1 Korintus 14
14
Monuduk Kavagu pasal di Sinundu i Nitaak di Tatod di Kinoringan
1Tomod-tomodo mujuno do au kojuu do vokon, om mantad dino logos kouno mokianu di sinundu iri itaak di Tatod di Kinoringan, i koisono marong kaanu kou di nitaak do koilo popolombus di nituduk do Kinoringan si ginavo muju. 2Do ii nopo tulun di koilo mitangar do moisosondiang tinangaran om okoniko kumitatangar isido di tulun nga i Kinoringan, do auso iiso tulun kaarati do komoion di tinangaran disido do mitangar isido diri mantad do kuasa di Tatod do Kinoringan om poinlosok iri komoion. 3Nga tulun nopo do koilo popolombus di nituduk do Kinoringan si ginavojo nga tuluni tangaron diri supaya papanggor di kaparsayaan diolo, om pogirot di ginavo diolo om nogi monoluod.#14:3 monoluod: monginsasamod 4Nga ii nopo tulun mitangar di moisosondiang tinangaran nga pogirot di ginavojo kondiri do aparsaya. Nga tulun nopo do koilo popolombus di nituduk do Kinoringan si ginavojo nga pogirot do kaparsayaan di tulun siri poiuuntunan do tulun di aparsaya. 5Aandaian oku nogi daa do koilo kou kasangkat do mitangar do moisosondiang tinangaran, nga makinpo dii kaandai nong koilo kou popolombus di nituduk do Kinoringan si ginavo muju. Do tulun nopo di koilo popolombus di nituduk do Kinoringan si ginavojo nga lobi kiguna mantad do koilo mitangar do moisosondiang tinangaran. Nga nong kivaro nopo tulun papaarati di komoion di moisosondiang tinangaran nga aandai daa, supaya kapanggari i ginavo di tulun si poiuuntunan do tulun di aparsaya.
6Oou kosusuladanku, nong irad dino, onu dii untung muju nong rumikot okuno sino dikovu om moisosondiang dino tinangaranku do monuduk dikovu? Ausoi dii untung muju. Nga apatut do ivantangku dikovu iri pinointalang do Kinoringan si dogo, ko monuduk oku di toilaanku di tongoralom, ko popolombus oku diri nituduk do Kinoringan si ginavoku, ko monuduk oku dikovu di ponudukan vokon. 7Do moisosondiang nopo tinangaran nga irad di suling ko tongkungon#14:7 tongkungon: kolubung i tunijon do auso koimbano di dolou,#14:7 dolou: bongut do au dii otutunan do moisosondiang dii dolou nong au aatur i pogugunijo. 8Om nogi nong au popuodon pouni i toburi#14:8 toburi: torumpit ausoi dii kavaja sumodia do mongoi moipaparang. 9Om irad nogi dino ponunuduk muju nong mitangar kou diri moisosondiang tinangaran iri au orotijan di vokon, aui dii kaarati i tulun di komoion muju, do i ponudukan muju irad di sarup do au oilaan i koongongoio. 10Okonko aalang-alang ginuu tinangaran siti vonuvo, nga insan irad dino koguu, kasangkat dino tinangaran diri nga kivaro nopo arati. 11Nga au nopo kopiarati do tangar om roitonkuno i tulun do bansa sondiang, om isido nogi nga mangarait dogo do bansa sondiang. 12Nong sabap do agajo ginavo muju do mokianu di sinundu itaak di Tatod do Kinoringan, aandai do ovi-ovion mujuno ino ginavo muju do mokianu di sinundu iri itaak Disido diri papapanggor di kaparsayaan di tulun si poiuuntunan muju.
13Sabap diri do isaai nopo iri noonuan do sinundu do koilo mitangar di moisosondiang tinangaran nga aandai do sumambayang supaya onuan isido nogi di sinundu do koilo papaarati do komoion diri. 14Ioku nopo dogo ontok do sumambayang do sondiang tinangaran nga oinomodi dii do i tatodku i sumambayang, nga i pikiranku auso taanu-anu do aui kaarati nong onu iri tangaronku. 15Jadi potingkuro okupo dii? Irino dii do mamakai okui do tinangaran di auku orotijan do sumambayang ko sumindingpo#14:15 suminding: lumongoi i tatodku, om mamakai oku nogi di tinangaran di orotijanku do sumambayang ko sumindingpo i pikiranku. 16Do nong irino tatodnu do monorimakasi do Kinoringan, aui dii kadapat i tulun vokon si poiuuntunan mangamin di sambayangnu do aui iolo kaarati di sambayangnu. 17Om aandaino bo marong i ponorimakasinu diri nga aui kogirot di ginavo do tulun vokon.
18Monorimakasi oku di Kinoringan do mitangar oku do moisosondiang tinangaran lobi mantad dikovu kasangkat. 19Nga saralom nopo do poiuuntunan do tulun di aparsaya nga aandaian oku nogi mitangar do limo tinangaran diri buli orotijan ko iri opulu noribu tinangaran diri au orotijan di tongotulun supaya kadapat oku monuduk di tongotulun.
