Susuuon 8
8
1aNga aandaian dii i Soul do pinatai diolo i Sotipanus.
1b-3Nga kivaro piipiro tulun iri rumalan do sumamba di Kinoringan do mogiad marong do moginupus mongoi mongolobong di kojuvan di Sotipanus.
Papasansara i Soul di Tulun i Naparsaya di Yisus
Ontokno tadau diri om timpuunaino dii di tongotulun do pokoruol marong diri poiuuntunan di tongotulun i naparsaya di Yisus siri Bandar Yorusalim. Om kinampo dii i Soul mangavi mamatai di tongotulun si poiuuntunan di tongotulun i naparsaya, gosob do tumikid isido mindakod do tongovalai diolo do mangagajat di tongokusai om tongondu palabus do pojiilon. Iri nopo tongosusuuon di Yisus nga nokoopung siri Bandar Yorusalim; iri nopo tongotulun vokon i naparsaya di Yisus nga nokopoitotondijang tinumongkop si Vonuvo Yudia om Somoria.
Papaabar i Pilipus di Abar do Aandai siri Vonuvo Somoria
4Iri nopo tongotulun i nokopoitotondijang diri nga tumongkop do papaabar di tongotulun di Abar do Aandai. 5Om i Pilipus nopo nga rinumuuk siri Bandar Somoria. Isono isido saralom diri turu kojuvan i monulung di susuuon di Yisus. Papaabar isido di tulun siri bandar diri do i Yisus nopo nga pinili do Kinoringan sumiliu di Koristus. 6Korongou nopo dii i tongotulun toguu di tinangaran di Pilipus om nokoontong iolo di pongintutunan vinaaljo, om mongkinongou iolo kaandai-andai di tinangaranjo. 7Om oguu tongorogon sinunsub di Pilipus mantad di tulun rinosukan do rogon, om mongogijak do opuod i tongorogon do mogidu, om oguu tulun nokimai om tulun mimpo-kimpo mampanau do nolingasan. 8Jadi oguu dii iri tongotulun siri Bandar Somoria do ongaandaian i ginavo.
9Nga kivaro iso tulun, ngaranjo i Simun, do nokopogulu mantad di Pilipus nokoijon siri Bandar Somoria. Salaid isido siri Bandar Somoria, om apandai marong isido do silap mato gosob do oiranan marong i tongotulun Somoria disido, om misinggagajo isido kondiri. 10Om kasangkat di tulun do auso pangkat om iri tulun do agajo pangkat nga mongkinongou marong di Simun, do kadiolo, “Kikuasa isido mantad do Kinoringan, irino komoion ‘Kuasa Tagajo,’ ” ka. 11Om irino do minongkinongou marong i tongotulun di Simun sabap alaidno isido minamaal diri kapandaianjo, irino silap mato, supaya oiranan iolo. 12Nokorikot nopo dii i Pilipus siri om nokorongou dii iolo do papaabar i Pilipus di Abar do Aandai do potingkuro i Kinoringan momorinta di tongotulunJo, om pasal di kuasa do ngaran di Yisus Koristus. Jadi aparsaya dii iolo di tinangaran di Pilipus, om botisaino#8:12 botisai: boptoisai dii i tongokusai om i tongotongondu. 13Om i Simun nogi nga naparsaya om pokibatisno#8:13 pokibatis: pokibaptais dii. Nobotisan#8:13 Nobotisan: Noboptoisan nopo dii isido, om maja-vaja dii isido di Pilipus, do oiranan dii isido mongontong do oguu pongintutunan om kosunduvan vinaal di Pilipus.
14Nga nokorongou nopo dii i tongosusuuon di Yisus soi Bandar Yorusalim do naparsaya i tongotulun Somoria di tinangaran do Kinoringan, om minonuu dii iolo di Pitrus om i Yaya do poongoion soi tongotulun Bandar Somoria. 15-16Nga korikot nopo dii iolo soi Bandar Somoria om noilaan dii diolo do nobotisan i tongotulun Somoria saralom ngaran di Tuhan Yisus, nga aupo inosuan iolo di Tatod Tolidang. Jadi sambayangno dii i Pitrus om i Yaya di Kinoringan supaya oonuan i tongotulun i naparsaya di Tuhan Yisus di Tatod Tolidang. 17Om pinakama diolo iri tongotulun Somoria, om inonuan nogi dii iolo di Tatod Tolidang.
18Kaantangai dii di Simun do nakama di Pitrus om i Yaya i tongotulun om inonuan iolo di Tatod do Kinoringan, om potunujo dii di Simun iri siin si di Pitrus om i Yaya. 19Om kadisido, “Onuai oku diti kuasanu supaya isai-isai nopo akamaku nga onuan di Tatod Tolidang,” ka.
20Nga jawapno dii i Pitrus do ka, “Dii! Aui dii buli! Okonko bolijon ino kuasa do Kinoringan, supaya isai-isai nopo kamawonnu nga onuan di Tatod Tolidang. Nga iti nopo nga itaak noopo di Kinoringan. Nong irad dino, ongoino soi tapui naraka mivaja dino siinnu! 21Ausoi boogiannu diti karajaja, do au aandai ino ginavonu si di Kinoringan. 22Kororogono dino kararaato do ginavonu, om sumambayangkono di Tuhan supaya oompunankoi Disido dino dusonu do irad dino sinoromonu. 23Do oilaanku ino ginavonu noponu do duso om obintaai, om poingkogosko di dusonu,” kadi Pitrus.
