Marcu 14
14
Apofãsirea a Preftsãlor
1Dupã doauã dzãli eara Pashtili sh-Adzãmili, sh-ma mãrlji a preftsãlor shi scriblji cãfta cum s-acãtsa Isusul cu ilei, shi s-lu vãtãma. 2Ma dzãtsea: “Nu tu chirolu a sãrbãtoariljei, tsi s-nu aibã mintiturã tu popul.”
Isusul tu Betania
3Isusul eara tu Betania, tu casa al Simon tsi eara lepros, sh-cãndu eara la measã intrã unã muljeari cu un vas di alabastru cu untulem njiurizmos cu nardu curat, multu scumpu sh-ea lu-frãmsi vaslu di alabastru sh-lji lu-virsã untulemlu pri cap. 4Niscãntsã s-nãrãirã sh-dzãsirã: “Cãtse tutã aestã hãrgiuiri a untulemlui?” 5Cã aestu untulem putea s-vindea ma multu di trei suti di denari shi aesti si s-da a niavutslor. Sh-eara nevrisits cu nãsu. 6Ma Isusul dzãsi: “Alãsats-u! Cãtse u munduits? Ea featsi un lucru bunã trã mini. 7Cã niavutslji va lji avets totãna cu voi, sh-cãndu s-vrets, putets s-lã fãtsets ghini. Ma mini nu va mi-avets totãna. 8Ea featsi atsea tsi putu, aumsi di ma nãinti truplu a meu trã ngrupari. 9Dealihea ma vã dzãcã cã tu tutã dunjeaua iutsido tsi va hibã predicat aestu evanghelu, va s-aspunã sh-aestã tsi ea featsi, ti adutseari aminti ea.”
Pãhãlu a Pridariljei
10Atumtsea Iuda Iscariotul, un di doisprãdzatsilji, s-dusi la mãrlji a preftsãlor tra s-vindã Isusul. 11Sh-elji cãndu avdzãrã, s-hãrsirã sh-lji tãxirã cã va lji da pãradzi. Ashã elu cãfta oara tsi prindi trã dari.
Etimãsirea a Pashtiljei
12Tu prota dzuã a Adzãmilor, cãndu s-featsi curbanlu a Pashtiljei ucenitsilji a lui dzãsirã: “Iu vrei s-nidzem s-adrãm di mãcari Pashtili?” 13Sh-elu pitricu doi di ucenjitsili a lui dzãcãnda: “Imnats tu cãsãbã sh-aclo va s-adunats un om tsi tsãni un stamnã cu apã, urmats-lu. 14Sh-aclo iu elu va s-intrã, dzãtsets-lji a domnului ali casi: ‘Nvitsãtorlu ntreabi: Iu easti udãlu tsi putem s-mãcãm Pashtili cu ucenitsilji a melji?’ 15Sh-elu va vã aspunã nsus unã udã mari uidisitã sh-etimã. Aclo etimãsits trã noi.” 16Ucenitsilji a lui s-dusirã, agiumsirã tu cãsãbã aflarã ashã cum dzãsi elu, sh-etimãsirã Pashtili.
Tsina a Pashtiljei
17Cãndu s-featsi searã, Isusul vini cu doisprãdzatsilji. 18Cãndu ma shidea la measã sh-ma mãca, Isusul dzãsi: “Dealihea vã dzãcã cã un di voi tsi ma mãcã cu mini, va mi vindã.” 19Atumtsea elji ahurhirã sã nvirineadzã sh-dzãtsea cu un-alantu: “Nacã escu mini?” [Shi un altã dzãsi: “Nacã escu mini?”]#14:19 Tu alti manuscrisi aestã nu s-aflã. 20Sh-elu, apãndisinda lã dzãsi a lor: “Easti un di doisprãdzatsilji tsi moalji cu mini tu cãtsãn. 21Hiljilu a omlui ma s-dutsi cum easti scriatã trã nãsu, ma cavai di atsel om cai vindi Hiljilu a omlui. Va eara ma ghini trã nãsu, tsi atsel om s-nu eara amintat pute!”
