MATHE 15
15
Phoug" Phyid" Yi Da" Jhau" Mho' Dang:
(Mar 7:1-13)
1Hau: da" uri Yerusalem mo Pharishe yo" tarha" sara: ri gi Yesu jang" moo dang: re" myid: boem. 2«Goonham mo phoug" phyid" yi jhau" to" da" khoin" thui: ri Re" cangzoo: yi gi ci: wim acang go" lha". nyangnu" gi ngoonu" thung" yo' dakhyoo" ti"- voem: azoo: shi" ri lo, acid" boem» ga: Yesu ri tid.
3Yesu gi «Mangsoo tid to" da" tarha: ri she: pyam lho: nanu" nyang: tid to" da" tarha" ri cang go" la". 4Mangsoo tid to" zigi re" myhi, re" phoo ri phau" myang: we' Khasu" wim gari ‹nya: myhi' nya: phoo ri nheing" su: hang" nghoid loug we' gyeing" nyang: shid: zi shau" wa nghoid. 5Nghoidloug we' nanu" jhoug" byid: da" zigi Byu dayug yug moo nya: myhi' nya: phoo ri bo pang thug wa da" zi daja: ja: yoo" nghoid loug we' hau: zigi Mangso da" shid re" byid: pyam bye: zi nghoid› ga: tid lang" hau: yug gi nya: myhi' phoo ri phau" myang: anoo" loo› ga: tid ago". 6‹Hid yhangti" nanu" nya: da" tarha" ri yo" cang wa shid re" Mangso da" tarha" rigi aphoug" akhyoid koid: pyam bye.› 7Akug za: te: void mo, we"- nanu" da" khyoo: Lapi: Esaia tid zigi gye eung: bye.
8‹He: da" amyu" gi nya: da" khoin" thui: yo"- Ngoori phau" myang: boem nghoid loug we'
nyang: nya: nheigloem: gi ngoo yo" ve: gang: jo.
9Khasu" wim gari Byu koid: da" tarha" ri Nga" da" tarha" yhangti" jhoug" byid: nyid yoomo
nyangnu" ngoori noku nyid da" zigi akoem: za danghoid»› ga: wigi Mangsoo tid.
Byu Ri: Aco' Ajhoid Bui" Nhang: Da" Zi
(Mar 7:14-23)
10Houg: lang" Yesu gi Byu phung: moo" ri khe: yu lho: «gyo: yu lho: si ge'. 11Nhoid' khoug: moo vang lo da" zigi Byu ri aco' ajhoid bui" nhang: zi anghoid. Nhoid' khoug: mo thu' lo da" zigi byu ri aco' a jhoid bui" nhang:» ga: tid kyo".
12Hau: thang: ri nya: cangzoo: yi tain" lo lho: «Akhid" tid da" dang: yoomo Pharishe bigi- nheigloem: gyo: no nyid zi nang se' la"» ga: re" tid kyo" boem.
13Yesu gi «Mougkhung: tho' moo nyid da" nga" phoo asho" to" da" agam bain, sho' ri phoin pyam wa zi nghoid. 14Houg: bang: yoomo myid amyoo: goo"- nyangnu" gi myo, jed mo ri khyoo: shid: da" myo, jed mo, nghoid. Myo, jed nyang: cang" khyoo: shed go" rigi eig youg duang: khuang" moo byid: gyo" zi shau" wa nghoid» ga: doem tid kyo.
15Petru gi «hau: dang: ri ngoonu" we' se gyo: sho tid kyoo" shi" we'» ga: tid.
16Yesu gi «nanu" we' akhid" ju" sho ase' gyoo: shi" go" rhe"» ga: tid. 17«Nhoid' moo vang lo zigi voem: doug khoug: moo ju" lo" lho: nghi: yhi: jang" moo khyo' pyam zi asi shi" goo" rhe" 18Nhoid' mo thu' lo da" dang: gi nheigloem: khoug: mo thu' lo zi nghoid yoomo Byu ri aco' ajhoid bui" nhang: zi nghoid. 19Ciwim gari Byu said zi su: myi: ri shoid zi:- myiyi: yuggi youg: shoo: go" zi Sube" zi khau" khyoo:- adeung amain" da" sagsi: bo kham: da" khyoo:- age da" lu wim gei sang: khyoo:- he: age da" khyoo: dangain" gi nheigloem: khoug: mo thu' lo zi nghoid. 20He: kyoo: joem gi byu ri aco' ajhoid bui" nhang: da" zi nghoid. lo, acid" loo: voem: zo: da" khyoo: gi byu ri aco' ajhoid ayo" bui" nhang:» ga: Yesu tid.
