau: khokham" phoo gi shid re khe: too" bye: mo, jhang khyoo: nya: dei zoo: yi ri doem khi: nhang: kaid. Nghoidloug we' nyangnu" gi nau re" boem nghoid ago". 4khokham" gi ‹Nga" da" myen" xoin: zoo: pui" gi jen" jen" nghoid bye. Nga" nu: shain: we said bye:- xu: young" da" nujung nu" we' said bye:. Soin' nyheing ca" da" khyoo: bain sho' soin' nyheing too" bye. loxo' pui" khyoo: ri" loo: ge". Khe: too" bye: mo, ri yhe: doem tid ge'› ga: dei zoo: gootu: ri doem nhang: kaid. 5Nghoidloug we' khe: too" mo, gi khokham" da" dei zoo: yi ri ci: shu: we' anhang: boem. Dayug gi yoo khyoo: dayug gi nya: da" phaga: jang: khyoo te: yhe: lo" boem ago". 6Deung nyid mo, gi khokham" da" dei zoo: yi ri lhoem: myheig yu nyangnu" ri baid lho: said pyam boem ago". 7khokham" phoo gi nheig gye yo: lo wigi Nya: gyizoo: yi ri nhang: kaid lho: wigi hau: byu said mo, ri yhe: said pyam nhang: nyangnu" voogung ri we' nghe pyam nhang. 8Hau: thang: ri dei zoo: yi ri doem khe: yu lho: ‹loxo' pui" zeing gi bain jen" jo, nghoid loug we' khe: too" mo, gi he: pui" yo" amoin: yi boem- 9Akhid' meing: khyoo: moo yhe: lho: nanu" yo" shau" goo" mo, dangain" ri we' khe: shu" loo ge'› ga: doem tid kaid. 10Dei zoo: yi gi khyoo: cang thu' yhe: lo" lho: shau" go" da" byu gi byugang: dangain" ri khe: shu" lo boem bye. Houg: yoomo loxo' da" yab, moo" khoug: moo meing" byu byeung" sho' zhoung: jo, boem bye.
11«Khokham" phoo gi being" se' yu" wa ga: vang lo da" uri loxo' pui" vang byimi eavoid ci: da" yuggi dayug ri shau" myang- 12‹Bidnoem phoo we"- nang gi loxo' pui" vang byimi avoid cizi- kha: khyo" re" lha"» ga: myid: yu" da: nghoid loug we' hau: yug gi ci: we' asi› ga: loo: nyid nyid da. 13Hou thang: khokham" phoo gi nya: dei zoo: yiri ‹He: yug da" khyid: lo, moo tei" joeb lho: nghe: shoid mo moug coid khoug: khyoo du" zei kaid ge'› ga: tid. Hau: joyoo moo nyang gi" ngoug byid: ngoug nhab' yo"- zei yang: ngaid zeing kham: yau nyid wa"- ga: tid.
14Houg: yoomo Aseing Yesu gi «khe: yu mo, myoo: nghoid loug khyen: yu shau" mo, neing: boem» ga: tid.
Khang" Doug Kaid Ziri Myed: Gyo: Khyoo:
(Mar 12:13-17; Luk 20:20-26)
15Pharishe gi zeing foem lo boem lho: Yesu ri dang: myid: khyo" yooboo sho: wigi myheig wa ga: zheung: sham: go" lho: thu' lo" boem. 16Houg: yoomo nyangnu" gi nyangnu" da" cangzoo: dayham" yo' Herod da" phung: mo mo' dayham" yo" dage" Yesu jhang khyoo zheung: nhang: kaid. Hau: lagyoo: yi gi «Sara: we"- nang gi deung main" su: nghoid wigi Mangso da" khyoo: ri deung: main" khyo" jhoug" byid: nyid ziyo' byu gootu: yi ciga: wa ziri nang gung ayou loo: za: byu myonhoo: ri we' akhyen: su: nghoid ziri ngoonu" se. 17Houg: su" nghoid yoomo nang khasu" myid da" khyoo: ri ngoonu" ri tid kyoo" we' Roma khokham" ri khang" doug ge kaid la". age kaid la"» ga: zheung: myid: boem.
18Nghoidloug we' Yesu gi nyangnu" da" age khyo" lheing: myid: da" dang: khoin" nghoid ziri si byid: yoomo nyang gi «ayid void mo we"- nanu" gi ciwim ngoori myheig" wa shid' re" lu: go" la". 19Khang" doug kaid wa da" ngei dakyab ngoori byid: yu" ge'» ga: tid.
Nyangnu" gi ngei dakyab ci: re" ago". 20Yesu nyangnu" ri «he: ngei kyab moo hang" da" myonhoo: soolho: yo"-myeing dab lha"» ga: myid:
21«Nyangnu" gi khokham" da" myonhoo: soolhoo: yo' myeing dab» ga: doem phoid: kyo" boem.
Houg: lang" Yesu gi «Ketha khokham" yo" sen: gu: Ketha khokham" ri byid: ge'. Mangsoo yo" sen: gu: Mangsoo ri byid: ge'› ga: tid.
