Ruma 1
1
Pablu Longan at Famasigad at Rirukan
1Tuy fag rirukan, siginan angku, Pablu. Aw wan tam Fun Isus fanuguwan at sadi, ay aw yangay at sadi tam Diyus filian, tagfadasug at fagalongun sa sangay taw. Tam Diyus wan at nafon angku katanya ku fagbulun, nu gfoyung aw at longan. Ay kanya fag longan, anwa at Masine fag Barita.
2Roro siginan ngay ebi ataw, tam Diyus igfoyung wan, sa baliwa kanya fag Barita. Tam Diyus igfoyung wa sa sik ngay taw, te, “Katsi ban, e fagafagbulunun aw at masine dawdaw. Ay at ngay taw ban dumungug at barita sa baliwa ku nafagbulun.” Katanya ebi Diyus longan. Ay ebi fag ngay taw at nadungug Diyus longan, nariruk tuwa at nadungug. Ay dewa sa antam katsi, nu gtap watam tam Diyus fanlongan, tumap yay tam ka fag ngay taw rirukan sa baliwas Masine fag Barita.
3Ay katsi, tam Diyus nafagurungan wan at longan. Nafagbulun wan at sadi at fagafagbulunun masine sa sangay taw. Nasugu wan at Baguwama ste swa daga. Ay tam nalong fag “Masine fag Barita,” roro kanya wa fag barita tagfoyung antam sa baliwa at Baguwama.
Tam Diyus gina nasugu at Baguwama ste swa daga, at Baguwama insik taw. Ay kanya fag taw, at fufuwama ebi ebi, at ngayan Dabid. Kanya sik fun tuwa.
4Ay nu gngayan tam tam Diyus Baguwama, anwa tam Fun Isus. Kanya wan tam Fagsegan. Ay kanya tam Fun Isus gina insik taw, kanya inkate, ay nadog yay gleleg. Ay at nafaleleg anya, anwa at Masine fag Falad. Ay roro katanya Masine fag Falad at nafagbulun at masuwad, igfasaful sas fagayu te, tam Fun Isus wan tam Diyus at Baguwama, ay kanya sik madaragang tuwa dawdaw. Katanya tuwa at masuwad, Masine fag Falad at nafagbulun gina gfaleleg tam Fun Isus.
5Ay katsi, tam Fun Isus nafon wa angku ku fagbulun, laman nanfamoyung aw sas yud Udyu fag ngay taw. Teway roro mangaro, at Tama wan at ke fasadan, laman nanfagbulun aw katanya. Fakatanyaun at fasadan sa angku, laman siginans fagayu fulan taw tagsadsamanan ayuwayu, e gafanud tuwa sa tam Isus. Ay laman kanya fag ngay taw igtunglus tuwa nu gfaning sa tam Isus, teway gafanud tuway anya. Nu katanya, katsi, kamoyung kwa fiya sas yud Udyu fag ngay taw, teway katanya nu gfauseganan aw tam Fun Isus.
6-7Ay ku fagfadasugan tuy ku rirukan, sas fulan Ruma at ngay taw tagafanud sa tam Isus. Ku ngay fadugsay, tam Diyus kesug tuwa ayu. Ay nataban tuwa ayu sa anya, laman am wan at ngay taw.
Ay igsaful kyangay te, nu fagayu wam sanya tagafanud, ngayu tuwa at taw yud Udyu. Ay dewa am sik ngay taw yud Udyu, tam Diyus nataban tuwa ayu sa anya. Ay nu katanya, katsi tam Fun Isus tuwa tagagbilug ayu.
Katsi gdarangin aw ayu fagayu sa tam Tama sas banwa, ay sa tam Fun Isus, tam Fagsegan. Igdarangin aw te, laman kanya falag tuwa nu kafanyu ayu, ay fanabayan tuwa ayu.
Pablu Galoun Dawdaw sas Ruma
8Katsi, taguna ngaro ku fagalongun, nanfoyung aw ayu ku fagusegananun. Katsi, nadungug wan nus nganday fag fulan taw, te “Tibak taw Ruma gafanud tuwa mangaro sas Isus.” Katanya ku fagusegananun. Ay igfadasug aw ku fagusegananun sa tam Diyus. Katsi mafafoyung watam tam fagusegananun sa tam Diyus, teway tam Fun Isus nafasadi wa antam sa anya.
9-10Ku ngay fadugsay, kayu ginan aw gdarangin, igdarangin kyangay ayu. Tam Diyus nasaful te, gurungan tuwa kanya ku longan ayu. Kanya wan tagfatuyan ku longan, teway kanya wan at nafon angku ku fagbulun, nu gfayamag aw sat Baguwama baliwa. Ay mafonan kwa fiya fiya sanya fag fagbulun.
