Mateu 11
11
Hãbarea di la Ioan Pãtidzãtorlu
1Dupã tsi Isusul bitisi darea a dimãndãciunilor a lui a doisprãdzatsi di ucenitsi a lui, fudzi di atsel loc, trã nvitsari sh-trã predicari tu cãsãbadzli di Galilea. 2Ioanul, tsi avea avdzãt tu hapsi si zbura di faptili a Hristolui, pitricu doi di ucenitsilji a lui 3tra s-lji dzãtsea: “Eshti tini atsel tsi prindi s-yin, icã prindi s-ashtiptãm vãrã altu?” 4Sh-Isusul apãndisi a lor: “Imnats shi spunets-lji a Ioanului aesti tsi avdzãts sh-videts: 5Orghilji ma ved, shcljiochilji ma imnã, leprozilji suntu curats, surdzãlji ma avdu, mortsãlji ma s-nyeadzã sh-evanghelu ma s-preadicã la oarfãnji. 6Ca hara di atsel tsi nu va si zurliseascã di mini!” 7Sh-cãndu elji ma s-dipãrta, Isusul apãrnji s-lã dzãtsea ali multsãmi trã Ioanul: “Tsi vrets s-videts tu irnjii? Cãlamlu tsi lu ascuturã vimtul? 8Cãtse avets ishit s-videts? Omlu nviscut cu stranji moali? Ia, atselji tsi si nvescu cu stranji moali bãneadzã tu pãlatili a amiradzlor. 9Atumtsea, cãtse ishit afoarã s-videts? Un prufit? Ie, mini vã dzãc, elu easti ma multu di un prufit. 10Cã aestu easti atsel ti cai easti scriatã#Mal 3:1.:
‘Ia mini ma vã pitrec anghilu a meu nãintea a fatsãljei a ta;
elu va u-fac etimu calea a ta nãintea a ta.’
11Dealihea ma vã dzãc: Di atselji tsi suntu amintats di muljeri nu ari ishit pute vãrã ma mari di Ioan Pãtidzãtorlu. Ma, ma njiclu tu amirãriljea a tserurilor easti ma mari di elu. 12Sh-di tu dzãlili al Ioan Pãtidzãtorlu sh-pãnã tora amirãriljea a tserurilor ma s-rebilipseashti sh-rebilji u-arãchescu. 13Tuts Prufitsilji sh-Legea au prufitipsitã pãnã la Ioanul. 14Sh-macã vrets s-lu aprucheats, elu easti Ilia, tsi va yinã. 15Cai ari ureclji ti avdzãri, si-avdã 16Cu cai s-u undzescu aestã gheneratã? Undzeashti cu cilimenjilji tsi sta prit pãdzi sh-aurlã a sotsilor a lor 17dzãcãnda:
‘Noi avem bãtut flueara ti voi
ma voi nu giucat;
ahurhim s-vãitãm
ma voi nu plãmsit.’
18Vini Ioanul tsi nitsi mãca, nitsi bea, sh-elji dzãc: ‘Elu ari un demon.’ 19Vini Hiljiu a omlui, tsi mãca sh-bea sh-elji dzãc: ‘Ia un mãcãtor sh-un biutor, oaspili a taxidarilor sh-a amãrtioshilor.’ Ma mintimeniljea easti aspus ndreaptã di la hiljilji a ljei.”
Trei Cãsãbadzi ni-mitãnjusiti
20Atumtsea, Isusul apãrnji s-vãrgheascã atseali cãsãbadzi, iu eara faptã ma multi di thavmatili a lui, cã atseali nu eara mitãnjusiti, dzãcãnda: 21“Cavai di tini, Corazin! Cavai di tini, Betsaida! Cã, macã tu Tiro sh-tu Sidon va eara faptã thavmatili tsi s-featsir tu voi, di cu chiro va eara mitãnjusitã cu sac sh-cu chinushi. 22Trã-atsea mini ma vã dzãc cã tu dzua a giudicatãljei, Tiro sh-Sidon va s-giudicã cu ma multã lishuredzi dicãt voi. 23Sh-tini, Capernaum, tsi ti sculash pãnã tu tser, va ti dipunji pãnã tu Colasi. Cã macã va eara faptã tu Sodoma thavmatili atseali mãrili tsi s-featsirã la tini, atsea va eara sh-azã tu aestã dzuã. 24Trã atsea mini ma vã dzãc cã dzua a giudicatãljei a Sodomiljei va hibã ma lishoarã di a tsãia.”
Giuglu al Hristos
25Tu atsel chiro Isusul apãrnji sh-dzãsi: “Mini ti alavdu, Tatãl, Domnul a tserlui sh-a loclui, cã li ascumsesh aesti lucri a mintimenlui sh-a nvitsatlui, sh-lji li discupirish a njitsilor. 26Ie, Tate, cã ashã ts-arãseashti a tsãia. 27Itsido nji si easti datã tu mãnã di la Tatãl a meu, sh-vãrã nu lu cunoashti Hiljiu, dicãt mash Tatãl, sh-vãrã nu lu cunoashti Tatãl, dicãt mash Hiljiu sh-atsel tsi Hiljiu va lji-lu discoapirã. 28Haidets la mini, tuts voi cãpãitsi sh-munduitsi, sh-mini va vã discurmu. 29Loats pri voi giuglu a meu shi nvitsats di la mini, cã mini escu inimã-moali sh-tapin, sh-voi va aflats arihati tu suflitli a voastri. 30Cã giuglu a meu easti moali shi sartsina a mea easti lishoarã!”
ទើបបានជ្រើសរើសហើយ៖
Mateu 11: BLRR
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
