Hechos 10
10
Pedro yéetel Cornelio
1Tu caajil Cesareae' yaan ca'ach jun túul máaque' u kaaba'e' Cornelio, leti'e' u náacom jun múuch' aj ba'atelo'ob cu kaaba'inta'al le Italianoo'. 2Lela' jun túul máac cu kultic Jajal Dios jun múuch' yéetel tuláacal u yotoch yéetel cu tziquic xan. Bey xan cu dzáic ya'ab taakin u ti'al u yáanta'al le judíobo', yéetel mantadz cu payalchi' ti' Jajal Dios. 3Jun p'éel kiine', míin las tres u binbal kiine', j e'esa'ab jun p'éel chíiculal ti': tu yilaj u yocol jun túul u ángel Jajal Dios tac tu'ux yano', ca j a'ala'ab ti' ¡Cornelio!
4Cornelioe' j p'áat táan u pactic le ángel yéetel nojoch sajaquil, ca tu káat chi'itaj ti': ¿Ba'axi' Yuumtzil? Le ángel túuno' tu ya'alaj ti': Jajal Diose' dzo'oc u kamic a payalchi'ob bey xan ba'ax dzo'oc a beetic u ti'al a wáantic le óotzilo'obo'. 5Túuxt máaco'ob tac tu caajil Jope u ti'al u t'anic Simón, u láak u kaaba'e' Pedro. 6Lela' kucha'an tu yotoch u láak máac, Simón u kaaba' xan, jun túul máac cu meyajtic kéewel, cajacbal tu jáal ka'anab. Leti' máax cun a'alic teech ba'ax unaj a beetic.
7Le ca j bin le ángel t'aanaj yéetelo', Cornelioe' tu t'anaj ca'a túul u palitzilo'ob, bey xan ichil le máaxo'ob meyajtico' jun túul aj ba'atel yaan u sajaquil Jajal Dios ti'. 8Tu tzicbaltaj tuláacal ti'obe' ca tu túuxtajo'ob Jope.
9Tu jeel kiine' ca'aliquil táan u bino'ob te bejo' yéetel dzo'oc u naadz yanilo'ob tu caajil Jope, Pedroe' j na'ac tu yóokol le najo' óoli' chúumuc kiin u ti'al u payalchi'. 10Jach wi'ijchaje' ca tu yóoltaj janal; ba'ale' ca'aliquil táan u nu'ucta'al le janalo' tu yilaj jun p'éel chíiculal. 11Tu yilaj u je'epajal le ca'ano' yéetel táan u yéemel jun p'éel ba'al bey jun p'éel nojoch nooke', kaxa'an tu can ti'itzil. 12Ti' le nooko' yaan jejeláas ba'alche'ob can dzíit u yooco'ob, yaan xan caano'ob yéetel ch'íich'o'obi'. 13Tu yu'ubaj túun jun p'éel t'aan táan u ya'alic ti': Líiken, Pedro, quiimsajnen ca janaquech.
14Ba'ale' Pedroe' tu núucaj: Ma' Yuumtzil; mix jun téen in jaant ba'al ma' utz u jaanta'ali' mix wa ba'ax ma' kambe'eni'.
15Le t'aano' tu ya'alaj túun ti' tu ca'atéen: Le ba'ax ma'alob quinta'an tumen Jajal Diose' ma' a wa'alic, ma' utzi'. 16Lela' j úuch óox téen, cu dzo'ocole' le nooko'j na'acsa'ab j ca'an tu ca'a téen. 17Ca'aliquil Pedro táan u sen tucultic ba'ax u káat ya'al le ba'ax tu yilajo', j kucho'ob jool naj le máaco'ob túuxta'abo'ob tumen Cornelio', táan u káat péectziltico'ob tu'ux yaan u yotoch Simón. 18Le ca j kucho'obe' tu káat péectzilto'ob wa ti' kucha'an jun túul máac Simón u kaaba', máax cu ya'ala'al xan Pedro ti'. 19Tumen Pedroe' láili' táan u tucultic le ba'ax tu yilajo', j a'ala'ab ti' tumen j quili'ich Pixan: Ile, óox túul máaco'ob caxtiquech. 20Líiken, éemen ca xi'iquech yéetelo'ob. Ma' u ca'a p'éeltal a wóolal tumen teen túuxto'ob.
