Matiyu 25
25
Isus At Fafaskudanan sa sik Safuluk Diyaga
1“Diyus nu gmagurang taw kata yangay sa sik safuluk diyaga nu e salung mandi gina nalo laman nanfablang takadaduwa fag ama gina kadasug. 2Ay at lima at yud way mamatanganan. Ay at lima mamatanganan tuwa. 3Ay at yud mamatanganan fag lima, dewa e salung mandi, we ubanan langis ulibu at fantalin sat salung. 4Ay roro at mamatanganan fag lima, e salung tuwa mandi, ay e ubanan tuwa langis ulibu at fantalin sat salung. 5Ay ka fag takadaduwa fag ama glugo yay nu kadasug. Ay kanya fag safuluk diyaga gatiyugun wan ay gtiyug wadi.
6“Ay roro gina swa bilug yabi, e nauro te, ‘Katsi kadasug wan takadaduwa fag ama. Lakloi fablangi anya.’ 7Ay kanya fag safuluk diyaga nfulo ay mafali nafaigang at salung. 8Ay at yud mamatanganan fag lima naet sat mamatanganan fag lima te, ‘Foni emi ay ba langis ulibu, anway em ngay salung gakalayungun wan.’ 9Ay at mamatanganan fag lima nabalus te, ‘Yaya, wa nsak em ba langis ulibu nu fagayu watam. Loi yap sa sangay tindan ay bilii yap mandi si ayu.’ 10Ay kaduge at yud mamatanganan fag lima glo, indasug wa fiya takadaduwa fag ama. Ay at mamatanganan fag lima, at mafamasadan, nasakbo wan igfaygaluwan anya sat fagfadaduwaan fag bale laman nanfangon. Ay e nadingding wan at sakbawan.
11“Ay rodi tv ndasug yangay at yud mamatanganan fag limak diyaga ay nauro te, ‘Em fun, em fun, fasakboi emi.’ 12Ay ka fag takadaduwa fag ama gbalus te, ‘Yaya. Matuyan iglong aw ayu te, kwa gtoglag ayu te, sinu am.’ ” 13Ay Isus nalong yangay te, “Matagakani tuwa, anway wam nasaful te, ginain ban fag menit ay ate fag uras nu kadasug aw.”
Isus At Fafaskudanan sas Tuluk Fanuguwan
(Lukas 19:11-27)
14“Diyus nu gmagurang taw kata yangay sik taw nu kamasadan glo sa tibak talun. Ay kanya nafakbang sa anya at ngay fanuguwan ay nafatanud at ngay nanuranan. 15Kanya nafon sat sadi 5,000k fisu. Ay sat sadi at nafon 2,000k fisu. Ay sat sadi, at nafon 1,000k fisu. Anway nu gfon, nus nga setvngvd wa ka fag fanuguwan at fagmafabulun. Ay nu ntabu wan, ka fag taw nalo wan sa tibak talun. 16Ay aro at taguna at nabul 5,000k fisu, nalo wan ay nafagbulun laman umkayu at singku. Ay bandi nfamut yay 5,000k fisu. 17Ay katanya yangay at nabul 2,000k fisu. Ay bandi ban infamut yay 2,000k fisu. 18Ay roro at nabul 1,000k fisu nalo wan ay naali way sasad daga laman nansandig way at fun at singku.
19“Ay nu glugo wan, ka fag ngay fanuguwan at fun guli wan. Ay ka fag fun nanginto wa sat ngay fanuguwan te, ‘Go setain ay fagbulun kaduge aw yud ste?’ 20Ay ebi at nabul 5,000k fisu nkakbang sat fun ay gubanan at fun nafamato sa anya fag ngay singku, ay anggan at kinfamut kayu yangay anya. Ay nalong te, ‘Ku fun. Na, am nafamato sa angku ebi fag 5,000k fisu. Kayu way tuy at kinfamut, 5,000k fisu yangay.’ 21Ay at fun nalong anya te, ‘Masine am nafagbulun. O wan at masine ay at matuyan fag fanuguwan, madyay wa ngayu ebi ku nafon emu. Ay katsi ban nanfamato kyay fiya sa emu ayu yap ban ebi. Ay katsi anggan o, useganani fasfuwani angku, am fun!’ 22Ay ka fag fanuguwan at nabul 2,000k fisu inkakbang yangay sa at fun ay nalong te, ‘Ku fun. Na, am nafamato sa angku ebi fag 2,000k fisu. Kayu way tuy at kinfamut, 2,000k fisu yangay.’ 23Ay at fun nalong anya te, ‘Masine am nafagbulun. O wan at masine ay at matuyan fag fanuguwan, madyay wa ngayu ebi ku nafon emu. Ay katsi ban nanfamato kyay fiya sa emu ayu yap ban ebi. Ay katsi anggan o, useganani fasfuwani angku, am fun!’ 24Ay ka fag fanuguwan at nabul 1,000k fisu nkakbang yangay sat fun ay nalong te, ‘Ku fun, nasaful aw te, o, sik malimu way o fag taw. Ay gbul way o dewa o at yud natanum. Ay gfaful way o dewa o at yud nafangukasan. 