Markus 8
8
Isus Nafafangon 4,000k Mangama
(Mat. 15:32-39)
1Ay ginanya fag ngay menit, sik ngay taw gdog yay inful sas Isus. Ay nu namin wan at fakonun, Isus nagewan at ngay tagadal ay nalong te, 2“Kafanyu aw nin fag ngay taw, anway katsi tulu wak menit nu maful ste si angku ay we fakonun. 3Ay gamatangan aw te, nu fauli kway ro sat ngay bale, manranug sa sangaba dalan, anway tibak taw ngayayu yay at fulan.” 4Ay at ngay tagadal ginto sas Isus te, “Daginan ro tam famaon nin fag ngay taw, madyay ste way tam sis talun at yud e taw?” 5Ay Isus nainto at ngay tagadal te, “Seyu sanya ay ba tinafay?” Ay at ngay tagadal gbalus te, “Fitu.”
6Ay Isus nafalunggung ka fag ngay taw, ay nabul ka fag fituk tinafay ay nafauseganan sas Diyus. Ay rodi nafanramyukan ka fag tinafay ay nafon sat ngay tagadal laman gfafafud sa sangay taw. Ay at ngay tagadal nafon yangay sa sangay taw. 7Ay sanya e ba uyang yangay ayu sirut ay wa ngayu. Ay Isus nafauseganan yangay sas Diyus, ay nasugu at ngay tagadal te, fafafudi sa sangay taw. 8Ay fagayu taw naon ay napsug wan. Ay at ngay tagadal nafaful yay at nagsawadan, fitu yak sabi mapnu. 9At kayuwan at nafangon undain 4,000k mangama. Ay nu intabu wan nu gfangon, Isus nafauli wan ka fag ngay taw. 10Ay rodi Isus nasakay wa sa sik balutu gasfuwan at ngay tagadal, ay nalo wa sas fulan Dalmanuta.
Taw Parisiyu Gyalagun sik Madulawan fag Fagbulun
(Mat. 16:1-4; 12:38-39; Lukas 11:16,29)
11Ay sik taw Parisiyu ndasug ay igfabadbaboan sas Isus. Ay ka fag ngay taw kaumsig Isus nu gfalag anya sik madulawan fag fagbulun siginans banwa, anway kaumsig igfaskud Isus. 12Ay Isus namatangan ay nalong te, “Taw ro katsi fag ngay taw at fagyalagun at madulawan fag fagbulun? Matuyan iglong aw ayu te, wa ban e gfalag sa ayu at madulawan fag fagbulun.” 13Ay Isus naubun wa ka fag ngay taw. Ay nasakay yangay sa sik balutu, ay nalo wa sat dife.
Isus At Fafaskudanan sa sik Famadaul Tinafay
(Mat. 16:5-12)
14Ay Isus at ngay tagadal wa namatang guba at ba yafun. Ay sadik tinafay way at ubanan sis balutu. 15Ay Isus nalong te, “Matagakani tuwa, ay saruyi taw Parisiyu at famadaul tinafay, ay anggan fun Erudes at famadaul tinafay.” 16Ay at ngay tagadal garingangan sit dayu te, “Fagnalongun katanya teway watam e ba tinafay.” 17Ay roro Isus nasaful wan at ngay tagadal fagaringanganun, ay nainto te, “Taw ro ay fagaringanganun te, wam e ba tinafay? Go sangay yam natogdungug? Ay go yam nasaful? Go gfaning way am gugat ay fasadan mandi? 18E ngay mata wam, ay roro wam glag. Ay e ngay talinga wam, ay roro wam gdungug. 19Ay go yam namatang ebi gina aw gfanramyukan limak tinafay, ay nafayafun aw 5,000k taw? Ay go seyu yak sabi at kinkapnu at nagsawadan?” Ay at ngay tagadal gbalus te, “Labi duwa yak sabi!” 20Ay Isus nainto yangay te, “Ay gina aw gfanramyukan fituk tinafay sas 4,000k taw, go seyu yak sabi at kinkapnu at nagsawadan?” Ay at ngay tagadal gbalus te, “Fitu yak sabi!” 21Ay Isus nainto yangay te, “Go yam nasaful aro ku nalong at masuwad, sa baliwas famadaul tinafay?”
