kurinṯuuz aṯ ṯaani 13
13
aza 13
ṯireca ṯere ṯere inḏi gwu buuluz eḏila
1nyamin nyimorɔ-na kinyu ṯɔɽɔl nyimenyi nyi ila nani ŋa gwu. ŋere nyiḏak ŋinḏi eḏandani ŋeḏi keḏiya, erandani ki runyu la reḏi lizi nden ya ṯɔɽɔl. 2nenyji ireci kerreny kla limezerri ŋiki, na liḏaḏu tɔk tatap; na enyji ṯa ireci kire-kirem iira nyi gwu yey lu, kaka menyji gwu ṯa ireci ma nyamin orɔ-na nyiɽen nyimenyji nyi raŋḏa, menyi aɽi kwokwony enyjere ala rii mac— 3kaka naŋna ŋa gwu eḏi zi elŋece eḏaruŋw, Kwruztu kwiri kweṯandazi duŋgwinyi-na. kwende ŋgwu kwajila muŋw hakwumi ŋaŋwuzi, a linḏa ŋuma ŋuŋun daŋgal-na. 4kaka mer gwu ṯigreḏa ŋwuɽi la ŋwuɽmɔḏalu nuŋw eni kwumajili, lakin eṯuŋw miiḏi ŋuma ŋi ŋeḏi Allah, nyiŋa ta ner eni lajila duŋgwun-na, lakin ma ŋazi hakwumi, enyi miiḏi ŋundu ŋgi ŋuma ŋi ŋeḏi Allah.
5ṯecer ṯi rɔgwɽɔ ralu eḏi zi eze, a leṯi miḏa ṯəmna ṯalu ya beri. ṯecer rɔgwɽɔ ralu eḏi zi elŋe. ŋiti ŋilŋiicaŋazi manya eḏaruŋw, Yecu Kwruztu kweṯomi daŋgal-na? —illi ma ere eḏofḏani mac mezi ṯeci! 6nyi kwəkizaŋazi kizen eḏinḏa nyuŋwuzi limofḏazi. 7lakin eṯi nyi ari Allah ki yiriny mindaŋ eḏi zi ma ere aki ŋere pir mac—ŋiti ŋiri mac kaka menyi gwu ofḏazi, lakin ezi ma erri ŋaŋa ŋeni ŋofḏana, menyi kinna orɔ nyiŋa kaka liti limofḏazi mac. 8kaka iti eḏi nyi gwu ŋuma mac eḏerrizeza kwɔmne kwere kwir ṯuwən ŋiɽaŋal nana ŋirlalu, lakin eḏi zi errizeza ŋiɽaŋal nana ŋirlalu dak. 9nyiŋa lamina mer ajili nyiŋa, ma eni ŋaŋa lifirli, ŋinderṯa ŋeṯir ŋazi ŋi erici ki yiriny, eḏi ma orɔ minmin lofḏana. 10ŋulucaŋazi ŋu rucaŋazi-na kinna mindaŋ menyila ta, ŋazi ŋi ere naŋni mac eḏi ŋi hakwumi ŋifirli, zulṯa gi kwumenyi Kweleny inḏeḏa eḏi zi gi kikindezi, kwiti kwiri eḏi zi gi kiraza lu mac.
ŋiɽaŋal ŋirmiḏiḏu
11kire-kirem ŋgwu, lieŋgeri linyi, nanir lizaw, eṯorɔ minmin lofḏana; kiticerzi yey ŋandicaŋazi ŋi; amiḏir-na daŋgal-na wuɽe-wuɽeny; nanir ŋiɽena ŋi; mindaŋ a Allah weḏi ṯamɽa na weḏi ŋiɽena tɔk nani ŋaŋa li. 12agnizar-na wuɽe-wuɽeny ṯagna ṯi tirlinelu ter. 13klu tatap lirlinelu ter eḏi Kwruztu-na lagnaŋazi.
14eḏi ṯimeca ṯeḏi ŋimɽi ŋeḏi Kweleny kweni Yecu Kwruztu, na ṯamɽa ṯeḏi Allah tɔk, na ŋumaṯ ŋeḏi Ṯigɽim tirlinelu ter tɔk er nani daŋgal-na tatap.
ទើបបានជ្រើសរើសហើយ៖
kurinṯuuz aṯ ṯaani 13: KIB1967
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
Nuba, Koalib Ngirere New Testament © First published by the British and Foreign Bible Society in Khartoum in 1967.