21Pedroe' j éem túun tac tu'ux yaan le máaco'ob túuxta'ano'ob tumen Cornelio' ca tu ya'alaj ti'ob: Teen le máax ca caxtique'exo'. ¿Ba'ax taale'ex a beete'ex?
22Leti'obe' tu núucajo'ob: Túuxta'abo'on tumen náacom Cornelio, jun túul máac toj u cuxtal, yéetel yaan u sajaquil Jajal Dios ti', máax yaabilta'an xan tumen tuláacal le judiyo'obo'. Jun túul u ángel Yuum Jajal Dios a'al ti' unaj u túuxtic t'anbilech u ti'al ca xi'iquech tu yotoch, u ti'al ca u yu'ub ba'ax yaan a wa'al ti'.
23Pedroe' tu beetaj u yocolo'obe' ca j p'áto'ob tu yicnal ti' le áakabo'. Tu jeel kiine' Pedroe' j bin yéetelo'ob, j bin xan yéetelo'obe' dze'edzec ti' le sucu'uno'ob cajacbalo'ob Jopeo'.
24Tu jeel kiine' j kucho'ob Cesarea, tu'ux táan u pa'atalo'ob tumen Cornelio yéetel jun múuch' u láaktzilo'ob bey xan le máaxo'ob jach utz u biscuba'ob tu yéetele', máaxo'ob j t'a'ano'ob tumen Cornelio. 25Le ca j kuch Pedro te j najo', Cornelioe' jóok u kame' caj xolaj tu táan u ti'al u kulte. 26Ba'ale' líiksa'ab tumen Pedroe' ca j a'ala'ab ti': Wa'alen, tumen teen xane' wíiniquen je'el bix techo'.
27Ca'aliquil táan u t'aan yéetele' j ooque' ca tu yilaj ya'ab máaco'ob much'ucbalo'ob. 28Pedro túune' tu ya'alaj ti'ob: Te'exe' a wojele'ex wet'a'an ti' jun túul judío tu yo'olal u yocsaj óolale' u bisicubáa yéetel jun túul táanxel lu'umil wa u yocol tu yotoch. Ba'ale' Jajal Diose' dzo'oc u ca'ansic ti' tene' ma' unaj in wa'alic ti' mix máac kaas yanil wa mix kambe'eni'. 29Le o'olale' le ca j t'a'anene' mix ba'al tin wa'alaj, ca j taalen. In káat túun in wojéelte' ba'ax o'olal ta t'anjene'ex.
30Cornelio túune' tu núucaj: Míin can p'éel kiino'ob bejela'e', míin walquila', ti' yanen way tin wotoche' táan in su'ukin yéetel táan in payalchi', las tres u binbal u t'úubul kiine' ca j chíicpaj teen jun túul xiib u búuquintmaj jun p'éel nook cu léembal. 31Ca tu ya'alaj teen: Cornelio, Jajal Diose' dzo'oc u yu'ubic a payalchi' yéetel dzo'oc u ka'ajsic ba'ax ca beetic u ti'al a wáantic óotzilo'ob. 32Túuxt túun ch'a'abil tu caajil Jope jun túul Simón, máax xan Pedro u kaaba'. Kucha'an tu yotoch Simón, lela' jun túul j bon kéewel, caja'an tu jáal ka'anab. Le quéen taalaque' yaan u t'aan ta wéetel. 33Bey túuno' tin túuxtaj cha'abilech tu séebalquil, ta beetaj utz a taal. Bejla'e' tuláacalo'on ti'ano'on tu táan Jajal Diose', c káat u'uy tuláacal le ba'ax u ya'almaj teech Yuumtzil ca a wa'al to'ono'.
