Ruma 4
4
Pablu Foyungan sas Abrayam Baliwa
1Ay katsi, amatangani yap at kin-gurungan sas taw Udyu at fufuwama ebi, at ngayan Abrayam. 2-3Diyus ebi, nu glag Abrayam, kata tuwa sik taw yud e asalanan. Ay at fagnalongun te Abrayam kata sik taw yud e asalanan, bunwa te, Abrayam fagbulun masine dawdaw. Antuwa te, Abrayam gafanud tuwa. Madyay si tam Diyus fanlongan, e tapan tam te, “Abrayam gafanud tuwa sas Diyus. Ay Diyus nu glag Abrayam, kata wa sik taw at yud e asalanan, teway Abrayam gafanud tuwa sas Diyus.”#4:2-3 Fagsigadan 15:6 Ay nu katanya, Abrayam wa mafalong sa tam Diyus te, “Aw wan at nafasine angku mandi.” Satu ro, nu kanya way at ke fagbulun, Abrayam mafafandaragang wadi. Ay roro ngap, tam Diyus tuwa at ke fagbulun.
4Sik taw nu gfon sat usama at nafagbulunan, wa ro tam mafalong te, sik famanyun kanya. Teway kanya at fansali way at nalufuyan. 5Ay roro tam Diyus at nafagbulun sas tagasalanan, kata tuwa sik famanyun. Teway sik tagasalanan nu antuwa gafanud sa tam Isus, tam Diyus nalong wa gugat anya te, “Nu glag aw emu, kata wo at yud e asalanan.” Kanya fag taw ye nafagbulun. Nafanud yay fagsadi. Ay dewa katanya, tam Diyus nalong wa gugat te, “Kata wo yud e asalanan.”
6-8Katanya yangay at sadik danyu at marirukan si tam Diyus fanlongan. At nariruk kanya fag danyu, sik fun, at ngayan Dabid. Ay kanya fag danyu, sa baliwa sik taw at ke nasalan. Kanya unu fag taw, guseganan dawdaw, te dewa e nasalan, Diyus di ban gamatangan. Glong te, sit danyu, “Igbiya wa long fag fagusegananun, tam Diyus nu nalong tuwa antam te, ‘Dewa o e asalanan ayuwayu, kanya fagayu nafalyam kwan. Dakdi ban gamatangan.’ ”#4:6-8 Danyu 32:1-2 Katanya Dabid danyu.
9Ay tam Diyus faglongan, te, “kata wam yud e asalanan,” bundi fagtvngvd sat matulian fag fulan taw, taw Udyu. Antuwa sas fagayu tagafanud. Ay at sadik tagfatuyan katanya, anwa tam fufuwama Abrayam. Aro, nalong watam te, Diyus nu glag Abrayam, kata sik taw yud e asalanan, teway Abrayam gafanud tuwa sa anya. 10Ay go sangay ngatu, ginanya ro Abrayam matulian wan? Roro idya, Abrayam ya matulian ginanya. Bandi yay baliwa, Abrayam nu gfatuli. 11Ay bunwa at nafatulian at nafasine Abrayam. Roro dan wa gugat gafanud sas Diyus. At fanambagun at nafatulian, sik famaamatang wadi. Igfaamatang sas Abrayam te, “Katsi tam Diyus nu glag angku, kata tuwa sik taw yud e asalanan.”
Nu katanya, dewa tam sik taw yud matulian, nu gafanud tuwa tam sa tam Fun, itam wan Abrayam fufu. Kata watam anya. Ay tam Diyus nu glag antam, anggan itam, kata watam sik taw yud e asalanan. 12Ay dewa tam sik taw matulian, nu gafanud tam sa tam Fun, itam yangay Abrayam fufu. Teway gafanud yangay tam sa tam Fun kata ebi tam Abrayam nu gafanud. At mafanud bunwa te, go matulian ay go yaya. Madyay Abrayam bagu nanfatuli, dan wa gugat gafanud.
13Sayginan, Diyus inke fatuyanan sas Abrayam, te igfon wa ban fagdaul daga sas Abrayam ay anggan sat ngay fufu sat dagat daga. Ay takanya Abrayam fakasafulan, te, “Umgurungan wa ban fiya Diyus fatuyanan sa angku?” Go at fakasafulan, “Umgurungan wa ban, teway nafafaning aktuwa Diyus at ngay suguwan?” Roro yaya, wa katanya at fakasafulan. At fakasafulan antuwa te, “Umgurungan wa ban fiya Diyus fatuyanan sa angku, teway kata aktuwa sik taw at yud e asalanan, teway gafanud aw sas Diyus.” Katanya Abrayam fakasafulan.