20Oou kosusuladanku, ada posuguto do sinoromo do tangaanak ino sinoromo muju, nga posukodo mujuno ino sinoromo muju dino. Nga nong vavaalon do tongoraat om apatut kou do tumanganak. 21Kivaro tangar do Tuhan nokotulis siri Kitab do ka,
“PinakaiKu i tongobansa vokon do mitangar diti tongotulunKu
om pinakaiKu i tinangaran di tongotulun do moisosondiang
i kosusumbai do mitangar diolo,
nga insan irad dino aui mangasip Dogo iti tongotulunKu,”
kadi Tuhan.#Antangai Yasaya 28:11-12; Gulion 28:49.
22Jadi nong irad dino, iri nopo sinundu do mitangar di moisosondiang tinangaran, irino tanda kuasa do Kinoringan do pinointalang si tulun di au aparsaya, okoniko si tulun di aparsaya. Nga iri nopo sinundu do koilo popolombus di nituduk do Kinoringan si ginavo, irino pongintutunan do kuasa di Kinoringan do kakaa si tulun di aparsaya, okoniko kakaa si tulun di au aparsaya. 23Jadi, nong ountun kouno siri poiuuntunan om pointikid-tikid dikovu nga mitangar do moisosondiang tinangaran, om kivaro dino tulun do maja toomod si poiuuntunan ko tulun kaapirpo do minongoi siri poiuuntunan muju, potingkuro? Tantu ponguranan kou diolo do mulau. 24Nga nong kasangkat dikovu koilo popolombus di nituduk do Kinoringan si ginavo muju, om kivaro dino tulun di kaapir ko i tulunpo di maja toomod si poiuuntunan do korongou di pinolombus muju, nga tantu do araat si ginavojo do mongondom do dusojo, om agajat i ginavojo do aparsaya di pinolombus muju. 25Om irino dii kointalangan diri sinoromo do poinlosok si disido gosob do tumungub isido sumamba do Kinoringan om sampai do mitangar do, “Oinonomod do siti dikovu i Kinoringan,” kadisido.
Pongoturan do Poiuuntunan di Tulun di Aparsaya
26Oou kosusuladanku, komoionku nopo do irad dino, nga irino do ontok do muntun kou do sumambayang nga aandai do kivaro momimpin do sinding,#14:26 sinding: lolongoi om kivaro monuduk do tinangaran si Kitab, om kivaro pavantang diri pinointalang do Kinoringan si disido, om kivaro mitangar do moisosondiang tinangaran om nogi kivaro papaarati di komoion di tinangaran diri. Nga aandai do kasangkat diri gaagaya muju nga papapanggor di kaparsayaan di tulun si poiuuntunan muju diri. 27Om nong kivaro mitangar diri moisosondiang tinangaran nga sukupno do duvo ko tolu kojuvan do moisusuvoli, om misti do kivaro iso tulun do buli papaarati di komoion do tinangaran diolo diri. 28Nga nong ausoi koilo di komoion do tinangaran diri, om aandai nogi mindada nopo iolo siri poiuuntunan om kumitatangar i ginavo diolo kondiri di Kinoringan.
29Om nogi aandai nong kivaro duvo ko tolu nabi monuturan, irino tulun popolombus di nituduk do Kinoringan si ginavojo, om i tongotulun vokon nopo nga minsoromo diri ponudukan diolo nong kangaam ko au. 30Nga nong kivaropo kavagu iso tulun do siri poiuuntunan do kivaro pinointalang do Kinoringan disido, nga misti do tumingkodpo dino iri monuduk om posuvolijon isido. 31Sabap kasangkat dikovu nga koiloi do popolombus di nituduk do Kinoringan si ginavo muju, nga moisusuvoli kouno monuturan supaya kopoiomit kovi om nogi gumirot i ginavo muju do aparsaya. 32Do ii nopo sinundu i nitaak di Tatod do Kinoringan nga buli porintawon di tulun i pinataakan; 33-34sabap i Kinoringan nopo nga au moo do ourau tokou nga aandaian do kopiandai tokou.
Om i tongotongondu nopo siri poiuuntunan muju tulun di aparsaya nga aandai do songotos-otos irad siri tongopoiuuntunan vokon, do au iolo posuarawon siri poiuuntunan do insan i Undang-undang Ugama do Joudi pun nga monuduki do misti minsuribak iolo. 35Nong kivaro nopo pokiilaan disido nga aandai do siri valai kondiri om mokiilo nogi dino di savojo. Do koikum-ikumi di tongondu nong mitangar do siripo poiuuntunan.
36Andasan muju daa do ikovu noo nontodon di tinangaran do Kinoringan, om ikovu noopo pinorikatan diti tangar Disido nga aui. 37Nong kivaro tulun minsoromo do, “Iokuno nabi,” ka, ko minsoromo do, “Noonuan oku di sinundu nitaak di Tatod do Kinoringan,” ka, nga apatut do oilaanjo marong do iti nopo tinulisku dikovu diti nga i nisuu marong di Tuhan. 38Nga au nopo podulionon disido iti tinangaranku nga ada muju podulio isido.
39Oou kosusuladanku, irad nopo dino giat kouno do mokianu di Kinoringan supaya koilo kou popolombus di nituduk Disido si ginavo muju, om ada potingkodo i tulun i mitangar di moisosondiang tinangaran. 40Nga apatut do kasangkat diri nokomoiku do vojoon muju kaandai-andai om aatur.
ទើបបានជ្រើសរើសហើយ៖
1 Korintus 14: LabukPKV
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
© 1995, Wycliffe Bible Translators, Inc. All rights reserved.