U tze'ec Pedro tu yotoch Cornelio
34Pedroe' j chu'unpaj u t'aane' ca tu ya'alaj: Bejla'e' quin na'atique' Jajal Diose' mix máac jela'an u pactic, 35ba'ale' ti' je'el ba'alac caajile' cu kamic le máax tziquique' yéetel cu beetic ba'ax utzo'. 36Jajal Diose' tu t'anaj u ch'i'ibal Israel, táan u tze'ectic u ma'alob péectzilil jéedzel tu yo'olal Jesucrito, lela' u Yuumtzil tuláacal. 37Te'exe' ma'alob a wojelile'ex ba'ax úuch ti' tuláacal u lu'umil le judíobo', lela' j cáaj Galilea, cu dzo'ocol u tze'ec yéetel u dzáic ocja' Juan. 38A wojele'ex bix Jajal Diose' tu dzaj u páajtalil Quili'ich Pixan ti' Jesús Nazaretil, bix máanic xan leti' táan u beetic utz yéetel táan u dzáic toj óolal ti' tuláacal le máaxo'ob cu mukyajo'ob yáanal u páajtalil kaasil ba'alo'. Lela' tu beetaje' tumen Jajal Diose' ti' yaan tu yéetele'. 39To'one' jajcunajo'on ti' tuláacal ba'axo'ob tu beetaj Jesuso', ma' chéen tu lu'umil Judeai' ba'ale' tac tu caajil Jerusalén. Cu dzo'ocole' ca tu quiimsajo'ob úuchic u sinico'ob ti' jun p'éel cruz. 40Ba'ale' Jajal Diose' tu ca'a púut cuxquintaj tu yóox p'éel kiine' ca tu beetaj u chíicpajal ti' to'on. 41Ma' j chíicpaj ti' tuláacal máaqui', ba'ale' ti' to'on máaxo'on yéeya'ano'on tumen Jajal Dios tu yáax chuun u ti'al jaacunaj. To'one' jaano'on, ukulnajo'on xan tu yéetel cu dzo'ocol u ca'a púut cuxtal ichil le quimeno'obo'. 42Ca tu ya'alaj to'on ca tze'ecnaco'on ti' le máaco'obo'; yéetel u ti'al ca c a'ale' Jajal Diose' dzo'oc u dzáic Jesús je'el bix jun túul Aj p'is óol tu yóokol cuxa'ano'ob yéetel quimeno'ob. 43Bey xan, ma'ili' úuchuque', tuláacal le aj bóobato'obo' j t'aanajo'ob tu yo'olal Jesús, táan u ya'alico'obe' tuláacal le máaxo'ob cu yocsic u yóolo'ob ti'e' cu kamico'ob sa'atsaj si'ipil tu kaaba'.
Cu kamico'ob Quili'ich Pixan le máaxo'ob ma' Judi'obo'
44Láili' táan u t'aan Pedroe', ca j taal Quili'ich Pixan tu yóokol tuláacal le máaxo'ob u'uyic u tze'eco'. 45Le ocsaj óolo'ob judíob j taalo'ob yéetel Pedroe' ja'ak u yóolo'ob tumen dza'ab Quili'ich Pixan tac ti' le máaxo'ob ma' Judíobo'. 46Tumen tu yu'ubajo'ob u t'aano'ob ichil jejeláas t'ano'ob yéetel u qui'iqui' t'antico'ob Jajal Dios. 47Pedro túune' tu ya'alaj ti'ob: ¿Je'el wa túun u páajtal u we'et'el u yocja' le máaxo'ob dzo'oc u kamico'ob Quili'ich Pixan jeel bixto'one'?
48Ca tu túuxtaj ca ocja'anaco'ob tu kaaba' Jesucristo. Cu dzo'ocole' ca tu káat óoltajo'ob ti' Pedro ca p'áatac tu yicnalo'ob u láak dze'edzec kiino'ob.
ទើបបានជ្រើសរើសហើយ៖
Hechos 10: YUA04
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
Maya de YucatánTumben Nupt'an NT © Sociedad Bíblica de Mexico, 2004.
