MATHE 10
10
Aseing Yesu Da" cangzoo: Daxe: Eig Yug
(Mar 3:13-19; Luk 6:12-16)
1 Aseing Yesu gi cangzoo: daxe: eig yug ri bain khe: yu lho: ayung" alho, da" yu ri khaid thu' pyam' wa zi we' ana: yo" ga: aja: ja: ri ge loo" nhang: wa shid re" we' yoem: vhoo" amyeing" ri byid. 2cangzoo: daxe: eig youg mo, da" myeing gi shid phyang" Petru ga: tid da" Simon yo' nya: nhung" Andre- Zebedi da" nya: zoo: Yaku yo" nya: nhung" Yohan. 3Philimon yo" Batholume- Thoma yo" kheing" khyu: zoo: su: Mathe- Alphe da" nya: zoo: Yaku yo" Thade. 4Kanan byu Simon yo" Aseing ri ab pyam' wa da" Yuda Iskarod nghoid.
cangzoo: Daxe: Eig Youg Bang: Da" Sasana Moozoo"
(Mar 6:7-13; Luk 6:12-16)
5Hau: daxe: eig youg: da" cangzoo: yi ri Aseing Yesu nhang: kaid lho: Nanu" gootu: byumyu" yi nyid da" jang" moo ayhi: goo"- Samari voo gung joem moo we' avang goo. 6Israela byumyu"- byug shang lo" da" yang joem nyid da" jang" moo shi" yhi: ge'. 7Nangnu" yhe: lho: ‹mougkhoung: mungdain: tam: too" wa zi jhang loo bye:› ein: da" lu dang: ri kho" kyoo" ge'. 8No nyid mo, ri ze gi byid: ge'. shid: jo, bye: mo ri doem dei to' loo nhang: ge'. Manggam: dab mo, ri gyeungshang: loo" nhang: ge'. Yu deizoo: joem ri we' khaid thu' pyam' byid: ge'. Nanu" gi ce: phoug" agyoo" loo:- Jeju" ri yo" kham: yu bye: yoomo aphoug" ayu loo: gam byid: ge'. 9Nanu" da" thung: i" moo ngei sheing:- gyid: joem: ri akaid to" goo". 10Gyung: khyo: shid re" thung: baid'- byi: eig khyab'- khyid: baid, lham: dung: ri aci: goo. Khasu" wim gari moo" zei: su: gi nya: aphoug" kham: zoo: moin: nyid.
11«Kha: voo kha: thoem" moo vang loo nghoid loug- hau: voo mo moin: yi" mo, ri sho: yu" ge'. Hau: voo mo athu' loo" loo" gi hau: yhoem: moo za: danyid nyid ge'. 12Yhoem: moo vang lo" ri houg: bang: yo" being" si goo" ge'. Minkaid byid: da" dang: ri tid ge'. 13Hau: yhoem: bang: moin: yi" nghoid rigi nanu" mainkaid byid: da" dang: zung: loo" baja"- amoin: yi" nghoid rigi nanu' tid da" mainkaid dang:- nanu" nya: jang" moo tau" loo baja". 14Hang" nghoid loug nanu" ri alhoem: yu- nanu" da" dang: atam" gyo: nghoid rigi nanu" da" khoo: voo: moo dab da" myidzhoo" phei" ri ko: khyo' too" khoo, ge'. 15Ngoo jhug" jhug tid ba- Tarha" dang: kho' da" bidnyid ri Sodom yo" Gomora voogoung tho' moo je kham: zoo: youg goo" wa.
Roi" Shen" Yhen Da" Zi Shoug" Wa Da" Khyoo:
(Mar 13:9-13; Luk 12:12-17)
16«Zeigne phung: moo nhang: kaid da" yang joem yhangti"- nanu" ri ngoo nhang: kaid. Houg: yoomo nanu" gi lhang: myu yhangti" nheig boo ung: gyeing: lho: pheing" kyoug" yhangti" nu" nham nyid ge'. 17Byu yi ri lhid' ge'. khasu" wim gari tarha" agyi yi da" lo, moo ab pyam' boem wigi nyangnu" da" tarha" jung moo nanu" ri shen" yhen: baid said' koid: boem wa. 18Nyangnu" da" shid moo we' tarha" nghi: zain byu yi da" shid moo we' sagsi: bui" wa shid re" nanu" gi ngoo yoomo zoug: khokham" yi da" shid khoin" moo she: vang lo" zi shau" goo" wa. 19Nanu" ri ab pyam' wa da" uri khasu" tid wa zi gi gung ayoug goo"- Khasu" phoug tu" wa da" dang: gi nanu" ri tid poin" loo wa. 20Khasu" wim gari nanu" vho: khyo" tid wa zi anghoid. Nanu" nya: pho, da" Venyi: gi nanu" da" nhoid' ri ngho" tid loo wa zi nghoid.
21«Hau: uri gi nya: mang: nya: nhung" nyang: cang" nyang:- said' pyam' wa shid re" ab pyam' go" loo wa zi nghoid. Nya: myid: nya: zoo: yi we' myhi, phoo yi ri gyikoid lho: - said' pyam' lo boem wa. 22Byu myoo" sho' mo, we' nga" myeing yoomo nanu" ri ngheing" lo boem goo" wa. Hang" nghoid loug lo" thang bidnyid ju" sho' yoem: kaid geing: teing nyid nghoid rigi hau: yug gi Mangso wigi khyoid yu zi shau" wa nghoid. 23Davoo moo nanu" ri pyi: sho: loo lang" gi goo" voo khyoo phang: loo" ge'. Israela amyu" yi da" voogung joem moo nanu" moo" abain zei: shi" ri hau: byu da" nya: zoo: gi ju" gyoo" loo wam: bye.
