MATHE 18
18
Je Gyi: Thang Su: Hang" NghoidLha"
(Mar 9:33-37; Luk 9:46-48)
1Houg: lang" cangzoo: yigi Aseing Yesu jang" moo ju" re" lho: «Mougkhung: Mungdain: moo je gyi: thang su: kha yug nghoid wa lha"» ga: wigi zheung: myid: boem.
2Yesu gi zooshang: dayug ri khe: yu lho: wigi nya: cangzoo: yi da" shid khoin" moo yab jo, nhang: lho: tid da" zigi 3«Ngoo nanu" ri gyeing" gyeing" tid ba. Nanu" gi nheigloem: thid' pyam lho: zooshang: yi yhang ti" abue" lo rigi Mougkhung: Mungdain: moo yo" vang loo" goo" wa zi anghoid. 4He: zooshang: yhangti"- nya: nheigloem: nyhoem: khyo su: gi Mougkhung: Mungdain: moo je gyi: thang su: nghoid wa. 5Nga" myeing yoomo hid yhang: te" da" zooshang: dayug yug ri lhoem: kham: yu su: gi ngoori lhoem: kham: yu su: nghoid bye.
Yooboo Koid: Wa shid Re" Jhu' Phyo', Da" Khyoo:
(Mar 9:42-48; Luk 17:1-2)
6«Ngoori loem" jeung" nyid da" ngi, su: dayug yug ri loem" jeung" nheigloem: byo loo" nhang: su gi nya: leingzeing: moo lug lheing: je gyi: gyab' tei" tab' lho: no, thang Panglai thoem" thi" moo khyo pyam wa zigi nya: shid re" je ge nyid. 7Mougmyid moo loem" jeung" khyoo: ri lhu: phyo da" thei' leung jang: joyoo mo mougmyid gi joem: lo" nyid bye. Nheugloem: thei leung jang: gi gyeing" nyang: jo,- nghoid sho loug thei leung jang: koid thu' su: gi gyeing" nyang: joem: loo" wa zi nghoid.
8«Re" da" khyid: nghoid loug- lo, nghoid loug re" da" loem" jeung" nheigloem: ri lhu: phyo' nghoid rigi Hau: khyid: yo" lo, ri kho" pyam we'. Khyid: lo, joeb' joeb' yo"- apyaid ato: da" myi: thoem" moo davang loo" wa tho' rigi gungdu: ajoeb' byeung" lo: zi apyaid ato: kangso' yo" yu zigi je ge nyid. 9Re" da" myojid" gi re" da" loem" jeung" khyoo: ri yu shoid nhang: nghoid rigi hau: myojid" ri thoid pyam we' ngarai" myi: thoem" moo myojid" joeb' ziyo' vang loo" wa tho' rigi myo, dajid" yoin" ziyo'- apyaid ato: kangso' dei jang" khyoo: vang loo" wa zigi je ge nyid.
Byoug Lo" Da" Yang Dadu Da" Dangtu'
(Luk 15:3-7)
10«Nanu" gi ngi, su: khayug ri we' Byu ngi yoo ayu" wa shid re" lhid nyid ge'. Nanu" ri ngoo tid da" zigi hau: zooshang: me" da" moug: lagyoo: yi gi Mougkhung: Aseing nga" pho da" myonhoo: ri khanham we' dayu" nyid boem ago". 11(Byu da" nya: zoo: gi byug loo" mo, ri khyoid yu wa shid re" ju" re" zi nghoid.) ‹‹He: Jhoem: dang: gi Loem ge" da" lo, mo lhid" to" da" jhoem: mungdang: xoug" moo gi aboo.»
12«Nanu" gi khasu" ein: soin: nyid go" Byu dayug gi nyang: moo yo" da" yang dashoo: mo dadu: byug lo" ri goug: xe: goug: du: ri bouggung tho' mo yang kaid jang" moo- nyhed: too" kho lho: byug lo" da" yang ri ashoo: loo za: nyid wa la". 13Byoug lo" da" yang ri shau" sho: lho: ri abyug da" yang goug: xe: goug: du: yoomo gau yi nge' pyo: da" tho' moo byug lo" da" yang dadu: ri shau" shoo: yoomo je gau yi ngei' pyoo: wa ein: wigi ngoo nanu" ri gyeing" gyeing" tid kyo. 14Houg: yo' dakhyoo" ti"- Mougkhung: tho' mo nanu" da" nya: phoo we' he: ngi, su: dayug we byug lam" loo" wa zi avhoo: ga: tid.
Yooboo Yo" Da" Mang: Nhung" Yi
15«Re" mang: re" nhung" nang ri shoid nghoid rigi nyang: shoid zi ri si wa da" shid re" nya: jhang khyoo yhi: we'. Nghoidloug we' re" eig yug za: shau" doem goo" ge' re" dang: ri tam gyo: nghoid rigi hau: mang: nhung" phoo ri nang yo" khyoid yu bye. 16Nghoidloug nyang: gi re" da" dang: ri atam" gyo: nghoid rigi nyang: yo" dage" sagsi: eig yug soem" yug sho: shu" lho: nyang: jhang khyoo yhi: ge'. Houg: lang" jhoem: dang: moo bo ziyo' dakhyoo" ti"- nang yooboo foin: da" khyoo: ri eig soem" yug sagsi: bui" baja". 17Gyeing: nyang: houg: bang: da" dang: ri we' nyang: atam" gyo: nghoid rigi hau: khyoo: bain sho Hpung moo yhe: tid kyoo" we'. Lo" thang moo Hpung: mo mo, da" dang: ri we' atam" gyo: nghoid rigi hau: yug ri Mangsoo ano" su: dagyug khyo" soin: pyam ge'.
