Hechos 7
7
U tze'ec Esteban
1U noojoch le j kiino'obo' tu káat chi'itaj ti' Esteban: ¿Jaaj wa tuláacal le ba'alo'oba'? 2Leti' túune' tu núucaj: In yaabilaj sucu'une'ex yéetel taataex, u'uyene'ex. C qui'ichquelem Jajal Diose' tu chíicbesubáa ti' c taata Abraham ca'aliquil ti' yaan tu lu'umil Mesopotamiae' ma'ili' xi'ic cajtal tu lu'umil Harane', 3ca tu ya'alaj ti': P'at a lu'um bey xan a láaktzilo'obe' ca xi'iquech ti' le lu'um quin in we'es techo'. 4Ca jóok Abraham tu lu'umil Caldeae' ca j bin cajtal tu lu'umil Harán. Cu dzo'ocol u quíimil u taatae', Abrahame' j taasa'ab tumen Jajal Dios tac ti' le lu'uma', tu'ux caja'ane'ex te'ex bejla'a'. 5Ba'ale' ma' dzaab mix jun xéet' le lu'um ti'a' mix u ti'al u t'alcuntic u yooqui'; ba'ale' a'ala'ab ti'e' yaan u dza'abal ti', cu dzo'ocol u quíimile' yaan u ti'alinta'al tumen u paalal, quex ti' le kiino' Abrahame' ma' yanac u paalali'. 6Jajal Diose' tu ya'alaj ti' xan: A ch'i'ibalo'obe' yaan u cajtalo'ob je'el bix táanxel lu'umilo'ob ti' jun p'éel lu'um ma' u ti'alo'obi', yéetel yaan u palitzilta'alo'ob bey xan yaan u loobilta'alo'ob cuatrocientos ja'abo'ob. 7Ba'ale' Jajal Diose' tu ya'alaj xan: Tene' yaan in p'is óoltic le caaj cun palitziltico'obo', cu dzo'ocole' yaan u jóokolo'ob te'elo' u ti'al u meyajtiqueno'ob ti' le cúuchila'. 8Jajal Diose' tu beetaj jun p'éel nup t'aan yéetel Abrahame' ca tu dzaj le súutkuptaj ti'o', u chíiculal le nup t'aano'. Le o'olale' le ca j síij Isaac u paale', Abrahame' tu súut kuptaj tu ocho kiinil síijic, bey xan tu beetil Isaac yéetel u paal Jacob, bey tu beetil xan Jacob yéetel u paalalo'ob máaxo'ob u doce taatatzilo'ob u caajil Israel.
9Le u paalalo'ob Jacobe' máaxo'ob c úuchben láako'obe', yanchaj ti'ob kaakas tuuculo'ob tu yo'olal José u yíidzino'ob, ca tu conajo'ob u ti'al ca bisa'ac tu lu'umil Egipto. Ba'ale' Jajal Diose' ti' yaan tu yéetel Josee', 10ca tu tocaj ti' tuláacal u yaayaj óolalo'ob. Tu dzaj na'at ti' ca tu beetaj u lúubul utzil tu táan faraón u ajwil Egipto; le ajawa' tu beetaj José jalachil yóokol u lu'umil Egipto bey xan yóokol u yotoch.
11J taal túun jun p'éel wi'ij yéetel nojoch yaayaj óolal yóokol tuláacal u lu'umil Egipto je'el bix xan yóokol Canaán; c taataob túune' mina'anchaj ba'al u jaanto'ob. 12Ba'ale' le ca tu yojéeltaj Jacob yaan trigo tu lu'umil Egiptoe' tu túuxtaj u paalalo'ob te'elo', máaxo'ob c úuchben láako'ob. Lela' u yáaxil binico'obi'. 13Le ca j bino'ob tu ca'a téene' Josee' tu ye'esubáa ti' u sucu'uno'ob. U ajawil Egiptoe' tu yojéeltaj beyo' ti' ba'ax caajil u taal José. 14Josee' tu túuxtaj túun taasbil Jacob u taata, yéetel u láaktzilo'ob, tuláacalo'obe' setentaicinco'ob. 15Bey úuchic u bin Jacob cajtal tu lu'umil Egipto, tu'ux quíimij, tu'ux quíim xan c úuchben láako'ob. 16Dzo'oc u máan kiine' ca j bisa'ab u baaquelo'ob tac Siquem, tu'ux j mu'uc ti' le mucnal tu manaj Abraham ti' u paalalo'ob Hamor te j Siquemo'.