Pisti-ligãtura atsea Noaua
22Sh-cãndu elji ma mãca, Isusul lo pãnea, u ghinicuvãntã, u mpãrtsã, sh-u deadi a lor dzãcãnda: “Loats sh-mãcats. Aestu easti truplu a meu.” 23Deapoea lo cupa, lu hãrãstãsi, u deadi a lor sh-tuts biurã di nãsã. 24Atumtsea lã dzãsi: “Aestu easti sãndzili a meu, a pisti-ligãturiljei, tsi s-vearsi trã multsã. 25Dealihea vã dzãcã cã nu va beau ma dit carpolu a ayinjiljei pãnã tu atsea dzuã cãndu va s-u beau dinou tu amirãriljea al Dumnidzãu.” 26Sh-dupã tsi cãntarã un himn#14:26 Eara un adet a Iudeilor tsi s-cãnta un psalm tu vahtea a Pashtiljei. Nãinti di mãcari elji cãntau Ps. 113-114 shi Ps. 115-118 dupã vahti di mãcari. , ishirã shi s-dusirã cãtrã Muntili a Masnjilor.
Isusul sh-Petrul
27Isusul lã dzãsi a lor: “Voi tuts va vã cicãrdisits cu mini aestã searã, cã easti scriatã:
‘Va lu agudescã picurarlu
sh-oili va s-arãspãndeascã.’
28Ma dupã tsi va mi-nyedz, mini va mi duc nãinti di voi tu Galilea.” 29Sh-Petrul lji-dzãsi: “Ca s-hibã cã tuts alantsãlji s-cicãrdiseascã cu tini, mini nu va mi cicãrdisescu.” 30Sh-Isusul lji-dzãsi: “Mini ma ts-dzãc dealihea cã azã, tu aestã noapti, nãinti tsi cucotlu s-cãntã doauã ori, tini va mi alepidz trei ori.” 31Ma elu ipiminisãnda, dzãtsea: “Sh-ca s-hibã cã prindi s-mor cu tini, nu va ti aleapid pute.” Unã soi dzãsirã sh-tuts alantsãlji.
Isusus tu Ghetsemani
32Deapoea agiumsirã la un loc tsi s-acljima Ghetsemani, sh-elu lã dzãsi a ucenitsilor a lui: “Apunats-vã aoa, pãnã-cãndu mini s-mi rog.” 33Sh-lo cu nãsu Petrul, Iacovul sh-Ioanul, sh-ahurhi s-aibã fricã sh-agonii. 34Sh-lã dãsi a lor: “Suflitlu a meu easti multu nvirinat, pãnã tu moarti, armãnets aoa shi s-hits dishtiptat.” 35Sh-cum s-dusi niheam nãinti, cãdzu pri dintsi shi s-ruga, tsi ma s-eara putut, s-treacã di la nãsu atsea oarã. 36Sh-dzãsi: “Abba, Tate, itsido trã tini easti putut, dipãrteadz-u di la mini aestã cupã. Ma nu atsea tsi voi mini, ma atsea tsi vrei tini!” 37Apoia s-turnã nãpoi, sh-lji aflã durnjinda sh-lji dzãsi a Petrului: “Simon ma dornji? Nu putush s-stai dishtiptat nitsi unã oarã? 38Armãnets dishtiptat sh-rugats-vã tra s-nu intrats tu cãrteari. Duhlu easti etimu, ma truplu easti niputut.” 39S-dipãrtã nãpoi shi s-ruga dzãcãnda idyili zboari. 40Cãndu s-turnã, lji aflã nãpoi tu somnu, cã ocljilji a lor lã-ngrica sh-elji nu shtia tsi s-apãndisea. 41S-turnã di a treia oarã sh-lã dzãtsi a lor: “Ninga ma durnjits sh-vã discurmats. Agiundzi, vini oara! Ia, Hiljilu a omlui ma s-prida tu mãnjili a amãrtioshilor. 42Sculats-vã, s-ni dutsem. Ia, atsel tsi ma mi prida easti aproapi!”
Acãtsarea al Isus
43Sh-tu atsea oarã, cãndu elu ninga ma grea, vini Iuda, un di doispridzatsilji, sh-cu nãsu unã multsãmi mari cu spãtsi sh-cu ciumãdzi, pitricut di mãrlji a preftsãlor, di scriblji sh-di aushlji. 44Sh-elu tsi ma lu pridea lji avea datã a-lor un semnu: “Atsel cai va s-bash, elu easti. Acãtsats-lu shi adutsets-lu cu mari cãshtigã.” 45Sh-cum agiumsi s-apruche trãoarã la nãsu sh-lji dzãsi: “Rabbi, Rabbi!” Sh-lu bãshe. 46Atumtsea elji bãgarã mãna pri nãsu sh-lu-acãtsarã. 47Un di atselji tsi s-alfa aclo, scoasi spata, agudi sclavlu a arhipreftului sh-lji tãlje ureacljea. 48Sh-Isusul apãndisinda, lã dzãsi: “Avets vinit cu spãts sh-cu ciumãdzi tra s-mi acãtsats? 49Cathi dzuã earam namisa di voi tu templu nvitsãnda sh-voi nu mi acãtsat. Ma aestã s-fatsi tra si mplineascã Scriturili.” 50Atumtsea ucenitsilji lu alãsarã sh-fudzirã tuts. 51Sh-un tinir, tsi era anvãrtit cu un pãndzã tu truplu dispuljat ma lu urma, sh-elji lu acãtsarã. 52Elu u alãsã pãndza sh-fudzi dispuljat.
