MATHE 20
20
Zabyid Khyam: Moo Moo" Zei: Mo,
1«Mougkhung: mungdain: gi zabyid khyam: seing: dayug thoung" shau" da" moo" yo" du nyid. Nyang: gi khyam: moo" zei: wa da" vhoo" kung: sho: lhung: wa ga no" re thu' yhe: lo. 2Vhoo" kung: phoug" shang" wa zi danyid" ri ngei phyu: dakyab byid: wa zi veing" yoomo nyangnu" ri zabyid khyam: khyoo nhang: kaid bye. 3Nab' kyoo goug nayi: koo: moo nyang: gi kid" vang" khyoo yhe: yu" lo" ri ce: moo" abo mo, yab yoin" to" ziri myang. 4Houg: lang" nyangnu" ri ‹nanu" we zabyid khyam: moo moo" yhe: zei: ge'. Moin: yi" da" vhoo" kung: phoug" ngoo shang" wa› ga: tid. 5Houg: bang: we yhe: lo" boem bye. Nyang: gi bidnyid" gung ri nghoid loug- myenthang: soem" nayi koo: moo nghoid loug- houg: yo' dakhyoo" ti"- kid" vang" moo yhe: yu" lho: vhoo" kung: cang lhung: yu shi. 6Myenthang: wim: nayi: koo: moo dalheing: doem yhe: yu" ri Byu gootu: yab jo, zi doem myang wigi nyangnu" ri ciwim wigi moo" azei: loo: danyid" goin" he: joyoo moo yab jo, go"› ga: myid: yu. 7Houg: bang: gi ‹ngoonu" ri hang" we alhung: yoomo nghoid› ga: tid boem. Houg: lang" khyam: seing: gi ‹nanu" we' nga" zabyid khyam: moo moo" yhe: zei: ge'› ga: tid kaid.
8«Myenthang: ju" lang" hau: khyam: seing: gi moo" shu" vhu" shi: su: ri ‹moo" zei: mo, ri khe: zheung" lho: moo vang thang mo, mo wigi vang shid" bang: moo ju" sho' vhoo" kung: phoug" thug byid: we'› ga: tid. 9Houg: lang" vhu" shi: su: gi myenthang: wim: nayi: ri vang zei: mo, gi ngei phyu: dakyab kyab yo" yu boem bye. 10Xang: shid" vang zei: mo, gi ngei je myoo: wa ga: myid boem ago". Nghoidloug nyangnu" we' ngei phyu: dakyab kyab shau" yu boem ago". 11Houg: su" nyangnu" gi ngei yo" yu boem lang" khyam: seing: ri myeing" myo: boem ago". 12Moo" vang shid" mo, hid: bang: gi ‹Nang gi danayi: za: te: kung: da" thang: ri dari" mo ri ngoonu" nyid" goin" bid lhab' kham: mo yo' dakhyoo" ti" nyangnu" ri vhoo" kung: phoug" byid: da› ga: khyam: seing: ri tid ago". 13Khyam: seing: gi nyangnu" mo dayug ri ‹bidnoem phoo we"- ngoo nang ri mhoug zo: zi anghoid. Nang yo' ngoo dakyab byid: wa ein: sham go" veing" too" bye anghoid la". 14Nang yu eung: gu: dayu loo" we' moo" vang thang: gyoo" su: ri we' nang ri byid: ziyo' dakhyoo" ti" byid: wa zi ngoo vho: nyid. 15Nga" ngei ri ngoo vho: khyo" age ci: yhung: rhe" Ngoo gi koid: ziri nang no" zo: da" nheigloem: bo rhe"»› ga: myid:.
16Houg: yoomo thang: moo nyid su: gi «xang: shid" moo nyid su: bui" wa. Xang: shid" moo nyid su: gi gam, thang: gyoo" su: nghoid wa» ga: wigi Yesu tid.
Said Kham: Wa Da" Khyoo: Soem" Lheing Lheing: Doem Tid Kyo"
(Mar 10:32-34; Luk 18:31-34)
17 Aseing Yesu gi Yerusalem voo khyoo do, lo" nyid da" uri cangzoo: daxe: eig yug gi kyeing" khe: shu" lo" lho: khyoo: moo tid kyo" zigi 18«Gyoo: ge' nyhang" Yerusalem voo khyoo do, lo" nyid boem bye. Hau: da" Byu nya: zoo: gi Khainjung moo" yi yo"- tarha" sara: yi da" lo, moo ab pyam zi shau" wa nghoid. Nyangnu" gi nyang: ri said pyam wa shid re" dang: kho' boem wa nghoid. 19Hau: thang: ri nyangnu" gi nyang: ri juang" yi baid youg lho: pyang" zheung: moo baid jen" too" wa shid re" nghi: zain byumyu" yi da" lo, moo ab pyam boem wa zi nghoid. Nghoidloug we' nyang: gi soem" nyid" lang" doem dei to'' loo wa zi nghoid» ga: tid kyo.
