Mateu 13
13
Parabola a Siminãtorlui
1Tu atsea dzuã, Isusul ishi di la casã shi shidzu ningã amari. 2Multsãnji mãri s-adunarã anvãrliga di nãsu sh-elu s-alinã tu unã varcã shi shidzu, sh-tut populu stãtea mprostu mardzina di amari. 3Sh-elu lã aspusi multi lucri a lor tu parabolã, dzãcãnda: “Ia, un siminãtor ishi tra s-seaminã. 4Iarã ma simina, nãscãnti di simintsãli cãdzurã ningã cali. Puljilji vinirã sh-li mãcarã. 5Nãscãnti alti cãdzurã tu un loc chitros, iu nu avea multã tsarã, sh-fitrusirã trãoarã cã nu avea tsarã multã. 6Ma cãndu ishi soarili s-pãlirã shi s-uscarã cã nu avea rãdãtsinã. 7Altili cãdzurã prit schinji, schinjilji criscurã sh-lji acãtsarã anasa. 8Ma, atsea simintsã tsi cãdzu tu loc bunã deadi carpo, unã sutã di ori, alanta shaidzãtsi di ori sh-alanta treidzãtsi di ori. 9Cai ari ureclji trã avdzãri, s-avdã!”
10Atumtsea ucenitsilji s-apruchearã di Isus sh-lji dzãsirã: “Cãtse lã zburãshti a lor cu parabolã?” 11Sh-elu apãndisinda lã dzãsi a lor: “Cã a voauã vã si easti datã s-cunushtets mistiryili a amirãriljei a tserurilor, iarã a lor nu lã si easti datã. 12Cã atsilui tsi ari, va lji si da sh-altã sh-va lji artiriseascã. Iarã atsilui tsi nu ari, va lji si ljea sh-atsea tsi ari. 13Trã atsea mini lã zburãscu a lor cu parabolã, cã mutrescu sh-nu ved, ascultã sh-nu avdu sh-nitsi cã aduchescu. 14Ashã tu elji si mlineashti prufitia al Isaia, tsi dzãtsi:
‘Voi dealihea va avdzãts, ma nu va aduchits,
dealihea va mutrits, ma nu va videts.
15 Cã inima a popului aishtui easti ni sãmtsãt,
elji suntu faptã grelji di ureclji
sh-au ncljisã ocljilji,
tra s-nu veadã cu oclji
s-nu avdã cu ureclji,
s-nu giudicã cu inima
shi s-nu s-toarnã,
sh-mini s-lji vindicã.’
16Ma ca hara di ocljilji a voshtri cã ved sh-urecljili a voastri cã avdu. 17Cã alihea vã dzãc cã multsã prufits sh-ndreptsã vrurã s-li veadã atseali tsi voi ma videts sh-nu li vidzurã, shi s-li avdu atseali tsi voi avdzãts shi nu li avdzãrã!
18Trã atsea voi aduchits parabola a siminãtorlui. 19Cãndu vãrã avdi zborlu a amirãriljei sh-nu lu aducheashti, yini slablu sh-lji arãcheashti atsea tsi eara siminatã tu inima a lui. Atsea easti simintsa siminat ningã cali. 20Shi simintsa tu loclu chitros, easti atsel tsi avdi zborlu sh-lu aproachi trãoarã cu harauã. 21Ma, nu ari arãdãtsinã pri nãsã sh-easti ti putsãn chiro. Cãndu yini munduirea icã avinarea trã itia a zborlui, s-apãrãtseashti trãoarã. 22Shi simintsa cãdzut tu schinji easti atsel tsi ascultã zborlu, ma nvirinarea a lumiljei aishtei sh-arãderili a ayishterilor, astup zborlu, sh-ea s-fatsi nifructoasã. 23Ma atsea simintsã tsi cadi tu loc bun, easti atsel cai ascultã zborlu, lu aducheashti sh-da carpo. Sh-un fatsi unãsutã di ori, altu shaidzãtsi di ori shi altu treidzãtsi di ori.”
Parabola a Ordzului
24Elu l-pripunã a lor un altã parabolã: “Amirãriljea a tserurilor lj-undzeashti a unui om tsi siminã simintsã bunã tu agrul a lui. 25Ma, iarã oaminjilji ma durnjea, vini neamiclu a lui shi siminã ordzu prit grãn sh-fudzi. 26Cãndu grãnlu criscu sh-featsi carpo s-vidzu sh-ordzul. 27Sh-huzmichearlji a nicuchirlui a casiljei s-apruchearã la nãsu sh-lji dzãsirã: ‘Doamne, nu ai siminatã simintsã bunã tu agrul a tãu? Di iu ishi ordzul?’ 28Sh-elu lã apãndisi a lor: ‘Aestã lu ari faptã neamiclu.’ Atumtsea huzmichearlji lji dzãsirã: ‘Vrei tini s-nidzem shi s-li scutem?’ 29Ma elu dzãsi: ‘Nu, cã scutãnda ordzul, deadun cu nãsu va scutets sh-grãnlu. 30Alãsats s-creascã deadun pãnã la sitsirari. La chirolu a sitsirariljei va lã dzãc a sitsirãtorilor: Adunats ma nãinti ordzul, ligats-lu tu mãnuclji tra si-u ardem, sh-grãnlu bãgats-lu tu hãmbarea a mea.’”
Parabola al gãrnutsu di Sinap sh-a Mãeauljei
31Elu lã pripunã a lor un parabolã altã dzãcãnda: “Amirãriljea a tserurilor lj-undzeashti a unui gãrnuts di sinapi, tsi lu ia un om sh-lu seamni tu agrul a lui. 32Elu easti ma njic di tuti simintsãli, ma dupã tsi creashti, easti ma mari dicãt tuti erghili, shi s-fatsi un pom, ahãntu cãt puljilji a tserlui yin sh-aflã streahã tu dedzãli a lui.” 33Elu lã dzãsi a lor unã parabolã altã: “Amirãriljea a tserurilor undzeashti cu mãeaua tsi u-ljea unã muljeari sh-acatsi aloatlu cu trei misuri di fãrinã pãnã cãndu aloatlu s-hibã etimu.” 34Isusul tuti aesti lucri lã-li dzãsi a multsãnjilor tu parabolã. Sh-nu lã zbura a lor tsiva fãrã parabolã, 35tsi si mplinea tsi eara dzãsã di la prufitlu:
“Mini va discljid gura a mea prit parabolã
sh-va disvãlescu lucrili atseali ascumtili di tu adrarea a lumiljei.”
Explicarea a Parabolãljei
36Atumtsea Isusul, dupã tsi alãsã multsãnjili, s-turnã la casã sh-ucenitsilji a lui lji-s-apruchearã sh-lji dzãsirã: “Nã aspunã parabola a ordzului dit agru.” 37Sh-elu apãndisinda lã dzãsi a lor: “Atsel tsi seaminã simintsã bunã easti Hiljiu a omlui. 38Agrul easti lumea, simintsa atsea buna suntu hiljilji a amirãriljei sh-ordzul suntu hiljilji a arãului. 39Neamiclu tsi u-ari siminatã easti draclu, iarã sitsirarea easti bitisita a lumiljei shi sitsirãtorilji suntu anghiljilji. 40Ashã cum s-adunã ordzul shi s-ardi tu foc, ashã va hibã tu bitisita a lumiljei: 41Hiljiu a omlui va pitreacã anghiljilji a lui sh-elji va adunã dit amirãriljea a lui tuti scandalili sh-atselji tsi facã anapudii 42sh-va lji arucã tu cireaplu a foclui. Aclo va hibã plãngul sh-cãrtsãnirea a dintsãlor. 43Atumtsea ndreptsãlji va strãlutseascã ca soarili tu amirãriljea a Tatãlui a lor. Cai ari ureclji trã avdzãri, s-avdã!”
Trei Paraboli
44“Atumtsea, amirãriljea a tserurilor undzeashti ca unã ayishteari ascumtã tu un agru, tsi un om u-aflã sh-u ascundi. Di haraua tsi ari, s-dutsi, vindi itsi-ari sh-acumpãrã agrul atsel.
45Tutashã, amirãriljea a tserurilor undzeashti ca un prãmãteftu tsi s-dutsi caftã mãrgãritãri buni. 46Cãndu aflã un mãrgãritar cu mari tinjii, s-dutsi sh-vindi itsi ari sh-lu acumpãrã.
47Amirãriljea a tserurilor undzeashti tutashã cu plasa arcatã tu amari, tsi adunã multi soi di peshti. 48Cãndu ea easti umplutã, piscarilji u-scoatã mardzina di amari sh-apãrnjescu s-adun tu coshuri atselji bunjilji, sh-atselji tsi nu suntu bunji, lji arucã nclo. 49Ashã va s-undzeascã tu bitisita a lumiljei. Va yinã anghiljilji sh-va li dispartã anapudzlji di ndreptsãlji 50sh-va lji arucã tu cireaplu di foc. Aclo va-hibã plãngul sh-cãrtsãnirea a dintsãlor.”
51Isusul lã ntribã atselji: “Li-aduchit tuti aesti?” Elji lji apãndisirã: “Ie.” 52Sh-elu lã dzãsi a lor: “Trã aestã cathi scrib, tsi s-fatsi un ucenic tu amirãriljea a tserurilor lj-undzeashti a unui nicuchir di casã tsi scoati nafoarã dit ayishtearea a lui lucrili atseali nauli sh-atseali vecljili.”
Nipistipsirea al Nazaret
53Dupã tsi Isusul lji avea bitisitã aesti paraboli, fudzi di aclo. 54Dupã tsi vini tu patria a lui, lji nvitsa oaminjilji tu sinagoga a lor, sh-elji s-ciudisea shi ntriba: “Di iu lj-vinirã aishtui aestã mintimenilji sh-aestã puteari ti thavmati? 55Nu easti aestu hiljiu a lemnarlui? Nu s-acljeamã muma a lui Maria, sh-fratslji a lui Iacov, Iose, Simon sh-Iuda? 56Sh-surãrili a lui nu suntu tuti la noi? Atumtsea di iu lji vinirã aishtui tuti aesti?” 57Shi si cihtisea cu nãsu. Ma Isusul lã dzãsi a lor: “Un prufit nu easti nitinjisit, dicãt mash tu patria a lui sh-tu casa a lui.” 58Sh-trã itia a nipistipsiriljei a lor, elu nu featsi aclo multi thavmati mãri.
ទើបបានជ្រើសរើសហើយ៖
Mateu 13: BLRR
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