24«Cangzoo: gi sara: tho' moo je gyi: zi anghoid. deizoo:, phoo we' nya: yhoem: seing: tho' moo je gyi: zi anghoid. 25Cangzoo: gi sara: yhangti"- deizoo:, phoo gi nya: yhoem: seing: yhangti"- nghoid nyid rigi myid je pyoo: wa. Nyangnu" nyang: gi Bezebula ga: nghoid rigi nya: yhoem: byu yi ri hau: tho' re" je tid go" wa anghoid goo la" ga: tid.
Hang" ri Gyoug Wa
(Luk 12:2-7)
26«Houg: yoomo nyangnu" ri agyug goo"- nghoeb' to" da" zi dangain" gi shau" phang shug wa. Yhoem" to" zi dangain" we' shau" myang loo wa. 27Moug: coid' moo nanu" ri tid kyo" dang: dangain"- bidbang moo shau" tid kyoo" wa. Nanu" da" nukhyab' moo so' kyo" da" dang: gi yhoemkhung: tho' mo zeig: yoid ge'» ga: kho" kyo. 28Hau: lho: daja: gi gung shoo" ri za: te: yo" said' pyam' lho: nheigloem: Venyi: ri ayo" said' pyam' mo, ri agyug goo"- gung du: yo" Venyi: ri dalheing: dam- ngarai" mung" moo yo" shoin pyam' su: Mangsoo ri je gyoug nyid ge'. 29Jookhyang eig du: ri theing" cen, eig cu' yo"- yo" qei anghoid goo" la". Nanu" nya: pho, amyeing" abo ri hau: jookhyang dadu: we' myidjang: moo age byed gyoo. 30Nanu" da" vhuloem mo xam: dangain" ri we' Mangsoo gi nghab' too" bye. 31Houg: yoomo agyug goo"- nanu" gi jookhyang myoo" sho' tho' moo je phau" nyid mo, nghoid.
Yesu Ri: Yhen: Yu Su: Yo"- Ayhen: Yu Su:
(Luk 12:8,9)
32«Hang" nghoid loug we' Sube" shidkhoin" moo ngoori yhen: yu ri Mougkhung: tho' moo nyid nga" pho, da" shid khoin" moo ngoo we' hau: yug ri yhen: yu wa. 33Hang" nghoid loug sube" da" shidkhoin" moo ngoori ngeig pyam' lang" gi Mougkhung: tho' moo nyid da" nga" pho, shid khoin" moo we' ngoo hau: yug ri ngeig pyam' wa.
Myen Jham" Wa Khyoo: Anghoid- GyiKoid Goo" Wa shid Re" Nghoid'
(Luk 12:51-53; 14:26-27)
34«Myidjang: tho' moo ngei pyo: khyoo: byid: wa ga: ngoo re" ein: ajhoo: goo"- ngei pyo: khyoo nhang: kaid wa ein: ngoo re" zi anghoid. Gyi koid goo" wa shid re" ngoo dare. 35Nya: phoo yo" yuggi zoo:- Nya: myhi' yo" myi yi: zoo:- nya: nid yo' nya: dumoo"- nyang: cang" nyang: gang: go" loo" wa shid re" ngoo re" zi danghoid. 36Nyang: nya: da" yhoem: byu yi mo we' gyivoo bui" go" loo wa.
37«Hang" nghoid loug- ngoori jheddab da" tho' moo nya: myhi' nya: phoo ri je jhed' dab, rigi hau: yug gi ngoo yo" amoin: yi. Hang" nghoid loug- ngoori jheddab da" tho' moo nya: zoo: yi ri je jheddab nghoid rigi hau: yug gi ngoo yo" amoin: yi. 38Hang" nghoid loug- nyang: nya: da" pyang" zeing ri vu, lho: nga" thang: acang rigi hau: yug gi ngoo yo" amoin: yi. 39Nya: kangso' ri yoo" su: gi kangso' soem" wa. Ngoo yoomo nyang: nya: da" kangso' soem" loo" su: gi kangso' ri yo" yu wa zi nghoid.
Shau" Kham: Zoo: Wa Da" Akyu" Jeju" Yi
(Mar 9:41)
40«Nanu" ri lhoem: kham: yu su: gi ngoori we lhoem: kham: yu bye. Ngoori lhoem: kham: yu su: we' ngoori nhang: kaid' da" Mangsoo ri lhoem kham: yu zi nghoid bye. 41Mangso lagyo: da" myonhoo: ri tu: lho: Mangso da" lagyoo: ri lhoem: kham: yu su: gi Mangso lagyoo: yo" da" aphoug" ri bo yoo" wa. Deung main" su: da" myonhoo: ri tu: lho: deung main" su: ri kham: yu su: gi deung main" su: yo" da" aphoug" ri bo yoo" wa. 42Hang" nghoid loug- lagyoo: pho, da" myonhoo: ri tu: lho: he: da" nga" cangzoo: nge thang su: mo dayug yug ri gyid jham" dagoem shoin: jhoug nghoid ri hau: yug gi nya: aphoug" ayo" yu loo: nyid wa zi anghoid. Ein: wigi ngoo jhug" jhug tid» ga: tid.
ទើបបានជ្រើសរើសហើយ៖
MATHE 10: LCL
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
Lacid Bible © Bible Society of Myanmar, 2009.