Nya: Myhi, Dayug Re" Mho' Da" Khyoo:
(Mar 10:35-45)
20Hau: uri Zebedi da" yhoem: seing: myhi' gi nya: zoo: eig yug yo" dage" Yesu ri re" noku lho: nyang: ri daja: ja: re" mho'.
21Yesu gi «nang ci: ca" la"» ga: myid: yu" hau: myiyi: myhi, gi «Aseing gi khokham" bue" lo" da" bidnyid ri re" lo, yo shoid khyoo dayug lo, koung" shoid khyoo dayug zhung: nhang: we'» ga: re" mho'.
22Yesu gi «nanu" ce: noem mho' nyid zi nanu" nyang: asi nghoid ago". Ngoo shau" wa da" kyi" khyeug goem ri nanu" yo" shug wa go" la"» ga: wigi myid: nyangnu" gi «ngoonu" yo" shug wa» ga: phoug tu".
23Yesu gi «nanu" nga" da" goem mo deung" deing shug goo: wa. nghoid loug nga" lo, yo shoid zhung: wa lo, koung" shoid zhung: wa akhang" gi ngoo ayo" byid. Hau: akhang" aya gi nga" phoo soin' nyheing too" mo shid re" date: nghoid» ga: tid.
24He: da" khyoo: ri cangzoo: daxi: youg bang: shau" gyoo: lang" hau: cangzoo: tang: ri nheig gye yoo: nau ago". 25Nghoidloug we' Yesu gi cangzoo: yi ri nya: jang" moo khe yu lho: «nghi: zain khokham" yi gi Meing: byu yi da" tho' moo thain: da" amyeing" khyo" yo" vhoeb khang. Nyangnu" da" zoug: ludaid' yi gi mung" byu yi da" tho' moo akhang" aya byeing: sho' yoo" mo, nghoid ziri nyangnu" se nyid boem. 26Nyangnu" nyang: cang" da" gyoo: mo gi houg: su" anghoid. Nanu" moo gyi: thang su: bui" nau rigi nanu" da" dei zoo: bui" ca. 27Nanu" moo vhu" jhung: bui" noug su: gi nanu" da deizoo:, bui" ca. 28Khasu" wim gari Byu da" nya: zoo: lang" Su" be" ri deizoo:, zoo: wa ga: ju" re" zi anghoid. Sube" da" dei zoo: koid: wa ziyo'- Byu myoo" sho' ri khyoid yu wa shid re"-nya: kangso' ri byid: pyam wa ga: daju" re"» ga: Yesu tid.
Myo, Amyang Su: Eig Yug Ri: Myo, Myang Nhang:
(Mar 10:46-52; Luk 18:35-42)
29Yesu yo" cangzoo: yi gi Yerikho voo mo thu' lo da" uri Byu phung: moo" gi nya: thang: moo cang lo boem. 30Aseing Yesu lid lo" ziri khyooyam moo zhoung: jo, da" myo, amyang su: eig yug shau" gyoo: lang" «David da" nya: zoo: Aseing we"- ngoonu" ri nheig khyeig yu shi" we' o"» ga: yoid tid ago".
31Byu phung: yi gi nya: eig yug ri sam" zoo: nyid wa shid re" gyikoid toem ago". Nghoidloug we' hau: eig yug gi «David nya: zoo: Aseing we"- ngoonu" ri nheig khyeig yu shi" we' o"» ga: daje yoid phau: lo ago".
32 Aseing Yesu gi lo" yab theing: lho: Hau: eig yug ri nya: jang" moo khe: yu wigi «re" eig youg shid re" ngoo cikoid: byid: nhang: noug go" la"» ga: myid.
33Nya: eig yug gi «Aseing we"- ngoonu" ri myo, myang nhang: we' o"» ga: mho' ago".
34 Aseing Yesu gi nyangnu" ri nheig yu khyeig yoomo nyangnu" da" myojid" moo lo, wigi zheung: tain" byid: lang" dalheing: dam nya: eig yug myo, doem myang lo lho: Yesu thang: moo jha" cang lo" ago".
ទើបបានជ្រើសរើសហើយ៖
MATHE 20: LCL
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
Lacid Bible © Bible Society of Myanmar, 2009.
