Matiyu 28
28
Isus Gdog yay Gleleg
(Mar. 16:1-7; Lukas 24:1-8)
1Nu nlangfe wa at Fakamatoun fag Menit, gina sis Linggu sis balabag, Maria fag taw Magdala ay sadi yak Maria nalo sas faglibingan laman nanlinggat. 2Ay nu ndasug wan sanya, daga nauwigan way sigad dawdaw. Fakatanyaun, tam Fun Diyus at tagfabarita at sadi ndaga siginans banwa. Ay kanya nafafulid at fandingding sakbawan fag batu, ay malunggung wa sanyas tungud batu. 3Ay at kamasuloan katvngvd sik fangkilat. Ay at balukas namalagsi wa dawdaw. 4Ay tagtanud fag ngay sundalu kudkulugan wan katvngvdan nu kalimu ay inkata wa nu matean.
5Ay ka fag tagfabarita nalong sa ka fag duwena te, “Lag kalimu, anway nasaful kwa te, gsarap am Isus, ebi at kintuktuk sas salibagan kayu. 6Ay kanya wa ste, anway kanya gdog wa gleleg, kata ebi ataw at longan. Stei, linggati wan si at fagfatungkudan. 7Ay nu nalag wam, loi wa mafali. Foyungi sas Isus at ngay tagadal te, kanya gdog wa gleleg siginan at fagmateanan. Ay nu katanya, kanya gumuna wa ayu sas talun Galiliya. Sanya wan nu lumag am anya. Ay kaba way niya ku longan sa ayu.”
Isus Insure sa sik Duwena gina si sangaba Dalan
(Mar. 16:9-11; Uan 20:11-18)
8Ay kanya fag duwena kadkalimuwan wan ay guseganan way ngap dawdaw, ay matarung tuwa nu glo laman nanfoyung sas Isus at ngay tagadal aro at nalag.
9Ay kaduge ka fag duwena sa sangaba dalan, Isus nafablang anya, ay nalong te, “Duwena!” Ay ka fag duwena nkakbang, ay natudan nated Isus at darafa, ay naseg anya. 10Ay rodi Isus nalong sanya fag duwena te, “Lag kalimu. Loi wan ay foyungi sa ku ngay fadugsay, laman kanya sigon suma yangays talun Galiliya, anway sanya yay ban nu lumag am angku.”
Taw Udyu at ngay Tagmagurang Igfanluk sas Isus baliwa
11Ay gina ka fag duwena nalo, tibak sundalu at natanud sas faglibingan noli wa sas fulan ay nafoyung sa sangay taganyun daul fagayu aro ataw at nalag sanya ginan. 12Ay ngay taganyun daul nu nafaful taw Udyu at ngay tagmagurang ay nu nasulitanan wan, kanya nafon sik ngay singku sanya fag ngay sundalu. 13Ay nalong sanya fag ngay sundalu te, “Foyungi sa tibak taw te, ‘Isus at ngay tagadal indasug sat faglibingan gina sad yabi ay nabul Isus at bilug kaduge ami gtiyug.’ ” 14Ay Pilatu nu nadungug katanya ay longan, falukmeanan ami anya ay igtarabang ami ayu te, laman di gfauri ayu. 15Ay at ngay sundalu nabul ka fag ngay singku. Ay nafaning aro at ngay taganyun daul at longan. Ay taw Udyu nafoyung ka fag longan anggan katsi.
Isus Nasugu At ngay Tagadal
(Mar. 16:14-18; Lukas 24:36-49; Uan 20:19-23; Fagbulun 1:6-8)
16Ay Isus at labi sadik tagadal nalo wan sas talun Galiliya, sa ebi ataw Isus at longan fag muyud. 17Ay nu nalag Isus, igseg anya. Ay roro tiba gfainfolian yay at amatanganan. 18Ay Isus inkakbang sat ngay tagadal ay nalong te, “Fagayu fagmadaragangun sas banwa ay sas daga nafon wa sa angku. 19Ay loi wan ay foyungi sas taw sas fagdaul daga sa baliwa angku laman kanya ban ku ngay tagadal. Ay fasurungi anya sa tam Tama fagmadaragangun, ay anggan sa angku, Diyus at Baguwama, fagmadaragangun, ay anggan sa at Masine fag Falad fagmadaragangun. 20Foyungi anya te, faningi ban fagayu ku longan sa ayu. Ay aw, si kwa ayu faggugat anggan ban sas fakatabuwan fag ngay menit.”
ទើបបានជ្រើសរើសហើយ៖
Matiyu 28: TAWEAST
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
Copyright © 2023 by OMF International, Philippines
