Ruma 10
10
1Ku ngay fadugsay, at sadi ku darangin sa tam Diyus, mason nu get aw te, Diyus nangus falangfei tuwa ku ngay iba, taw Udyu. 2Teway kafanyu aw dawdaw gamatang. Nasaful aw te, ku ngay iba gugatan dawdaw igfaumsiganan tam Diyus. Ay roro wa gsaful te, tam Diyus fakaumsigun fiya fiya, ani tuwa afanudi. 3Wa nasaful tam Diyus faran laman mafalong sas taw te, “Kata wam yud e asalanan.”
Ay katanya wayay, kanya fag ngay taw Udyu at yud gafanud, anwa mandi gfagbulun at nasaful. Naawat wan at faran mandi, laman unu umkata sik ngay taw yud e asalanan. Ay wa nafaning sis Diyus at faran. 4Teway tam Diyus faran laman umkata tam sik taw at yud e asalanan, ani way afanudi sa tam Fun Isus. Teway tam Diyus suguwan dewa ngayu ayuwayu, tam Fun Isus at nafagbulun nasali wan tam nalangfe fagayu.
5Sik taw nu kaumsig umsik yud e asalanan, e duwak faran. At sadi, glong te, faningi yap tam Diyus suguwan fagayu fagayu, ay anwa fiya umsik taw yud e asalanan. Kata tam tapan sis Muisis rirukan, glong te, “Sik taw fafaninguni ngay tam Diyus at ngay suguwan, umke leleg wa fiya tagsiginans Diyus.”#10:5 Lebitiku 18:5 Katanya at sadik faran.
6-7Ay roro e faran yangay sadi. At faduwak faran, afanudi sa tam Fun Isus, ay tam Diyus nu glag antam, kata watam sik taw at yud e asalanan.
At faduwak faran, di e suguwan sa antam, te fagbuluni yap. Nu katanya, lag gamatangan te, “Sek, mataka dawdaw sik taw nu kalangfe. Kata ro nu nangato tam sas banwa, ay nu nanlo tam sas matean at talun, katvngvd anya yangay nu mataka tam fagbulun laman nangalangfe.”#10:6-7 Diyuterunumyu 30:12-13 Roro di katanya. Di mataka. Teway tam Fun Isus, indaga wan ay siginans banwa, ay batang wa nangate. Kanya wan at nafagbulun at mataka fagayu.
8Nu katanya, kanya fag foyungan taglong te, “Afanudi sas Isus,” bundi sik masuksuk fag foyungan. Igsaful watam igfoyung sa tibak taw, ay igsaful watam gamatangan kanya fag foyungan.#10:8 Diyuterunumyu 30:14 Ay kanya wa ngani em fagfoyungun gugat sa sangay taw.
9Katatuy em foyungan. Sik taw nu glong tuwa te, “Isus wan ku Fun,” ay nu gafanud yangay te, Diyus nafaleleg tam Fun Isus ebi gina nkate, nu katanya tuwa, kanya fag taw umlangfe wa ban. 10Teway nu gafanud tuwa tam si tam amatanganan, ay nu mafalong tuwa tam te, “Isus wan ku Fun,” kata watam sik ngay taw yud e asalanan. Ay tam Diyus igfalangfe wa ban fiya antam. 11E tapan tam ngani si tam Diyus fanlongan taglong te, “Nu gafanud tuwa tam sa tam Fun, di ban tam lumong te, ‘Nasalan way mangaro nu gfili aw ku fagafanudun.’ ”#10:11 Isayas 28:16 Teway gtungul tuwa nu gafanud tam sa tam Isus.