Ku ngay fadugsay, at sadi ku darangin sa tam Diyus, get aw te, umdasug aktuwa nangus sanya sa ayu, tam Diyus nu kaumsig, teway glugo wan nu gananlagun aw sanya.
11Mason nu gananlagun aw ayu, teway igfanseg aw te, nu ndasug akdi sa ayu, mafafatarabang aw ayu, laman katvngvd tuwa baliwa nu gafanud am sa tam Isus. 12Ay roro ku fagsegun, bundi aw fagtvngvd tagfoyung ayu. Itam tuwa fagayu tagfadfatvngvdan tam sadi amatanganan, teway tanan tuwa tam gafanud sa tam Fun Isus.
13Ku ngay fadugsay, kaumsig aw fasaful ayu te ngayu ginan wan nu an aw igfasadanan nangadasug sanya sa ayu, sas fulan Ruma. Satu ro, nanfamoyung aw sanya fag ngay taw, laman tiba sumaful yangay gafanud sa tam Fun Isus. Teway ebi magngay sa tibak fulan, katanya wan ku nafagbulun. Nafamoyung aw sas taw yud Udyu, ay tiba nafanud wan sa tam Isus. Satu ro, katanya yangay ku fagbulun sa ayu, nu ndasug akdi sanya. Anway te, at fanlonganan, kwa gugat madasug sanya.
14-15Ay roro dewa e gsalag, igtunglus wa fiya nu an aw ganangadasugun sanya sa ay fulan, laman nanfoyung aw at Masine fag Barita sanya. Teway fakatanyaun ay ku amatanganan, gananfamoyungun aw dawdaw at Masine fag Barita dewas nganday fag fulan taw, teway kanya wan tam Diyus nafamato sa angku ku fagbulun. Dewa sat ke nagadalan ay dewa sat yud e nagadalan, gananfamoyungun aw at Masine fag Barita sanya. Katanya fagmatvngvdun nu an aw ganangadasugun sanya sa ayu.
At Masine fag Barita at Kamafanudan
16Aw dakdi kapla nu gfoyung aw Masine fag Barita, teway kanya mafanud tuwa dawdaw. At Masine fag Barita igfoyung antam te, nu gafanud tuwa tam sa tam Fun, umlangfe watam fiya. Ay tagfalangfe antam, anwa tam Diyus at fagmadaragangun. Ay siginan ngay ebi, ngayu wak taw Udyu tagafanud sa tam Fun. Ay tam Diyus nafalangfe wa fiya. Ay katsi, ngayu yangay at yud Udyu fag ngay taw tagafanud sa tam Fun. Ay tam Diyus igfalangfe yangay.
17Masine fag Barita igfoyung antam te, sik taw nu gafanud tuwa sa tam Fun, tam Diyus nu glag anya, kata tuwa sik yud e asalanan. Afanudi ngay, kata watam yud e asalanan. Wa tam e nayudanan sat dayu. Madyay sa sik afud tam Diyus fanlongan, iglong te, “Sik taw nu gafanud sas Diyus, Diyus nu glag anya, di e asalanan. Ay kanya fag taw, umke leleg wa fiya.”#1:17 Abakuk 2:4 Kanya at fanambagun nu gafanud tuwa tam.
Sik Famayamag sas Asalanan Baliwa
18Ku ngay fadugsay, bagu aw igfoyung ayu ku nasaful sa baliwa tam fagumke lelegun, igfayamag kyay ayu sas asalanan baliwa. Siginans banwa, tam Diyus glag wa gugat, te ste swa daga at ngay taw gasalanan wadi. Wa gfaning Diyus. Ay igsalag way at iba nu sumaful at matuyan. Ay tam Diyus kalimata way dawdaw, teway takatanya fag ngay ugali mauri dawdaw. Ay tam Diyus igfauri wan kanya fag ngay taw tagfagbulun mauri.
19-20Tibak taw tagfagbulun at mauri, igsarap way ro at famalusan. Lumong way te, “Teway em fagyudun nafaning Diyus, wami e nasaful sas Diyus baliwa.” Roro ngap, e nasaful wa fiya, teway siginan ngay bagu inkawat tam daga, tam Diyus igfasaful wa anya sas taw. At sadi Diyus famasaful sa sangay taw, anwa at ngay naawat. Itam taw wa tam glag tam Diyus fagmasineun. Anggan at fagmadaragangun, wa kalag. Ay roro nu glinggat watam tam Diyus ngay naawat ayuwayu, kasaful fiya fiya te, tam Diyus sik masine dawdaw, ay tam Diyus madaragang wa fiya dawdaw, ay at kadaragangan we fakatabuwan.