17Le ca j náadz u kiinil u dzo'ocpajal ba'ax u ya'almaj Jajal Dios ti' Abrahame', u caajil Israele' nojochchaji ca jach ya'abji'ob Egipto. 18J chu'unpaj u beetic u jalachil Egipto jun túul ajaw ma' u kaj óol Josei'. 19Le ajawa' tu tu'utusaj c caajal, tu loobiltaj le c úuchben láako'obo', tu beetaj xan u p'atic u paalalo'ob táant u síijilo'obo' u ti'al ca quíimico'ob. 20Ti' le kiino'obo' síij Moisés. Lela' jun túul chaanpal lúub utzil tu táan Jajal Dios. Cananta'ab túun tumen u taataob tu yotocho'obe' óox p'éel winalo'ob. 21Le ca yanchaj u p'atico'obe' u x ch'upul paal u ajawil Egiptoe' tu cha'aj u canant bey u paale'. 22Le o'olale' j ca'ansa'ab Moisés ti' tuláacal le ba'ax u yojel le egiptoilo'obo', nojochchaj u páajtalil ti' tuláacal ba'ax cu ya'alic yéetel ba'ax cu beetic.
23Le ca yanchaj cuarenta ja'abo'ob ti' Moisese' leti'e' tu yóoltaj u xíimbalt u caajal, lela' leti' le israelitaobo'. 24Te'elo' tu yilaj jun túul Egiptoil táan u loobiltic jun túul u yéet caajal Moises. U ti'al u toquic yéetel u ti'al u sutic u jeel loob beeta'ab ti' u yéet caajalo' tu quíimsaj le egiptoilo'. 25Tumen tu tucultaje' le israelitaob, u yéet caajalo'obe', je'el u na'atico'ob bin u ca'aj jáalkabtbilo'ob tumen Jajal Dios yéetel u kab leti'e', ba'ale' ma' tu na'atajo'obi'. 26Tu jeel kiine' Moisese' tu yilaj ca'a túul israelitaob táan u ba'atelo'ob; tu yóoltaj túun u jatzo'obe' ca tu ya'alaj ti'ob: Te'exe' sucu'untzile'ex, ¿ba'axten ca loobilticaba'ex ta baatzile'ex? 27Le máax túun loobiltic u yéet meyajo' tu léemch'intaj Moisese' ca tu ya'alaj ti': ¿Máax dzáech u ti'al ca a beet a nojochil t-óokol yéetel u ti'al ca p'is óolto'on? 28¿A káat wa xan a quiimsen je'el bix ta quiimsilac le egiptoil jo'oljiaco'? 29Moisese' le ca tu yu'ubaj lela' j púudze' ca j bin tu lu'umil Madián, tu'ux j cuxlaj bey jun túul táanxel lu'umile'. Ti' yanchaj xan ca'a túul u paalali'.
30Le ca j máan cuarenta ja'abo'obe', jun túul ángel tu chíicbesubáa ti' Moisés ichil u káakil jun cúul che' táan u yelel, te xtocoy lu'umo', naadz ti' u pu'uquil Sinaí. 31Moisese' ja'ak u yóol tu yo'olal le ba'ax tu yilajo', le ca tu nadzubáa u ti'al u yil jach ma'alo'obe' tu yu'ubaj u t'aan Yuumtzil táan u ya'alic: 32Teen U Junab Jajal Dios a úuchben taataex, u Jajal Dios Abraham, Isaac yéetel Jacob. Moisés túune' jo'op' u quiquilanquil tu yo'olal u sajaquilil. Ma' yanchaj u yóol u ti'al u pactiqui', 33Yuumtzil tu ya'alaj ti': Lukes a xanab ta wooc, tumen quili'ich lu'um le cúuchil tu'ux yanecho'. 34Tene' dzo'oc in wilic u mukyaj in caajal tu lu'umil Egipto, dzo'oc in wu'uyic u yáacamo'ob dzo'oc túun in wéemel u ti'al in toco'ob. Co'oten túun; bin in ca'aj in túuxtech Egipto.
35Le Moisés p'ecta'ab yéetel a'ala'ab ti': ¿Máax dzáech u ti'al a beetic a nojochil yéetel a p'is óolile'? leti' túuxta'ab tumen Jajal Dios je'el bix jun túul j nojoch yéetel jun túul j tocsaj, tu yo'olal le ángel j chíicpaj ti' te jun cúul che'o'. 36Moisés máax jóokes le c úuchben láako'ob tu lu'umil Egiptoo' leti' máax beet xan jakbe'en ba'alo'ob yéetel chíiculalo'ob te j lu'umo', te Chac Ka'anabo', yéetel te x tocoy lu'umo' tu yáam cuarenta ja'abo'ob. 37Moisés máax a'al xan ti' le israelitaobo': Jajal Diose' bíin u ca'aj u túuxt jun túul aj bóobat je'el bix tene' jóokesa'an ti' a sucu'une'ex. U'uye'ex u t'aan. 38Moisés xan máax anji ichil le máaco'ob te x tocoy lu'umo', bey xan yéetel le ángel j t'aanaj tu yéetel tu pu'uqui Sinaio', bey xan yéetel c úuchben taataobo'; leti' xan máax kam u t'aanilo'ob cuxtal u ti'al u dzáa ti' to'on. 39Ba'ale' le c úuchben taataobo' ma' tu yóoltajo'ob u yu'ubo'ob u t'aani', ba'ax tu beetajo'obe' tu cúulpachcunto'obe' ca tu yóoltajo'ob suut Egipto. 40Ca tu ya'alajo'ob túun ti' Aarón: C káat ca a beet ti' to'on kuo'ob ca xi'ico'ob táanil ti' to'on, tumen ma' c ojel ba'ax úuch ti' le Moisés tu jóokesajo'on tu lu'umil Egipto'. 41Tu ch'a'ajo'ob oroe' ca tu beetajo'ob jun túul wacax u ti'al u kulto'ob, ca tu quiimsajo'ob ba'alche'o'ob u ti'al u sio'ob ti', ca qui'imacchaj u yóolo'ob tu yéetel ba'ax tu beetajo'ob yéetel u kabo'ob. 42Jajal Dios túune' tu tzeljubáa ti'ob, ca tu cha'aj ti'ob u kultico'ob u eekilo'ob ca'an. Bey dzíiba'anil tumen le aj bóobato'obo':
Te'ex, u cajnáalile'ex Israel,
¿ta quiimsaje'ex wa ba'alche'ob u ti'al a síex ti' teen ca'aliquil ti'ane'ex cuarenta ja'abo'ob te x tocoy lu'umo?
43Ma' beyi',
ba'ale' ta bisaje'ex u najil dios Moloc,
yéetel u eekil dios Renfán,
kuo'ob ta beetaje'ex yéetel a kabe'ex
u ti'al a kultique'ex.
Le o'olale' yaan in jóokesique'ex ti' a lu'ume'ex u ti'al a in túuxtique'ex paachil ti' Babilonia.
44Te x tocoy lu'umo', c úuchben taataobe' yaan ca'ach ti'ob u quili'ich najil le a'almaj t'aano'. Le naja' j meenta'ab je'el bix tu ya'aljilac Jajal Dios ti' Moisés, le ca tu ya'alaj ti' ca u beet je'el bix e'esabic ti'o'. 45Le c úuchben taataobo' tu kamajo'ob le quili'ich naja' ca tu taasajo'ob tu yéetelo'ob le ca j taalo'ob yéetel Josue uti'al u ch'alcoób yéetel ba'atel u lu'um le ulak cajo'obo' máaxo'ob jóokesa'abo'ob tumen Jajal Dios u ti'al ca dza'abac le lu'um ti'obo'. Bey p'áatic tac tu kiinilo'ob David. 46Ajaw Davide' lúub utzil tu táan Jajal Diose' ca tu yóoltaj u beet jun p'éel naj u ti'al u Jajal Dios Jacob; 47ba'ale' Salomón máax beet u najil Jajal Dios. 48Quex tumen le Ca'anil Jajal Dioso' ma' tu yantal ti' najo'ob beeta'ab tumen wíinico'ob. Je'el bix tu ya'alaj le aj bóobato': 49Le ca'ano' u cúuchil tu'ux quin cutal, le lu'umo' u cúuchil tu'ux quin t'alcuntic in wooc. ¿Bix le naj ca bin a beete'ex teno'? cu ya'alic Yuumtzil, wa ¿máacalmáac le cúuchil tu'ux cu páajtal in je'elelo'? 50¿Ma' wa in kab beet tuláacal le ba'alo'oba'? 51Ba'ale' te'exe', mantadz chich a pucsi'ikale'ex; a xiquine'ex bey xan a pucsi'ikale'exo' a kalmaje'ex ti' u t'aan Jajal Dios. Mantadz yane'ex tu contra Quili'ich Pixan. Queete'ex yéetel le a úuchben taataexo'. 52¿Máacalmáac ti' le aj bóobato'ob ma' j ch'a'apachta'ab tumen le a úuchben taataexo'? Leti'obe' tu quiimsajo'ob le máaxo'ob tu ya'alajo'ob bíin taalac le máax quili'icho', bejela'a' dzo'oc u taale', te'exe' j kuch a wóole'ex a kube'ex ti' quíimil, bey ta quiimsilaque'exo'. 53Te'ex ta kamaje'ex le a'almaj t'aan dzaab te'ex tumen le ángelo'obo', ma' ta dzo'ocbesique'ex.
Bix quíimic esteban
54Leti'obe' le ca tu yu'ubajo'ob le ba'alo'oba', j chu'up u pucsi'ikalo'ob yéetel kuuxil ca jo'op' u jach' cojo'ob tu contra Esteban. 55Ba'ale' Estebane', chuup yéetel Quili'ich Pixane', j paacatnaj ca'ane' ca tu yilaj u qui'ichquelemil Jajal Dios, ca tu yilaj xan Jesús wa'alacbal tu x no'oj Yuum Jajal Dios. 56Ca tu ya'alaj túun: Ile'ex táan in wilic je'ekab le ca'ano', yéetel u Paal máac wa'alacbal tu x no'oj Jajal Dios. 57Ba'ale' leti'obe' tu macaj u xiquino'obe', jo'op' u ka'am awato'obe' ca tu láaj puljuba'ob tu yóokol Estebán. 58Tu jóokesajo'ob paach caaje' ca tu muluxtuuntajo'ob; le tuusil máaco'ob tu beeto'ob lela' tu p'atajo'ob u nooko'ob u ti'al ca cananta'ac tumen jun túul táanquelem máac u kaaba'e' Saulo. 59Ca'aliquil táan u ch'i'inch'inico'obe', Estebane' payalchi'inaj táan u ya'alic: Yuumtzil Jesús kam in pixan. 60Cu dzo'ocole' xolaje' ca tu ka'am a'alaj: Yuumtzil ma' a dzáic ti'ob u cucho'ob le kebana'. Cu dzo'ocol u ya'alic lela' j quíimij.
ទើបបានជ្រើសរើសហើយ៖
Hechos 7: YUA04
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
Maya de YucatánTumben Nupt'an NT © Sociedad Bíblica de Mexico, 2004.
