लुका कितबवाक परिचय
कितबवाक परिचय
इअ कितबवा लिखलाहरा लुका एक जन बइध रहलिय (कल्लसि ४:१४)। उअ ग्रिक भासा हसे संस्कृतक विद्ववान फेनि रहलिय। लउठि नियम लिखलाहरामधेमा लुका मतरे अयहुदि मन्से रहलिय। उअ इअ कितबवा मतरे हइने “प्रेरितवानिक काम” कहल दोसरि कितबवा फेनि लिखलिय (लुका १:१-४; प्रेरित १:१-२)।
लुका येसुजिक जिवन, धरतियामा हुनेक करलि सेवकाइक बारेमा हसे हुने मरलिसे फेरि जिउतलिक बारेमा फेनि लिखलिय। याको तिन जन लेखकसभ, मति, मरकुस हसे युहन्ना फेनि येसुजिक जिवनक बारेमा लिखलइ। मति खास करके यहुदियानिक तहिँया सुसमाचार लिखलिय, बाकि लुका अयहुदियानिक तहिँया सुसमाचार लिखलिय।
एक अध्यायक सुरुमा लुका हुनुकर बिचा घटलि येसुजिक जिवन हसे मृत्युक घटनावाक बारेमा एक-एक करके लिखले बडिय। इअ बिबरन लिखेके तहिँया हखे सकतइ, उअ येसुजिक
दाओ मरियमसे (लुका २:१९, ५१) येसुजिक बारह जन चेलवानिसे हसे याको सतर जन चेलवानिसे (लुका १०:१) थाह पउले रहलिय।
लुका पावलक सङहतिया रहलिय। वकर परचार यातरामा कुनहुँ-कुनहुँ ठउरियामा लुका फेनि वकरेसाङे गेल रहलिय। (प्रेरित १६:१०-१७; २०:५–२१:१७)। पावल रोममा जाइखुनि लुका फेनि वकरसाङे रहलिय (प्रेरित २७:१-२)। पावल रोमक झ्यालखनवामा परलि जुनवामा लुका वकर सेवा करले रहलिय (२ तिमोथि ४:११)। (पावल हसे तखनहिँक भुगोलक बारेमा थप जानकारि पावेके तहिँया सबदक यरथ हसे नक्सा हेरबहुँ।)
लुका एगुडा बइध मतरे हइने रहलिय, बाकि उअ एगुडा इतिहासकार फेनि भेलेसे, खुभे हुसियारसे खोजि करके येसु ख्रिस्टक बारेमा इतिहासक सदि बात लिखले हखिय।
लुकाक लिखलि मुख्य-मुख्य बात परमेस्वर मन्सावानिके मुक्ति देवेके तहिँया येसुजिके संसारमा पठोले हखसि। येसुजि गरिब मन्सावानिके सुसमाचार सुनावेके, झ्यालखनवामा परलि मन्सावानिके छुटकारा देवेके, यन्हरि मन्सावानिके देखाह बनावेके, दबाबमा परलि मन्सावानिके मुक्ति देवेके तहिँया याइल हखसि (लुका ४:१८)। येसुजिक सेवकाइसे पुरनि नियमक भविस्यवाडि पुरा हखेके तहिँया प्रतिनिधित्व करसइ (लुका ४:१८; १०:२३; २४:२६,४४-४७)। येसुजि परमेस्वरक राजक बारेमा सुसमाचार परचार करलेपर, परमेस्वर मन्सावानिके मुक्ति देवेके योजनाक लउठा कदम रहलइ (लुका १६:१६)। हखेके त परमेस्वरक राजक पुरन अनुभव भविस्यमा करे पावेके बात बडइ (लुका १९:११), बाकि परमेस्वर मन्सावानिके सइतान हसे भुतवानिक बन्धनसे छुटकारा देइ बडसि (लुका ११:२०; १३:१६)। पापि मन्सावाह छमा पाके हसे येसुजिसाङे सङगति करे पउलेसे आनन्दित हखे सकतइ। येसुजिक फदकलि वचनवा हसे करलि कमवासे परमेस्वर मन्सावानिके पापसे कस्के बचोबसि कहलि बतवा बुझेके तहिँया हमार मदत पुगतइ।
बिसय सुचिक रुपरेखा
परिचय १:१-४
बप्तिस्मा देलाहर युहन्ना हसे येसुजिक जनम तके बाचारहइकि १:५–२:५२
बप्तिस्मा देलाहर युहन्नाक सेवाकाइ ३:१-२०
येसुजिक बप्तिस्मा हसे परिछा ३:२१–४:१३
गालिलमा येसुजिक सेवाकाइ ४:१४–९:५०
गालिलसे यरुसलेमलइ ९:५१–१९:२७
यरुसलेममा अन्तिम हप्ता १९:२८–२३:५६
येसुजि मरलिसे जिउतके स्वरग गेलसि २४:१-५३
ទើបបានជ្រើសរើសហើយ៖
लुका कितबवाक परिचय: CTHR
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
© 2023, Wycliffe Bible Translators, Inc. and Nepal Bible Society