21Ay ka fag ngay taw ayuwayu, dewa e nasaful sas Diyus baliwa, wa nafauseganan tam Diyus. Wa nalong te, “Fadi, o wa fiya em Diyus, ay am ngay fagbulun masine wa fiya.” Fangkabat, nafarabing way sat dayu at ngay amatanganan. Ay roro katanya fag ngay amatanganan we fanambagun. Ay katanya wayay, kanya fag ngay taw wa mafabul tam Diyus foyungan.
22Kanya fag ngay taw nu gfasad, ngayu tuwa at fagsafulun. Ay roro kaugat wa baliwa nu gyud saful igfili at fagbulun, 23madyay wa gsaful igseg Diyus. Dewa te, tam Diyus at namadaragang wan, at ngay taw wa nanseg. At fagbulun, anway kawat at ngay fagsegan mandi.
Ay nu kawat at fagsegan, nafafaning way sik taw nu maawatan. Dewa te, Diyus di kate, ay taw kate wadi, sa ways takate baliwa at taw nu gfafaningan at fagsegan. Ay tiba at fagsegan, nafafaningan way manuk ay mangimut. Katvngvd anya at ngay taw nu gyud saful igfili at fagsegan.
24-26Siginans banwa, tam Diyus glag wa gugat kanya fag ngay taw fagbulun ste swa daga, te at ngay taw wa gseg anya. Wa gseg sat matuyan. Taw nu gseg ay nu gfaning, sa way at yud matuyan. Ay satu ro, sai tuwa tam Diyus, taw nu gseg. Teway tam Diyus wan at naawat fagayu ste swa daga. Kanya tuwa tagtungul tam fagsegan, faggugat. Kin, kanya wa fiya. Ay roro at ngay taw nu gseg, sa ways Diyus awatan.
Ay katanya wayay, tam Diyus nafabayan wan ka fag ngay taw nu gafanuguwanan at ngay fasadan at mafurat ay at ngay fasadan at mapla. Ay at ngay taw nu gfagbulun, nafasalan wa sis Diyus fasinean ebi. Sik ngay mangena, wa kaumsig nanfadiyugan mangama. At fakaumsigun, nanfadiyugan way sik ina. 27Ay katanya yangay anggan sik ngay ama. Wa kaumsig igfadiyugan mangena. At fakaumsigun, sa way sik ama nu gfadiyugan. Dewa te, katanya fag fagbulun mapla way, at ngay taw igfagbulun way. Ay nu katanya, tam Diyus, igfauri wan takatanya fag ngay taw. Ay Diyus nu gfauri, igfalungud wa sanya fag ngay taw at nafagbulun.
28Siginan ngay ebi, at ngay taw kauri way nangasaful sa baliwa at matuyan fag Diyus. Ay nu katanya, at ngay taw gafanuguwanan way at ngay amatanganan at yud matuyan. Diyus nafabayan wan at ngay taw nu gafanuguwanan katanya. Ay at ngay taw ayuwayu, igfaning wa at ngay fakaumsigun at yud masine sa tam Diyus.
29Ngayu wa ayuwayu at ngay taw ugali at yud masine. Kaumsig wa ayuwayu nanfagbulun mauri. Gabulun wa gugat gugat tiba fagekwaun. Ay igfagbulun ayuwayu at malimata sat iba.
Tibak taw igfangalabian. Ay tiba kamate. Tiba, kamaaringangan dawdaw tiba. Tiba, igfanluk, ay tiba, igfalimatan tiba nu gelongan. Tiba igfangelongan. 30Tiba, bulun wa gelongan sat iba baliwa at yud masine. Katanya fag ngay taw, igfalimatan way Diyus, ay igfalimatan yangay tibak taw.
Katanya fag ngay taw, anway igfaabatun anya, ay igfandaragang nu gelongan. Takatanya fag taw, wa gafanud nu at nanadan way gugat fag asalanan. At fakaumsigun, igsarap yay at bagu fag asalanan, laman ro kanya sigon igfagbulun tuwa. Takatanya fag ngay taw, wa gfaning at magurang longan. 31Ay wa gsaful igfili at masine at fagbulun. Katanya fag ngay taw, dewa e nalong, wa gfagurungan. Ay wa kesug tiba. Nus nga setvngvd tiba nu gatakan, wa long nangafanyu. Katanya tam nalag ayuwayu ste swa daga at leleganan.
32Ay tam Diyus nu nalag takatanya fag ngay fagbulun ayuwayu, kanya nalong te, “At masine ngap sas fagayu tagfagbulun katanya, atei wadi.” Ay kanya fag ngay taw, nasaful wa te, katanya wan Diyus at fasadan. Ay tam Diyus fasadan di gsalan. Ay roro at ngay taw dewa nasaful, igfatunglus way gugat nu gfagbulun mauri. Fangkabat, guseganan nu nalag te tibak taw sigon igfagbulun yangay mauri.
ទើបបានជ្រើសរើសហើយ៖
Ruma 1: TAWEAST
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
Copyright © 2023 by OMF International, Philippines
