kurinṯuuz aṯ ṯaani 3
3
aza 3
lizi limurla rugwori lu ŋiɽaŋal ŋi ŋandiza zi buuluz
1nyiŋa linaŋna eḏiɽi rɔgwɽɔ-na reri kwokwony, a? ya nyiŋa linaŋna juwaba eḏi gi iɽi nyuŋwuzi-na ki yey-na yalu a, ya juwaba kwalu, a, kaka eṯir zi gwu naŋni lɔkwɔ? 2a liri titir lir juwab kweri kweḏi gi iɽi nyuŋwuzi-na, kwuluḏina rugwor nana ralu, eḏi ruwene lu, eḏi lizi orti tatap; 3nezi baŋaci eḏaruŋw, a liri juwab kwinḏi nani gwu Kwruztu rii ri reri, kwiti kwuluḏina hibir yi mac, lakin kwuluḏina Ṯigɽim ṯi ṯeḏi Allah wumiiḏu, kwiti kwuluḏina yefirliny nana yeḏi yal tɔk mac, lakin yefirliny nana yeḏi rugwor rir ŋizigwunaŋ.
4ner ṯa orɔ ŋu ŋeṯinyji kitazazi rugwori Allah nana Kwruztu ŋgi. 5nyiŋa liti leḏi ŋuma oɽeny mac eḏaruŋw, ŋinḏi ŋere nani nyi gwu; ŋuma ŋeri ŋinḏi nani gwu Allah, 6wumenyji inḏeḏa ŋuma eḏorɔ leḏi ŋɔḏɽor ŋeḏi ṯikitaḏiza ṯete ṯiaŋ, titi tir kuruu kuluḏina ŋwuli ŋi mac, lakin Ṯigɽim ṯi; kaka eti gwu kuruu kuluḏina enji ŋiɽany, lakin Ṯigɽim ta, eṯuŋw inḏeḏa ŋimiiḏa.
ŋiniṯ ŋeḏi injiil ŋiṯemḏelu
7na ṯa kuruu kipina ŋwuli yal nana eṯenji ŋiɽany, lakin keni nuŋw ila ŋiniṯ ŋi ŋupa ŋiminni mindaŋ na lizi leḏi izrayiil ere eḏi ŋuma mac eḏece muuzaŋw kiyeyna, ŋiɽaŋal ŋi ŋeḏi firyar kiyeyna kwuŋwun, na kwumɔ naŋni eḏernine tɔk. 8ta na ṯay ṯeḏi Ṯigɽim tirlinelu ter titi ṯeŋgila ŋiniṯ ŋi ŋiṯemḏelu manya? 9ŋwu ṯa, ma ŋiniṯ nani ki ṯay-na ṯeḏi hukm, a ŋiniṯ ki ṯay-na ṯeḏi ṯofḏana ere ṯamḏalu purpur manya? 10rerem, ki ŋiɽaŋal-na ŋu, ṯay kḏa ṯeḏi ŋiniṯi kerreny ṯiti ṯeḏi kwokwony ŋiniṯi ŋere ḏuṯ ŋiɽaŋal ŋi ŋeḏi ŋiniṯ ŋiṯemḏelu purpur. 11ma ṯay ṯeḏi kuruu, ṯinḏi eḏernine, ila ŋiniṯ ŋi, eti kḏa ṯeṯinanniḏa dɔk eḏi ŋiniṯi ŋupa ŋiṯemḏelu.
12kaka eḏi nyi gwu ṯəkiza kizen kḏu, eṯi nyi eni lugwul, 13liti liri kaka muuzaŋw mac, kwukwuɽbena kiyeyna tireṯ ri mindaŋ eŋgi lizi leḏi izrayiil ere eze ŋiniṯi mac ŋinḏi eḏernine. 14lakin eṯi ṯireca ṯeŋen yey lu eni ṯimay nana; mindaŋ ma kirem orɔ mer orti ṯikitaḏiza ṯuɽun, eti tireṯ tir kaka ṯa kra teṯinanniḏa, titi timɔdimini mac, kaka eṯuŋw gwu dirnini kiṯay Kwruztu ŋgi dak. 15aw, mindaŋ ma lamin orɔ klu mer zi ortici ŋeḏi muuza, eti tireṯ nani ki ṯireca ṯeŋen yey lu nana; 16lakin ma kwizi kwere orlaḏa Kwelenyi nana ta, a tireṯ dirnini kiṯay. 17ta na Kweleny orɔ ŋundu Ṯigɽim, na kezir weṯi gwu Ṯigɽim ṯeḏi Kweleny nani, eti gwu hurriya nani tɔk. 18na nyiŋa tatap, liti leḏi tireṯi kiyeyna mac, licica ŋiniṯi ŋeḏi Kweleny, a kweṯir reḏe eḏaɽani ŋunduŋwu, limumri ŋiniṯi la duṯuk; kaka inḏi gwu ṯiriiḏa kḏu nani gwu Kweleny kwir Ṯigɽim.
ទើបបានជ្រើសរើសហើយ៖
kurinṯuuz aṯ ṯaani 3: KIB1967
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
Nuba, Koalib Ngirere New Testament © First published by the British and Foreign Bible Society in Khartoum in 1967.