24Nga jawapno dii i Simun di Pitrus om i Yaya do ka, “Tulungo okuno sumambayang do Tuhan, supaya au oku oontok do ukuman do irad dino,” ka.
25Om nokoopod nopo dii i Pitrus duvo di Yaya monorita pasal di kaandaio di Yisus si diolo, om pinopoilo di Abar do Aandai mantad do Tuhan, om ulino dii iolo soi Bandar Yorusalim. Om moguapit dii iolo papaabar di Abar do Aandai siri tongokampung soi Vonuvo Somoria gosob do nokorikot siri Bandar Yorusalim.
I Pilipus om i Tulun Kipangkat mantad si Vonuvo Tiupia
26Om kivaro iso moloikat do Tuhan rinumikot si di Pilipus, om sinuu disido i Pilipus irad diti, “Ingkakatno om pampanauno mongoi soi salatan soi ralan mantad soi Bandar Yorusalim pakaayan soi Kampung Gasa,” ka. Iri nopo ralan diri nga soi padang do kovotuvan. 27-28Jadi nokosodia nopo dii i Pilipus, om pampanauno dii isido mongoi siri ralan diri. Korikot dii isido siri om naantangan dii disido do kivaro iso pagawai poinsako do korita. Isido nopo nga tulun mantad si Vonuvo Tiupia. Agajono pangkatjo do mangajaga isido do siin di raja tongondu soi Tiupia. Ngaran nopo di raja dii nga Kandaki. Minongoi iri pagawai diri soi Bandar Yorusalim do sumamba do Kinoringan. Om poinsako isido di koritajo do muli soi Tiupia. Ontok do manau-panau iri korita, masa-basa isido do buuk i tinulis di nabi Yasaya, i popolombus di tinangaran do Kinoringan. 29Nga sinuu di Tatod do Kinoringan i Pilipus do ka, “Pampanauno minsomok dilo korita,” ka.
30Om poginangkusno dii i Pilipus rumomut diri tulun siri korita. Om nokorongou isido di tulun diri do mambasa do buuk i tinulis di nabi Yasaya. Jadi duato dii di Pilipus iri tulun do ka, “Kaaratikoi dino basawonnu?” ka.
31Nga kadi pagawai, “Potingkukuro oku gia kaarati do ausoi tulun monuduk dogo?” ka. Om posokoo nogi dii disido i Pilipus om posonibojono dii isido mogom siri korita, om lombusno dii mampanau iri korita.
32Iri nopo tongotinangaran siri saralom Kitab di basawon di pagawai diri nga irad diti,
“Isido nopo nga irad do iso kambing biri-biri
do gajaton di tulun mongoi siri ponumbolian,
om irad nogi do iso tanak do kambing biri-biri
do au kouni siri gotuvang do tulun i mongogunting di vulujo om auso komijo.
33Om moluon Isido si di tongotulun.
Insan pun auso dusoJo,
nga au otulid i ginavo diolo do momutus Disido.
Om auso iso tulun kaanu monorita
pasal di rajatJo do pinatai Isido,”
kadi Yasaya.#Antangai Yasaya 53:7-8.
34Om duatono dii di pagawai i Pilipus do ka, “Isai komoion di nabi diti? Isido kondiri ko tulun vokon komoion diti?” ka. 35Timpuunno dii i Pilipus popoilo di pagawai di komoion di tinangaran binasa disido, om paabarono dii di Pilipus i Abar do Aandai pasal di Yisus.
36Nga ontok di manau-panaupo iolo, om nokorikotno dii iolo siri iso pantok do kivaig. Om kadii di pagawai, “Antangaipo! Kivaigi siti. Gaam nogi do mokibatis#8:36 mokibatis: mokibaptais oku dika,” ka.
37[Om kadi Pilipus disido, “Obulikoi botisan nong aavi-avi ino ginavonu do aparsaya di Yisus,” ka.
Om jawapno dii iri pagawai do ka, “Aparsaya okui do i Yisus Koristus nopo nga Tanak do Kinoringan,” ka.]
38Om suuono dii di pagawai poindada iri korita si timbing do vaig, om tuunno dii iolo mongiduvo di Pilipus om i pagawai om ruukno dii iolo siri vaig. Om botisai#8:38 botisai: boptoisai nogi dii di Pilipus i pagawai. 39Om nokotindal nopo dii iolo mantad siri vaig, om inongoino dii di Tatod do Tuhan i Pilipus. Om auno dii naantangan kavagu di pagawai i Pilipus. Om lombusno dii i pagawai mampanau mivaja do aandaian i ginavojo. 40Koilaaipo dii di Pilipus om sirino isido Kampung Astut. Om pampanauno dii isido mantad siri om popitongkop diri Abar do Aandai siri tongokampung gosob do nokorikot isido siri Bandar Koisoria.
ទើបបានជ្រើសរើសហើយ៖
Susuuon 8: LabukPKV
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
© 1995, Wycliffe Bible Translators, Inc. All rights reserved.