Isusul Nãintea al Sinedriu
53Atumtsea elji lu dusirã Isusul la arhipreftul iu s-adunarã mãrlji a preftsãlor, aushlji shi scriblji. 54Petrul lu urmã di diparti pãnã nãuntru tu pãlatlu a arhipreftului shi s-apunã aclo deadun cu vigljitorlji shi s-ncãldza ningã foc. 55Sh-mãrlji a preftsãlor sh-tutã sinedriul cãfta mãrtirii contra al Isus s-lu vãtãma, ma nu ma afla. 56Multsã oaminji fãtsea mãrtirii arãdioasã contra a lui, ma mãrtiriili a lor nu s-uidisea. 57Atumtsea niscãntsã si scularã sh-mãrtirsirã cu ilei contra a lui dzãcãnda: 58“Noi avem avdzãtã cã tsi ari dzãsã: ‘Mini va lu aspargã aestu templu adratã cu mãnji, sh-di trei dzãli va s-adarã un altu tsi nu va hibã faptã di oaminjilji.’” 59Ma nitsi cu aestã mãrtiria a lor nu s-uidisea. 60Atumtsea si sculã arhipreftul namisa di cunvendã sh-lu ntribã Isusul dzãcãnda: “Nu apãndiseshti dip? Tsi ma mãrtirsescu aeshti contra di tini?” 61Ma elu pãpsi sh-nu apãndisi dip. Arhipreftul nãpoi lu ntribã sh-lji dzãsi: “Tini eshti Hristolu, Hiljilu a Ghinicuvãntatlui?” 62Sh-Isusul dzãsi: “Mini escu. Sh-voi va lu videts Hiljilu a omlui apunat tu nandreapta a Puteariljei shi yininda cu norilji a tserlui.” 63Atumtsea arhipreftul, arupãnda stranjili dzãsi: “Tsi ananghi avem ti mãrtirioshlji? 64Voi lu avdzãt blãstemlu, cum lu videts?” Sh-tuts lu giudicarã cu moarti. 65Sh-niscãntsã ahurhirã s-lu scuchea, s-lji anvãlea fatsa, shi s-lu agudea cu shupleacã shi s-lji dzãtsea: “Prufitipsea!” Sh-vigljitorlji lu agudea.
Petrul Arniseashti Isusul
66Cãndu Petrul eara nghios tu ubor, vini un di huzmichearili a arhipreftului. 67Sh-cãndu vidzu Petrul tsi ma s-ncãldza, lu vidzu cu cãshtiga sh-lji dzãsi: “Sh-tini earai cu Isus Nazareas.” 68Petrul alipidãnda dzãsi: “Nu lu cunoscu, sh-nu achicãsescu tsi dzãtsi.” Deapoea ishi nafoarã tu intrata a uborlui sh-cucotlu cãntã. 69Sh-huzmicheara vidzãnda nãpoi ahurhi s-lã greascã atsilor tsi eara aclo: “Aestu easti di nãshi.” 70Ma elu nãpoi u-ari alipidat. Sh-niheamã ma nãpoi oaminjili lji dzãsirã nãpoi a Petrului: “Dealihea tini eshti un di atselji, cã tini eshti Galilean sh-grearea a ta s-cunoashti.” 71Ma elu ahurhi s-blastimã shi si spigiurã: “Mini nu lu cunoscu atsel om ti cai ma grits.” 72Sh-cucotlu cãntã di a doaua oarã. Atumtsea a Petrului lj-vini tu minti zborlu tsi Isusul lji avea dzãsã: “Ma nãinti tsi cucotlu s-cãntã di doauã ori, tini va mi aleapidz trei ori.” Sh-cum mindui aestã, plãmsi.
ទើបបានជ្រើសរើសហើយ៖
Marcu 14: BLRR
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល