Hechos 14
14
Pablo yéetel Beranbé j bino'ob tu caajil Iconio
1tu caajil Iconioe' Pablo yéetel Bernabee' j ooco'ob tu sinagoga le judiyo'obo'. Tumen j t'aanajo'ob yéetel páajtalile', ya'ab máax ocsaj óolaljo'ob, ichil le judiyo'obo' bey xan ichil le máaxo'ob ma' judiyo'obo'. 2Ba'ale' le judiyo'obo' ma' ocsaj óolnajo'obo' tu líiksajo'ob u yóol le máaxo'ob ma' judiyo'obo' ca tu beetajo'ob u tuuculo'ob kaas tu yóokol le sucu'uno'obo'. 3Tu yo'olal lela' j p'áato'ob ya'abcach kiino'ob te'elo' ca j t'aanajo'ob yéetel páajtalil, u dzaamajo'ob u alab óolalo'ob ti' Yuumtzil. Yuumtzile' cu béeycuntic le ba'ax cu ya'alico'ob tu yo'olal u yaacunaj Jajal Dios iquil u dzáic páajtalil ti'ob u ti'al u beetico'ob jakbe'en ba'alo'ob yéetel chíiculalo'ob. 4Ba'ale' u máaquilo'ob le caajo' u jatzmajuba'ob, dze'edzeco'obe' ti'ano'ob yéetel le judíobo', u láako'obe' yéetel le j canbalo'obo'. 5Le judiyo'obo' tu much'juba'ob yéetel le ma' judiyo'obo' ca j t'aanajo'ob yéetel u jalachilo'ob le caajo' u ti'al u po'opoch'ico'ob yéetel u muluxtuuntico'ob le j canbalo'obo'. 6Ba'ale' Pablo yéetel Bernabe' tu yojéeltajo'obe' caj púudzo'ob tu caajilo'ob Listra yéetel Derbe, lelo'oba' ti' yano'ob tu lu'umil Licaoniae' bey ti' le lu'umo'ob yaan tu bakpacho', 7tu'ux tu tze'ectajo'ob xan le ma'alob péectzilo'.
Cu muluxtuunta'al Pablo tu caajil Listra
8Tu caajil Listrae' yaan jun túul máac ma' tu páajtal u xíimbal. Culucbal te'elo' tumen j móoch ooc sijnalil, mix jun téen xíimbalnac. 9Le máaca' táan u yu'ubic ba'ax cu ya'alic Pablo, Pabloe' tu pactaje' ca tu yilaj yaan ocsaj óolal u ti'al u yutztal. 10Ca tu ka'am a'alaj ti': Wa'alen. Le máaco' síit' wa'alaje' ca jo'op' u xíimbal. 11Le máaco'obo', le ca tu yilajo'ob ba'ax tu beetaj Pabloe', jo'op' u yawato'ob ti' licoaniailil táan u ya'alico'ob: ¡Kuob chica'ano'ob ti' máaco'ob dzo'oc u yéemelo'ob ti' to'on! 12Táan u ya'alico'obe' Bernabé dios Júpiter yéetel Pabloe' dios Mercurio, tumen leti' máax cu t'aan. 13U yuum j kiinil u kulnajil Júpiter, le yaan jool caajo', tu taasaj wacaxo'ob yéetel julbil nicte'ob; leti' yéetel le máaco'obo' tu yóoltajo'ob u kulto'ob Pablo yéetel Bernabé táan u quiimsico'ob le wacaxo'ob bey quíimsbil siibalo'obe' óolalo'obe'.
14Ba'ale' le j canbalo'ob le ca tu yilajo'ob lela', tu jatajo'ob u nooko'obe' ca j ooco'ob ichil le máaco'obo' táan u yaawtico'ob: 15Máaque'ex, ¿ba'ax teen ca beetique'ex lela'? To'one' máaco'on je'el bix te'exe', j taalo'on u ti'al ca c a'al te'exe' ca a p'ate'ex le ba'alo'ob mix ba'al u biilala' yéetel ca xi'ique'ex tu paach le cuxa'an Junab Jajal Dios tu beetaj le ca'ano', le lu'uma', le ka'anabo' yéetel tuláacal le ba'alo'ob yano'obo'. 16Ti' le úuchben kiino'obo' tu p'ataj u xíimbal máaco'ob je'el bix tu yóoltajo'obe', 17quex mantadz táan u ye'esic ti'ob máax leti', tu yo'olal le utz cu beetic ti'obo'. Leti' túuxtic to'on le cháaco' yéetel le ma'alob ichanquilo', yéetel cu dzáic to'on tuláacal ba'ax kabéet to'on ti' u ti'al c jaant yéetel u ti'al u qui'imacchajal c óol.
18Ba'ale' quex tu ya'alajo'ob le ba'alo'oba', jach talam tu luksilaco'ob tu tuucul le máaco'obo' u quiimsico'ob le wacaxo'ob u ti'al u kulta'alo'obo'.
19J kucho'ob túun dze'edzec judíob j luko'ob Antioquía yéetel Iconioe', tu yocsajo'ob tu tuucul le máaco'obo', ca tu muluxtuunto'ob Pablo. Le ca tu tucultajo'ob dzo'oc u quiimsico'obe' tu jíiltajo'obe' ca tu bisajo'ob paach caaj. 20Ba'ale' le ca j much'laj le j ocsaj óolo'ob tu ba'pachtajo'ob Pabloe', leti'e' ca j líike' ca j ooc tu ca'a téen ich caaj; tu jeel kiine' j bin yéetel Bernabé tac Derbe.
21Cu dzo'ocol u tze'ectico'ob le ma'alob péectzil tu caajil Derbee', tu'ux yanji ya'abcach j ocsaj óolo'obe', suunajo'ob Listra, Iconio yéetel Antioquía. 22Ti' le cúuchilo'oba' tu cux óoltaj le j ocsajóolo'obo' ca tu kubentajo'ob ti'obe' ca p'áataco'ob ti' le ocsaj óolo', ca tu ya'alajo'ob ti'obe' u ti'al ca ococ máac tu ajawil Jajal Diose' kabéet u máan ti' ya'abcach mukyajilo'ob. 23tu dzajo'ob xan anciano'ob ti' le iglesiaobo'. Cu dzo'ocol u payalchi'ob yéetel u su'ukino'obe' tu kubentajo'ob ti' le Yuumtzil dzo'oc u yocsaj óoltico'obo'.
Pablo yéetel Bernabee' cu suuto'ob Antioquía tu lu'umil Siria
24Cu dzo'ocole' j máano'ob tu lu'umil Pisidia ca j kucho'ob tu lu'umil Panfilia. 25Tu tze'ectajo'ob le ma'alob péectzil tu caajil Pergeo', caj bino'ob tac Atalia. 26Te'elo' j ooco'ob ti' jun p'éel cheeme' ca j bino'ob tac Antioquía, leti' le caaj tu'ux kubeenta'abo'ob ti' u yaacunaj Jajal Dioso' u ti'al u beetico'ob le meyaj táant u dzo'ocsico'obo'. 27Le ca j kucho'ob Antioquíae' tu much'quintajo'ob le iglesiao' ca tu tzicbaltajo'ob tuláacal le ba'alo'ob tu beetaj Jajal Dios tu yéetelo'obo', yéetel bix tu je'ejilac jool naj Yuumtzil u ti'al le máaxo'ob ma'judíobo' u ti'al ca páatac u yocsaj óolo'ob tac leti'ob. 28Pablo yéetel Bernabee' j p'áato'ob ya'abcach kiino'ob te'elo' yéetel le j ocsaj óolo'obo'.
ទើបបានជ្រើសរើសហើយ៖
Hechos 14: YUA04
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
Maya de YucatánTumben Nupt'an NT © Sociedad Bíblica de Mexico, 2004.