22Houg: bang: gi hau: da" dang: ri shau" gyoo: lang" gye" gyo: mau" boem bye. Hau: thang: ri nyangnu" gi nya: jang" mo thu' lo" ago".
shid: Jangmo Doem Dei Loo Wa Ziri Myed: Da"Khyoo:
(Mar 11:18-27; Luk 20:27-40)
23Hau: bidnyid ri nyang: Saduke dayham" gi Yesu jang" moo ju" re" boem. Houg: bang: gi shid: jang" mo doem dei to'' loo wa ziri aloem" jeung" mo, nghoid ago". 24Nyangnu" gi «sara: we"- Yuggi dayug gi zoo: aboo shi" ri shid: lo" ri nya: mang: da" cougmoo" myhi, ri nya: nhung" yug lo, doem xo' yu lho: yo" da" zooshang: gi nya: mang: yhoemkhung: xo' void zi nghoid ga: Moshe tid to. 25Akhid" ngoonu" moo nya: mang: nya: nhung" nyhed yug nyid. Mang: zeing gi myi: yu thang: ri zoo: shang: shi" ri ayoo" shid: lo" nya: nhung" gi coug" doem koem. 26Nya: nhung" yi dayug bain dayug- nyhed yug ju" sho'- coug" koem: thang: ri zoo: abo zi te: shid: lo" boem. 27Hau: thang: ri hau: da" myiyi: myhi, we' shang shid: lo. 28Houg: ri shid: jang" mo doem dei lo da" bidnyid rigi hau: myiyi: gi khayoug yhoem: seing: myhi' nghoid wa lha". Khasu" wim gari he: da" myiyi: gi yug gi nyhed yug yo" zoem" yu" bye: su: nghoid» ga: myid: boem.
29Yesu nyangnu" ri «nanu" gi jhoem: dang: yo" Mangso yoem: so' ri ase' gyo: boem. houg: su" nghoid yoomo myid shoid nyid abye: go. 30Khasu" wim gari byu xangsu: yi shid: jang" mo doem dei to'' lo da" nyid" rigi myi: yu myi: byid: da" khyoo: ajo, loo nyangnu" gi moug: lagyoo: yi yhangti" nyid boem wa zi nghoid. 31shid: mo, doem dei loo wa ziyo' sen: lho: Mangsoo khasu" ga: tid to" ziri anghab' yu" goo" rhe". 32‹Ngoo gi Abraham da" Mangsoo Isag da" Mangsoo yo' Yaku da" Mangsoo nghoid›. Nyang: gi shid: loo" mo, da" Mangsoo anghoid. Dei nyid da" Mangsoo da nghoid» ga: phoug tid.
33Houg: su" ga: nyang: jhoug" byid: da" khyoo: ri Byu phung: moo" yi shau" gyoo: lang" gye gyo: mau" nyid boem ago".
Je Gyi: Da" Amyeing" Dang:
(Mar 12:28-37; Luk 10:25-28)
34Yesu saduke bang: ri nhoid nghoeb pyam khyoo: ri pharishe: bang: shau" gyoo: lang" zeung re" lo boem. 35Nyangnu" da" phung: mo jhoem: dang: se' da" sara: dayug gi Yesu ri dang: nghui" da" khoin" myid: da nyang: ri myheing wa shid' re" lu: go" nyid. . 36«Sara: we"- Amyeing" tarha" mo khaloem: je gyi: thang lha"» ga: myid.
37Yesu gi «‹re" da" Mangsoo ri re" ung: khoug: dangain" re" nheigloem: emyid dangain" re" Venyi: soozoo: dangain" yo" jheddab we'.› 38He: da" tarha" gi gyi: Thang ziyo' yhoug: gyen: thang da" tarha" nghoid bye. 39Eig loem: moo gyi: thang da" tarha" gi ‹re" yhoem: kyoo" cang" ri nanya: gung yo" dakhyoo" ti" jheddab we'› ga: da" tarha" nghoid. 40He: da" tarha" eig loem: gi Moshe da" tarha" dangain" yo' Lapi: yi jhoug" byid: da" dang: gung apoem: nyang: nghoid bye:» ga: tid kyo.
Meshia Da" Khyoo:Dang: Myid:
(Mar 12:35-37; Luk 20:41-44)
41Akhid" Pharishe dayham" foem: too" uri Yesu dang: dakhoin" myid. 42«Meshia da" khyoo: ri nanu" khasu" ein: myid go" lha". Nyang: gi hang" nya: myid nya: zoo: nghoid ein: go" lha"» ga: myid: da. Houg: bang: gi
«David da" nya: myid nya: zoo: nghoid» ga: phoug tu" ago".
43Yesu gi «houg su" nghoid lang" gi David gi gyeungshang: Venyi: khyo" Meshia ri Aseing ga: ci: wim tid lha".
44‹Re" gyi: voo yi ri
re" khyid: voo: khoug: moo ngoo to" da" ayo, aju" shi" da" ayo, moo nga" lo, yo shoid moo dazhoung: jo, shi" we' Aseing gi nga" Aseing ri tid› ga: wigi David tid to.
45Hau thang David gi nyang ri ‹Aseing› ga: tid nghoid rigi Meshia gi khasu" wim wigi David da" nya: myid nya: zoo: ge nghoid wa lha"» ga: doem myid.
46Hou lang" gi hang" we' Yesu ri Dang: phoid' ayo" phougtu" boem loo hau: nyid" mo hang" we' nyang: ci: avoem" myid: boem loo.
ទើបបានជ្រើសរើសហើយ៖
MATHE 22: LCL
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
Lacid Bible © Bible Society of Myanmar, 2009.