Isus Nafafiya sik Taw Yud Glag
22Ay Isus ay at ngay tagadal nu ndasug sas fulan Betsayda, sik ngay taw nataban sas Isus sik taw yud glag. Ay ka fag ngay taw gfafanyuwan get sas Isus te, “Nu masine di tedi tuy fag taw laman glag tuwa.” 23Ay nu katanya, Isus nated at yud glag at daluwap ay nataban sas day fulan. Ay Isus natufe sa at yud glag at mata fag duwa. Ay rodi, Isus nafatayuk at daluwap sa anya ay ginto te, “Go glag o nus nge wain?” 24Ay ka fag ama kamantayan ay nabalus te, “Ku nalag sik ngay taw, ay roro kata way sik ngay kayu nu glo.” 25Ay Isus gdog yay nafatayuk at daluwap sa at yud glag at mata fag duwa. Ay infiya wa daw ay maliyo tuwa nu glag. 26Ay Isus nafauli wan ka fag ama sat bale. Ay nalong te, “Lag kafoli sas Betsayda.”
Pedru Nafoyung te, Isus, Tam Diyus at Nafili fag Fun
(Mat. 16:13-20; Lukas 9:18-21)
27Isus ay at ngay tagadal nalo yangay sa sangay fulan sirut sas Sesaria-Filipus fag fulan. Ay kaduge glo, Isus ginto sat ngay tagadal te, “Sinu aw, unu, ngay taw at longan?” 28Ay at ngay tagadal gbalus te, “Tibak taw glong te, Uan Tagfasurung o. Ay tiba glong te, Elyas o. Ay tiba glong yangay te, Diyus o at taglong.” 29Ay Isus ginto yay te, “Sinu aw nu gfasad am?” Ay Pedru gbalus te, “O wan Diyus at nafili fag Fun!” 30Ay Isus matvngvd nu gsalag te, “Lag gfoyung nus nganday fag taw te, aw wan Diyus at nafili fag Fun.”
Isus Naguna Nafoyung nu Mkate ban
(Mat. 16:21-28; Lukas 9:22-27)
31Ay Isus gfasigad gfoyung sat ngay tagadal te, “Aw, Taw at Baguwama, maris kban ngayuk mataka. Ay taw Udyu at ngay tagmagurang, ay at ngay taganyun daul, ay anggan at ngay tagfoyung Muisis at Suguwan umlimata ban angku ay e fate ban angku. Ay sa ban sfatuluk menit gdog kyangay gleleg.” 32Ay Isus nafayamagun wan nu glong sat ngay tagadal. Ay Pedru nataban Isus sat dayu ay igsalag anya. 33Ay Isus inbiling ay nalinggat sat ngay tagadal. Ay igbaya sas Pedru te, “Lag ste Satanas! Anway am amatanganan kata way sik taw at amatanganan, ay wa kata Diyus at amatanganan!”
34Ay Isus nafaful ngay taw, ay anggan at ngay tagadal, ay nalong te, “Sik taw nu kaumsig tuwa nangalo angku, ubuni tuwa at fakaumsigun mandi. Ay mafamasadani tuwa dewa sas fakateun, katvngvdan nu kaumsig nangalo angku. 35Anway nus nga sinu fag taw nu kesug way at leleg katsi, malyam wa ban at leleg. Ay nus nga sinu fag taw nu nafon tuwa at leleg sa angku ay nu nafoyung tuwa at Masine fag Barita, ka fag taw ban e leleg tuwa faggugat. 36Tain ban nu kin sik taw at fanambagun dewa nafabul fagdaul daga at nanuranan, ay at falad ban nu sa ways faurianan? 37Ay dewa nus nga seyu sik taw at nafon, wa ban mafafaleleg anya nu nkate wan. 38Nus nga sinu fag taw nu kapla way gfoyung angku ay anggan kapla gfoyung ku ngay longan sa sangay takamayun ay tagasalanan fag ngay sugfun taw, anggan ban aw, Taw at Baguwama, kapla akyangay ban anya. Gina ban aw kadasug stiye, e fagmadaragangun aktuwa siginan ku Mama, gfasfuwan at malayun sat masine fag ngay tagfabarita.”
ទើបបានជ្រើសរើសហើយ៖
Markus 8: TAWEAST
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
Copyright © 2023 by OMF International, Philippines