Marcu 3
3
Omlu cu Mãna Uscatã
1Deapoea elu intrã tu sinagogã, sh-aclo eara un om cu mãna uscatã. 2Niscãntsã lu vigljea Isusul macã va vindica dzua di Sãmbãtã, sh-deapoea s-lu vãrghea. 3Elu lji-dzãsi a omlui cu mãna uscatã: “Scoalã-ti namisa a tutulor!” 4Deapoea lã dzãsi a lor: “Tsi easti ndreptu dzua di Sãmbãtã, s-fats ghini icã s-fats arãu, s-ascachi un suflit icã su-vatsãnji?” Ma elji tãtsea. 5Atumtsea elu, cum vidzu anvãrliga cu inati, shi nvirinat cã ininjili a lor eara nchitriti, lji dzãsi a omlui: “Tindi mãna!” Elu u teasi sh-mãna a lui s-featsi ca alanta sãnãtoasã. 6Sh-Fariseilji ishirã afoarã shi trãoarã apofasirã cu Herodianjilji, cum s-lu-vatãmã.
Isusul Aleapsi Di Doisprãdzatsilji
7Isusul cu ucenitsilji a lui s-dusi cãtrã amari sh-unã multsãmi mari di oaminji dit Galilea sh-dit Iudea lu-urmã, 8sh-dit Ierusalim, sh-dit Idumea, sh-di napãrti di Iordan, tutashã unã multsãmi mari di anvãrliga di Tiro sh-di Sidon. Cãndu avdzãrã atseali lucri mãri tsi elu fãtsea, vinirã la nãsu. 9Sh-elu lã dzãsi a ucenitsilor a lui s-aibã totãna etimu unã varcã, tsi lumea s-nu-u pindzea. 10Elu avea vindicatã multsã oaminji, tuts tsi avea lãngoari s-aduna anvãrliga di nãsu s-bãga mãna pri nãsu. 11Shi duhurili atseali nicuratili cãndu lu videa cãdea pri dintsi nãintea a lui sh-aurla dzãcãnda: “Tini eshti Hiljiu al Dumnidzãu!” 12Ma elu lji vãrghea tra s-nu aspunea cai eara elu.
13Deapoea elu s-alinã pri munti, sh-acljimã aproapi di nãsu atselji tsi vrea. Sh-elji vinirã la nãsu. 14Sh-elu aleapsi doisprãdzatsi (tsi s-acljima apostulji), s-hibã cu nãsu shi s-lji pitritsea s-predica, 15shi s-avea puteari s-vindicã dratsilji. 16Sh-ia doisprãdzatsilji: Simonlu, a cui lji bãgã numa Petru, 17Iacovul, hiljiu al Zebedeu, sh-Ioani, fratili al Iacov, tsi lã bãgã numa Boanerges, tsi va s-dzãcã hiljilji a bubunidzariljei. 18Andrea, Filipu, Bartolomeu, Mateu, Toma, Iacovu, hiljiu al Alfeu, Tadeu, shi Simon Cananeanlu, 19sh-Iuda Iscariotul, tsi ma nãpoi lu vindu.
Blãstimarea a Fariseilor
20Apoea intrarã la unã casã. Shi s-adunã unã multsãmi mari cãt nitsi pãni nu putea s-mãca. 21Sh-cãndu soia a lui lo di hãbari, s-dusi su-ljea, cã dzãtsea: “Nu easti ghini di minti.” 22Iarã scriblji tsi avea dipunatã dit Ieruzalem, dzãtsea: “Elu ari Beelzebul sh-lji aĝuneashti dratsilji cu printsul a dratsilor.” 23Ma elu li-acljimã aproapi di nãsu shi lã grãi cu parabolã: “Cum poati Satanlu s-aĝuneascã Satanlu? 24Macã unã amirãrilji di nãuntru easti mpãrtsãtã, atsea amirãrilji nu poati s-bãneadzã. 25Macã unã casã di nãuntru sã-mpartã, atsea casã nu poati s-bãneadzã. 26Ashã, macã Satanlu si-scoalã contra a lui idyiul, shi easti mpãrtsãt, nu poati s-tsãnã, ma s-bitiseashti icã cheari. 27Vãrã nu-poati s-intrã tu casa a unui om vãrtos shi s-lji-u arãcheascã avearea a lui, ni lãgatã ma nãinti omlu atsel vãrtoslu, atumtsea poati s-lji-u afurã casa. 28Dealihea ma vã dzãc cã a oaminjilor va s-lã hibã ljirtati itsi amãrtii shi cathi blãstem tsi va s-dzãcã. 29Ma ti atsel tsi va blastimã cãtrã Duhlui Sãmtu nu va aibã ljirtari di totãna. Elu easti amãrtios ti eta tutã.” 30Isusul li dzãsi aesti cã elji dzãtsea: “Elu ari un duh nicurat!”
Fumealjea al Isus
31Tu oara atsea vinirã fratslji a lui sh-muma, shi stãnda nafoarã, pitricurã sh-lji grirã. 32Multsãmea eara apunat anvãrliga di nãsu, sh-lji dzãsirã: “Ia, muma sh-fratslji a tãlji, suntu nafoarã sh-ma ti caftã.” 33Ma elu apãndisi a lor: “Cai easti muma-a mea icã fratslji a melji?” 34Daepoea, mutrinda anvãrliga di atselji tsi shidea ningã nãsu, dzãsi: “Ia, muma-a mea sh-fratslji-a melji! 35Cã, caitsido tsi fatsi vrearea al Dumnidzãu, elu easti fratili-a meu, sora-a mea sh-muma.”
ទើបបានជ្រើសរើសហើយ៖
Marcu 3: BLRR
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល