གཉིད་པ་ཀོ་རིན་ཐི། 13

འ་ར་འུ་རུ་

1ཨུ་ཐུ་ཨ་ལ་ཀབ་ཉི་ ཇང་ན་ཧ་བཱརང་ཀ་ཨུ་ཉི་ ཤེབ་སམ་དི༌ལེ། ཉི་གསུང་རབ་གེ་ཤོ་ཝ་དང་ཏུ་ཉི་ ཧང་རང་གི་ནེ་བུ་ དེན་པ་གི་ལ་དག་ཉི་ ཁུངས་ཀེ་བེ་དེན་གེ་ འཛོམས་དཔང་ཨ་ཁཱན་ ཉིག་ཙིང་དང་ སམ་ཕང་ཚཱས༌པེ།#13:1 ཁྲིམས་ལུགས་ག་དཔེ་ཆ་ 19:15 2ཇང་ན་ཧ་བཱརང་ཀ་ཨུ་ཉི་ ཤེབ་ཉིག་ཙིང་དི་ལེ་གང་ཀ་ གོ་མ་ སྡིག་པ་ཨ་ཁཱན་བ་ ཇི་གི་ཡོང་ཨ་ཝ༌ཅ། ཉི་ཨོམ་ཆང་རང་ ཇི་གི་ལོག་ཉི་ཡེག་ཅ་ གོ་མ་སྡིག་པ་ཨ་ཁཱན་བ་དང་ བཱརའ་ཨི་བི་རང་གི་ནེ་བུ་ ཨོ་ཐ་ཤེབ་ཀ་ ཇི་གི་ཁྲིམས་མ་ཀེ་བཱན་ ཐུབ་མ་ཐ༌ལ།

3ན་ཤི་ཇ་ག་ ཁིརིས་གི་ ཇ་ག་ཐུང་ཀེ་ཨ་ཉི་ གསུངས་ཅ་གི་ལ་དག་ ཁུངས་ཀེ་ཤོ་ཨ་ཉི་ཡེག༌ལ། ན་ཧ་བ་ཀབ་ཉི་ འཁྲིལ་ལེ་དེན་གེ་ ཁིརིས་དོ་རི་རི་ མ་ཝ་རི་ཝ་མཱན༌ཅ། དག་པ་ཀབ་ཉི་ ན་ཧ་པོང་ཀ་ རོ་ཀ་སྟོབས་དབང་ཆི་ལུ༌ཅ། 4རོག་དོ་རི་རི་ མ་ཝ་ཆོ་ཝ་ཨ་དེན་གེ་ ཁྲིམས་ཤིང་གེ་ཇཱན་མ་གི༌ལ། དག་པ་ཀབ་ཉི་ དཀོན་མཆོག་ག་ སྟོབས་དབང་ག་ཐུང་ཀེ་ཨ་ཉི་ རོག་བཞུགས་ཅ་གི༌ལ། ཨུ་ཉུ་པུརུས་ཀིན་ཨ་ཉི་ ཨའི་བུ་ དོ་རི་རི་ཏ་མ༌ལ། ཨོ་ཉེ་རང་གི་ནེ་བུ་ ན་ཧ་ཕྱག་ཞུ་ལེ་དེན་གེ་ དཀོན་མཆོག་ག་ སྟོབས་དབང་ག་ཐུང་ཀེ་ཨ་ཉི་ ཆོ་ལེ་གི༌ལ།

5ན་ཧ་དད་པ་ཁེ་པ་ ཏེན་ཏེན་ཅ་སྨོ་མཱན་ཅ་སྨོ་ བརྟག་དཔྱད་ཕི་ཉི་གོད༌ཅོ། ནའི་ཏེན་ག་རྒྱུགས་ལའི། ཁིརིས་ཡི་ཤུ་ཤོ་ ན་ཧ་ནང་ཀ་བཞུགས་པ་ཅ་དག་ཉི་ ན་ཤི་དྲཱན་མུ་མ་ལ་སྨོ། ཨུ་ཉུ་མ་ནེ་ལ་ རྒྱུགས་ལ་ལ་ཀབ་ཉི་ ན་ཧ་བ་ཕ་མ་གི༌ལ། 6ཨའི་ཤོ་ རྒྱུགས་ལ་ལ་ཀབ་ཉི་ ཚ་ཁ་ཚུད་ཁཱན་བ་ གི་ཝ་ལ་དག་ཉི་ ན་ཤི་སེ་ལེ་དག་ཉི་ ཨ་ཤི་རེ་ཆ་ཨ་ཝ༌ཅ།

7ན་ཤི་ ལའི་ཧང་རང་མ་ངཱད་ཅེན་དག་ཉི་ ཨ་ཤི་དཀོན་མཆོག་ག་ཏཱན་ སྨོན་ལམ་ཏབ༌ཅ། རྒྱུགས་ལ་ལ་ཀབ་ཉི་ ཨ་ཤི་ཚ་ཁ་ཚུད་པ་དག་ཉི་ གེན་མེ་དེན་གེ་མང་གི་ཝ་ ཨ་ཤི་ གོ་མ་ཆོད་པ་ད་བུ་ ཐོང་ཐཱན་རང་གི་ནེ་བུ་ ལའི་ལེག་པུ་གི་ཁཱན་ཁེ་པ་ ན་ཤི་ཨན་ཆེན་དག་པ་གི་གི༌ལ། 8ཧང་ཡ་དག་ནེ་ལ་ ཨ་ཤི་དེན་པ་ག་དགྲ་ཨ་ཉི་ ཧང་རང་ཨ་ལེ་མར༌བ། དག་པ་ཀབ་ཉི་ དེན་པ་ག་དེན་གེ་ཤ་ ཨ་ལེ་རེ༌བེ། 9ན་ཧ་བ་ཏེན་ཏེན་རང་ དོ་རི་རི་ཆོ་ནེ་ལ་ ཨའི་ཏ་ དོ་རི་རི་མ་ནེ་བུ་ ཤོ་ནང་ཕེ་ཉི་ཆོ༌ལེ། ན་ཧ་བ་ལེག་པུ་རིན་ཆེན་དག་ཉི་ ཨ་ཤི་སྨོན་ལམ་ཏབ༌ཅ།

10ཇང་ན་ཧ་བ་ཀབ་ཉི་ མ་ལཱན་ཆོ་ལ་ཀབ་ཉི་ ཇི་གི་ན་ཧ་ཀག་ཏར་ཨ་ཉི་ཡེག༌ཅ། ཧང་ཡ་དག་ནེ་ལ་ ཇང་ན་ཧ་བཱརང་ཀ་ ཨོ་ཕེ་གང་ཀ་ ཇི་གི་ཀག་ཏར་ཨ་ལེ་མ་ཁེན་ཆེན། ན་ཧ་བ་ཆེད་ཉི་ གེ་མེ་དེན་གེ་མང་གི་ཝ་ ག་ཤོ་ཝ་ཅོད་པེ་དེན་གེ་ གཙོ་བོ་གི་ ཇ་ག་དབང་ཚད་གནང་མ༌ཅ།

11ཉི་ཨོམ་ ཇ་ག་ཡུང་ཟི་བ་ ཇི་གི་ཇ་ག་ཡི་གུ་ ཨོབ་ཏུར་ཨ་ཉི་ཐ༌ལེ། ཅོན་མ་ཝ་རི་ལེ་གོད༌ཅོ། ཉི་ཇི་གི་ནོ་ཝང་ཨ་ཁཱན་བ་ སེམས་ཀ་ཐའི། ཐུར་དང་ཐུར་ཀབ་ཉི་ཁ་ཆམ༌ཤོ། ཉི་སྐྱིད་པུ་ཨ་ཉི་ཆོའི། ཉི་ཤ་ སྙིང་རྗེ་དང་སྐྱིད་པུ་གནང་ཁཱན་ དཀོན་མཆོག་ ན་ཧ་བ་ཀབ་ཉི་ བཞུགས་ཉི་གནང༌མེ།

12ཐུར་གི་ཐུར་ག་ དམ་པའི་ཅུབ་ཨ་ཉི་ སྐུ་གཟུགས་བཟང་པོ་ཨ་ཉི་ཡེག༌ཅོ། 13ཉི་ཐ་ཆོ་ཁཱན་ ཡི་ཤུ་པ་ ཐམས་ཅན་གི་ ན་ཧ་ཏཱན་ སྐུ་གཟུགས་བཟང་པོ་དག་ཉི་ཞུ་ན།

14ཨ་ཧ་གཙོ་བོ་ཡི་ཤུ་ཁིརིས་ག་ ཐུགས་རྗེ་དང་ དཀོན་མཆོག་ག་སྙིང་རྗེ་ ཉི་དམ་པའི་ཐུགས་ཉིད་ག་ཆོས་གྲོགས་ ནའི་ཐམས་ཅན་ཀབ་ཉི་ བཞུགས་ཉི་གནང་ཆེན༎

ទើបបានជ្រើសរើសហើយ៖

གཉིད་པ་ཀོ་རིན་ཐི། 13: TNTB

គំនូសចំណាំ

ចែករំលែក

ចម្លង