14Nu katanya, lag tam gamatangan te, nus nga sinu way at fafaningun Diyus ngay suguwan, kanya way at mafafabul Diyus at ngay nafatuyanan. Lag tam gamatangan katanya, teway nu katanya way ro tam Diyus fagbulun, deyud wan tam naafanudan sa tam Fun Isus. Ay tam Diyus fatuyanan nu sedaw, wa ro umke fanambagun, teway fakatanyaun, wa ngani e taw at nafafaningun. Ay Diyus ro we fagfonan kanya at nafatuyanan.
15Nu dway ro inke suguwan ayuwayu, at ngay taw fagayu, wa ro e fakamaboun. Ay roro tam Diyus nafon wan at ngay suguwan sas taw, ay at ngay taw wa nafafaning. Ay nu katanya, kanya fag ngay suguwan igfatagak way sas taw te, tam Diyus ban anway e faurianan.
16Ay roro itam taw deyud tam nafafaningun tam Diyus suguwan, tam Diyus kafanyu tuwa gugat antam. Ay gafonun tuwa gugat at ngay nafatuyanan. Nu katanya, kanya nalong antam te, “Afanudi ngay sa angku, igfon akwa fiya ayu ku ngay nafatuyanan.” Ay katanya tuway, fagayu tagafanud, dewa tam sik taw Udyu ay dewa tam sik taw yud Udyu, fabul watam fiya Diyus nafatuyanan, teway fakatanyaun itam wan Abrayam fufu. Gafanud tam sa tam Fun kata Abrayam nu gafanud.
17Nu katanya, katsi, in-gurungan wan, at sadi tam Diyus fatuyanan sas Abrayam. Tam Diyus nalong sas Abrayam te, “Igfaayu ban aw am ngay fufu sat dagat daga, anggan wa umsik ngay fulan taw ayuwayu.”#4:17 Fagsigadan 17:5 Ay katsi itam wa ngani. Tam Diyus nu glag antam, itam wan, Abrayam fufu sat dagat daga.
Tam Diyus, Abrayam fagafanudan fag Diyus, mafagurungan tuwa at ngay nalong. Madyay kanya mafaleleg tuwa at kinkate. Ay nu naelongan wa te, “Aawati kanya,” inkawat wa fiya daw kata at fasadan.
18Ebi, kata way nangus yud umgurungan tam Diyus nalongan sas Abrayam te, “Faayu ban aw am ngay fufu, kayus galeme sas banwa.”#4:18 Fagsigadan 15:5 Ay dewa katanya, Abrayam gafanud tuwa, sas Diyus nalongan baliwa. Igfanseg te, katanya wa ban fiya. Ay nu katsi wan, at ngay fufu sat dagat daga sik ngay fulan taw wa fiya ayuwayu.
19-20Ebi, Abrayam igsaful way, te kanya wa long ro kaunga. Mafufuwama wan ay dawdaw. At kadugayan, manga sandan wak banwa. Ay dewa katanya, Abrayam matvngvd tuwa nu gafanud sas Diyus. Ay dewa te, at mangena wa gunga ebi ginan, gafanud yadi, te Diyus mafagurungan at longan. Ay Abrayam nu gafanud sas Diyus, di ginfolian. Matvngvd tuwa gugat. Ay dewa te ya n-gurungan Diyus fatuyanan sa anya, Abrayam guseganan wa gugat sa tam Diyus, 21teway nasaful wa te, Diyus galay e fatuyanan, mafafagurungan wa fiya. 22Katanya Diyus fagnalongun te, “Nu glag aw Abrayam, kata tuwa yud e asalanan.”
23Ay katanya tam Diyus at longan, bundi sas Abrayam fagsadi. 24-25Sa tuwas fagayu tagafanud sa anya. Anggan sa antam katsi fag ngay tagafanud, tam Diyus nu glag antam, kata tuwa tam sik ngay taw yud e asalanan.
Ku ngay fadugsay, igsaful tam te, ebi tam Diyus, nafabayan wan tam Fun Isus nu kate, teway sik ngay tagasalanan way tam ay. Ay bandi ataw, tam Diyus igdog yay nafaleleg anya, laman ban tam Diyus mafalong tuwa sa antam te, “kata wam yud e asalanan.”
ទើបបានជ្រើសរើសហើយ៖
Ruma 4: TAWEAST
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
Copyright © 2023 by OMF International, Philippines