Khanan Myiyi: Myhi, Dayug Loem" jeung" Da" Khyoo:
(Mar 7:24-30)
21Akhid" Yesu gi hau: joyoo mo doem thu' lo" lho: Turu yo" Sidun voo yo" jhang damoug moo ju" lo. 22Hau: moug mo Khanan myiyi: myhi, dayug gi nya: jang" moo re" lho: «David da" nya: zoo: we"- ngoori nheig khyeig byid: we' nga" myiyi: zoo: ri yu vang wigi shen" yhen kyi" kyeig zi shau" nyid» ga: re" nyho: tid.
23Nghoidloug we' Yesu gi dakhoin" we' aphougtu". Nya: cangzoo: yi tain" yhe: lho: «Nyang: ri loo" nhang: kaid we' ngoonu" da" thang: moo cang nyho: nyid da:» ga: tid boem.
24 Aseing Yesu gi «Israela Amyu" mo byug lo" da" yang joem shid re" za: ngoori nhang: kaid zi nghoid» ga: phoug tid.
25Houg: lang" hau: da" myiyi: myhi, gi Nya: khyid: yang: moo yu: tain" re" lho: wigi goeb pid' zoo" re" «Aseing we" ngoori pang" thoug yu shi" we o"» ga: tid.
26Yesu gi «zoo: yi: da" zoo: noem ri yu lho: lakhuid" joem ri du" byid: wa zi gi adu nghoid da» ga: phoug tid.
27Myiyi: myhi, gi «Nghoid da: Aseing we"- nghoid loug we' lakhuid" joem lang" yhoem: seing: da" zoobui" mo gyo" da" voem cab' voem: thang: ge koid: zo: da:» ga: tid.
28Houg: su" wi Yesu gi «Myiyi: zoo: we" re" da" loem" jeung" khyoo: gi gyi: jo, da. Nang vho: nyid khyoo: bui" baja" ga:» nyang ri tid. Hau: ayo, mo nyang: nya: myiyi: zoo: gi ge loo" khari" bye.
Noophyoo" Shoug" Mo, Myoo" Sho Ri: Yesu Yang" Zain: Nhang:
29 Aseing Yesu gi hau: joyoo mo thu' lo" lho: Galile gyid nung" yam khyo" bouggung moo do, lo" wigi zhoug: jo. 30Byu phung: moo" gi nya: jang" moo ju" re" boem ri khyid: yoin" mo myo, amyang mo dang: ase tid mo gootu: noophyoo" aja: ja: shau" mo ri shu" ju" re" boem wigi Yesu da" khyid: yang: moo nyhed: to" ago". Yesu gi hau: noophyoo" shau" mo, ri zheung: ge loo" nhang: kaid. 31Houg: yoomo dang: ase tid mo, gi dang: se tid lo:- Gung yoin" mo, gi yangzain: lo- khyid: gyoug: mo, gi khyoo: yo" so" zi myo, amyang lo: mo, gi myo, doem myang ziyo'- Israela da" Mangsoo ri coung" byid: boem yoomo byu phung: moo" yi gi gye" yu" mau" nyid boem.
Byu Myid: Khyeing" Ri: Gam, Zho" Da" Khyoo:
(Mar 8:1-10)
32Hau: uri Yesu gi nya: cangzoo: yi ri khe: yu lho: «He: da" mung" byu yi gi ngoo yo" soem" nyid" nyang: nyid bye. Nyang: nu" zoonoem ayoo" loo: yoomo nyangnu" ri ngoo nheig khyeig. Khyoo: moo zooyoid so" shang" loo" zi ci' yoomo zoo: noem azhoo" loo: anau nhang: kaid.»
33Nya: cangzoo: yi gi «hid: myho' byuphung: moo" zo: gyi: sho' da" zoonoem gi he: dain" pyoid yoo moo ngoonu" khayo, se' yu wa» ga: zheung: tid lang.
34 Aseing Yesu gi «nanu" moo zooyho' kha: myhoo yho' yoo" go"» ga: doem myid: uri
«zooyho' nyhed yho' yo"- ngoonug we dajhi' yo"» ga: zheung: tid boem.
35Yesu gi «houg: lang" byu phung: yi ri myidjang moo zhoug: jo, nhang: ge'» ga: tid kaid. 36Zooyho' nyhed yho' yo" ngoo: ri yu lho: Jeju" ri coung" nghei lho: zooyho' yo ngoo: ri phe yu wigi Nya: cangzoo: yi we' Byu phung: yi ri zheung: doem gam byid. 37Byu dangain" mo zo: gyi: thang: ri zo: teing ajab amoin" doem cang koid: zheung" yu ri nyhed lain" ceing byeung" sho' nghoid shi. 38Hau: zooyho' zo: da" byu yi ri nghab' yu" ri yuggi cen: myid: khyeing" yug koo: su" nghoid.
39Hau: Byu phung: yi ri nhang: kaid thang: ri lhid' zhoung: wigi Magadan moug moo ju" yhe: lo.
ទើបបានជ្រើសរើសហើយ៖
MATHE 15: LCL
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
Lacid Bible © Bible Society of Myanmar, 2009.