Toem' To" Khyoo: Yo' Akhang" Byid: Da" Khyoo:
18«Nanu" dangain" mo ri ngoo gyeing" gyeing" tid da" zigi Mougmyid tho' moo nanu" toung: too" ma too" gi Mougkhung: tho' moo we' toung: too" lang" wa. Myidjang: tho' moo nanu" akhang" byid: moo byid: gi Mougkhoug: tho' moo we' akhang" byid: lang" wa zi nghoid.
19«Hau: tho' moo gootu: Ngoo nanu" ri gyeing" gyeing" tid da" zi gi Mougmyid tho' moo byu eig yug soem" yug veing" go" wigi Akyu" mho' nghoid rigi Mougkhung: tho' mo nga" phoo gi nanu" mho' da" zi dangain" ri byid: wam: bye. 20Khasu" wim gari Byu eig soem" yug gi Nga" da" myeing ri nghe: khau: lho: zoeb foem: nghoid rigi houg: bang: yo" ngoo dage" nyid wa zi nghoid.»
Yooboo Anau Khyoid Byid: Da" Dei Zoo: Dayoug Da" Dangtu'
21Hau: thang: ri Petru gi Yesu jang" moo yhe: lho: «Aseing we" nga" mang: nhung" gi ngoori shoid nghoid ri kha myhoo lheing: koo: ngoo nyang: ri yooboo khyoid byid: wa lha". nyhed lheing: ju" sho' khyoid byid: ca" la"» ga: myid: yu.
22 Aseing Yesu gi «nyhed lheing: za: anghoid. Nang nyhed, xi: xi: nyhed lheing: ju" sho' yooboo ri khyoid goo" ca"» ga: wigi tid. 23«Houg: su" nghoid yoomo Moungkhoung: Mungdain: gi hid: su" nghoid. shedphyang" ri khokham dayug gi nya: dei zoo: yi da" lhid" xoem" 24pug ri sho' yu" wa shid re" myid to. Hau: lhid" xoem" pug sho' go" yu" uri ngei van, myoo" sho jhen: dab su: dagyug ri khi: nhang. 25Hau: yug gi jhen: houg: yo" xab' wa akhyoo" aboo loo: yoomo khokham" Phoo gi hau: yug yo" dage" nya: myi: nya: zoo: yhoem: zi yookhuid" dangain" oung" pyam lho: jhen: xab' wa amyeing" khyo' kaid. 26Houg: lang: hau: yug gi khokham" da" shid khoin" moo goeb pid' lho: ‹ngoori zheung: kham: byid: shi" we' jhen: gi yo" sho' xab' zi nghoid› ga: toung" pain. 27Khokham" gi nyang: ri nheig yu" khyeig yoomo nya: jhen: joem dangain" ri lhid" xoem" pug mo kho" pyam byid: lho: lhoid pyoid kaid bye.
28«Nghoidloug hau: yug gi houg: mo thu' lo" da" uri nyang: ri ngei jhen: daxoo: dab da" nya: byen cang" dage" moo" zoem" voin, su: yo" thoung" shau" goo" lang" hau: jhen: dab su: da" leingzeing: moo gya, zeing ci: lho: wigi nang ngoori byid: ca" da" jhen: myab xab' we' ga: nhain. 29Nya: byen cang" phoo gi poid thug thoug lho: ‹ngoori zheung: kham: byid: shi" we' jhen: yoo" sho xab' zi nghoid› ga: mho' tid. 30Nghoidloug we' jhen: seing: gi atam" gyoo: loo za: hau: jhen dab su: ri jhen: ayo" xab' pyam' pyam' gi thung: tei" lhung to. 31He: khyoo: ri gootu: da" moo" zoem zei byen cang" yi myang lang" nheig soo" soo" yu" yoo: yoomo nyangnu" da" khokham" jhang yhe: wigi bue" lo da" khyoo: dangain" ri kau: to" ago". 32Houg: lang" khokham" gi hau: da" moo" voin su: ri khe: yu lho: He: da" deizoo: gang:- nang ngoori toung: pain: da" uri nang xab' ca" da" jhen: dangain" ri ngoo kho" pyam byid: bye: anghoid la". 33Nang ri ngoo nheig khyeig yhangti"- nang we re" da" byen cang" ri nheig ge khyeig anghoid rhe" ga: tid. 34khokham" gi nheig gye" yu" yo: wigi hau: da" deizoo: ri we' jhen: abain xab' xab' gi thung: moo lhung to".»
35Houg: su" nghoid yoomo nanu" gi mang: nhung" nyang: cang"- dayoug da" yooboo ri dayug- re" da" nheigloem: ung: khoug: mo, gyeing" gyeing" khyoid pyam byid: go" nghoid rigi Mougkhung: tho' mo Nga" phoo we' nanu" da" yooboo ri gyeing" gyeing" khyoid pyam byid: wa zi nghoid ga: wigi jhoug" byid.
ទើបបានជ្រើសរើសហើយ៖
MATHE 18: LCL
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
Lacid Bible © Bible Society of Myanmar, 2009.