25Ay inlimu aw te, manalyam am singku. Ay nalubgub akway ngap sasad daga. Ay katsi, na, am singku ebi.’ 26Ay at fun nalong anya te, ‘Sek o! Mauri way o ay momuy way o fag fanuguwan. Nasaful wo te, gbul akyay, dewa aw at yud at natanum. Ay gfaful akyay, dewa aw at yud nafangukasan. 27Ay nu katanya, satu ro ebi nu nafon di o ku singku sa sik taw, laman nu kadasug kwan, nanbul aw ku singku ay anggan at kinfamut.’ 28Ay at fun nalong sa tibak fanuguwan te, ‘Buli wan ka fag 1,000k fisu siginan aro fag fanuguwan at mauri, ay famuti wa sat ke 5,000k fisu.’ 29Ay Isus nalong yangay te, ‘Nus nga sinu at ke kwa, e famut yay ban sa anya, laman ban umkayu yay si anya. Ay roro nus nga sinu nu dway e kwa, at sawad si anya nu alay way, e mul wa ban siginan anya. 30Ay ukasi wan aro fag fanuguwan at yud e fanambagun sasad marum. Ay sanya guyway wa ban dawdaw ay gfaringgitan at bagang.’ ”
Isus Nanfauri ngay Taw sa sangay Talun
31“Aw, Taw at Baguwama, gina ban aw kadasug ste swa daga gasfuwan fagayu tagfabarita, e fagmadaragangun ban aw dawdaw. Kadugenya, malunggung akban sa tiba tungud fag faglunggungan. 32Ay fagayu talun at ngay taw umful ban laman nangakbang sa angku. Ay ginanya ban, gfainkafudan aw at ngay taw, kata sik tagtanud balan nu gfainkafudan at ngay tupa ay at ngay kambing. 33Ay at ngay tupa gfatsa aktuwa ku siyun baliwa. Ay at ngay kambing gfatsa akway ku wala baliwa. 34Ay rodi aw, ay Fun, nanlong aw sa tagsa ku siyun baliwa te, ‘Am wan ku Mama at natarabang. Stei ay buli at nafon ayu fag ngay famanyun, teway Diyus wan at tagmagurang taw. Ay katanya wan Diyus at fasadan siginan ngay ebi sfagsigadan tam fagdaul daga. 35Anway gina aw kalunus, nafon tuwam angku ay fakonun. Ay gina aw kadanum, nafon tuwam angku ay fanginum. Ay gina aw kata sik betaw, nafasakbo tuwam angku. 36Ay gina aw gyud e balukas, nafon tuwam angku ay balukas. Ay gina aw e daylan, nananlag tuwam angku sa ku bale. Ay gina aw insungsung, nananlag tuwam angku sas bale fagsungsungan.’ 37Ay at matuyan fag ngay taw malus ban angku te, ‘Em Fun, yaya! Ginain sangay nu glag ami nu kalunus o, laman nanfayafun ami emu? Ay ginain sangay nu glag ami nu kadanum o, laman nanfon ami emu am fanginum? 38Ay ginain sangay nu glag ami emu kata sik betaw, laman nanfasakbo ami emu? Ay ginain sangay nu gyud o e balukas, laman nanfon ami emu em balukas? 39Ay ginain sangay nu glag ami emu nu e daylan o, ay anggan nu kasungsung o, laman nanlag ami emu?’ 40Ay aw, at Fun, malus akban anya te, ‘Matuyan iglong aw ayu te, ay nafagbulun dewa sat sadi ku fadugsay, ay dewa sa ku fadugsay at yud katvngvd tiba, roro nu gfagbulun am sa wa angku.’
41“Ay rodi aw, ay Fun, nanlong akyangay sa tagsa ku wala baliwa te, ‘Loi wan ste ginan. Lag stiye sa angku. Sai ways afuy at yud kalayung faggugat. Ay kanya fag afuy at nafamasadan laman at fakukasan ban Satanas ay anggan at ngay fanuguwan. 42Anway gina aw kalunus, wam nafon angku ay fakonun. Ay gina aw kadanum, wam nafon angku ay fanginum. 43Ay gina aw kata sik betaw, wam nafasakbo angku. Ay gina aw gyud e balukas, wam nafon angku ay balukas. Ay gina aw e daylan, ay anggan gina aw insungsung, wam nananlag angku.’ 44Ay kanya fag fulan taw malus yangay ban angku te, ‘Em Fun, ginain sangay nu glag ami emu nu kalunus o, ay nu kadanum o, ay nu kata o sik betaw, ay nu gyud o e balukas, ay nu e daylan o, ay anggan nu insungsung o, ay nu gyud ami gtarabang emu?’ 45Ay aw, at Fun, malus ban aw anya te, ‘Matuyan iglong aw ayu te, nu dway am gtarabang sa sik taw stiye at yud katvngvd tiba, kata duwam gtarabang anggan sa angku.’ 46Ay ka fag ngay taginto at fakadasugan sa ways faurianan at yud e fakatabuwan faggugat. Ay at matuyan fag ngay taw at fakadasugan sa tuwas leleg at yud e fakatabuwan faggugat.”
ទើបបានជ្រើសរើសហើយ៖
Matiyu 25: TAWEAST
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
Copyright © 2023 by OMF International, Philippines