12Nu katanya, dewa sik taw Udyu ay dewa sik taw yud Udyu, nu gafanud tuwa tam sas Isus, umlangfe tuwa tam. Teway sadi way tam Fun, tagmagurang fagayu. Tam Diyus way fagsadi. Ay tam Fun gimalu fiya fiya fagayu tagfanseg te, “Kanya wan tagfalangfe angku.” 13Madyay e tapan tam sa sik afud tam Diyus fanlongan, taglong te, “Nus nga sinu tagfanseg sa tam Fun te, ‘O wan tagfalangfe angku,’ tam Fun igfalangfe wa fiya.”#10:13 Uwel 2:32
14-15Nu katanya, katsi e suguwan tuwa sa tam Diyus at ngay taw, te, “Loi, famoyungi at Masine fag Barita.” Ay kanya fag suguwan mafanud tuwa. Teway nu dway ro e suguwan katanya, wa ro e nanfamoyung. Ay way ro e nanfamoyung, tibak taw wa ro dumungug, sa tam Fun baliwa. Ay way ro e nadungug sa tam Fun baliwa, wa ro sumaful gafanud sa tam Fun. Ay way ro gafanud, wa ro sumaful gfanseg sa tam Fun, te, “O wan tagfalangfe angku.” Katanya at fagmafanudun, nu e gfamoyung Masine fag Barita. E tapan tam ngani si tam Diyus fanlongan, taglong te, “Masine dawdaw, sik taw nu antuwa nanlo, laman nanfadungug masine fag barita sa tibak taw.”#10:14-15 Isayas 52:7
16Ay roro, taw Udyu dewa nadungug at Masine fag Barita, roro wa ngayu sirut tagafanud. Sis Isayas rirukan e tapan tam te, “Em Fun, dewa ami nafoyung am longan sa sangay taw, wa bangan e gafanud.”#10:16 Isayas 53:1
17Ay dewa katanya, mafanud yay aro tam longan, te foyungi wa fiya tam Fun Isus sa sangay taw. Teway katanya wan nu gfadungug tam at foyungan sa sangay taw. Laman ro tibak taw nu nadungug wan, gafanud tuwa.
18Ay taw ro tibak taw Udyu fagyudun gafanud sas Diyus at longan? Go teway manga, we nafadungug anya? Roro muwag. Madyay e nafoyung wan dewas nganday. Kata tam tapan sa sik afud tam Diyus fanlongan, glong te, “E nafadungug wan sas fagdaul daga at ngay taw. At foyungan indasug wan dewas nganday fag fungfung daga.”#10:18 Danyu 19:4 19Ay nu katanya, taw ro taw Udyu fagyudun gafanud? Go unda wa natogdungug? Roro muwag, natogdungug wan. At fanlonganan, kauri way gafanud. Nu katanya, tam Diyus inke fasadan, te, nanfadungug yay sa tibak fulan taw at Masine fag Barita, laman ro at ngay taw Udyu malabian yadi.
Ay Muisis yay taguna tagfoyung antam katanya tam Diyus fasadan. Nu tumap tam sas Muisis rirukan, lumag tam ebi ebi tam Diyus longan sas taw Udyu. Diyus glong sas taw Udyu te, “Nu glag am kanya fag ngay taw yud Udyu, kata way sik fulan taw yud e fanambagun. Kata yud e nasafulan. Ay roro ngap aw, tumarabang aw ka fag ngay taw, laman ban umdotama am ay umdotina, ay laman ban malabian am anya.”#10:19 Diyuterunumyu 32:21 Katanya tam Diyus fasadan sas taw yud Udyu.
20Ay sa sik afud Isayas rirukan, tam Diyus nafalongun wan at fagalongun sas taw yud Udyu baliwa. Tam Diyus glong te, “Kanya fag ngay taw wa gsarap angku. Ay dewa katanya, igfoyung kyay ban anya, laman lumag yay angku.”#10:20 Isayas 65:1 Katanya tam Diyus longan.
21Ay tam Diyus dewa nananfalabianan taw Udyu, at ngayu, kamabo way gugat. Madyay sa sik afud Isayas rirukan, tam Diyus e longan te, “Glugo wa dawdaw nu gfanya aw taw Udyu nu kafoli sa angku. Glugo wan. Fakatanyaun, mason wa dawdaw kanya fag ngay taw nu kamabo.”#10:21 Isayas 65:2
ទើបបានជ្រើសរើសហើយ៖
Ruma 10: TAWEAST
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
Copyright © 2023 by OMF International, Philippines
