Fagsigadan 48
48
Akub nu Gdarangin Efraim ay Manasis
1Ay bandi daw, e nafoyung sas Use te, “Katsi am mama gadaylan way.” Ay Use nu nadungug katanya, nataban at dugsay Manasis ay Efraim, nanlag wa at fufuwama. 2Ay kanya nu ndasug wan, e nafoyung sas Akub te, “Katsi am baguwama Use ndasug wan.” Ay Akub nu nadungug, naugatan yay dawdaw inlunggung siginan at fagtiyugan. 3Ay iglong sas Use te, “Ebi gina aw sis talun Kanaan, sa sik fulan at ngayan Lus, tam Tiba Tungud insure sa angku ay inke fatuyanan sa angku, te, ‘E fagananfagbulunun aw ban masine sa emu.’ 4Igfaayu ban unu ku ngay fufu sat dagat daga. Ay kanya ban ku ngay fufu, ngayu ban unu fag fulan taw. Ay mon wa ban unu sa ku ngay fufu talun Kanaan, ay faggugat ban, kanya wa unu tagdagaan sanya fag talun.”
5Ay Akub nu nalong wa katanya, gfatunglus yay glong sat baguwama Use te, “Am unga fagduwa at kinsalug stes talun Iptu gina aw gyud indasug, kanya kata wa ban ku unga fiya fiya, kata wa ban ku Rubin ay ku Simyun. 6Ay tiba ban fagayu am unga sit dayu, si tuwa emu. Ay dewa gina nu kafud wam tam daga, fe afudi tuwa at daga sanya fag dugsay, kata si ku ngay unga fiya fiya. Ay nga seyu wa am unga sat daga, anya at daga sanya wa sis dugsay at daga.”
7Ay Akub igfatunglus yay glong sas Use te, “Anggan katsi kwa kalyaman ebi am mina nu kate. Ebi gbanwan yama tam sis talun Padan-Aram, sim mina talun, bandi ataw naalin watam sas talun Kanaan. Ay nu glo watam gugat sa sangaba talun Kanaan, gakadasugun watam sa sik fulan at ngayan Efrat. Ay nu makbang watam sanya fag fulan, am mina nkate wan. Ay nu gsandig ami at bilug si ways day dalan makbang fulan Efrat.” (Akub at nalong fag fulan Efrat, at taw nu gngayan katsi, Betleem wan.)
8Ay Akub nu nalag Use at ufud fag duwak unga, kanya nainto anya te, “Sinu kanya am ufud?” 9Ay Use nabalus te, “Kanya em unga wan, tam Diyus nafon emi kaduge ami gbanwan stes talun Iptu.” Ay at tama nalong te, “E kin nu gdi, fastei am dugsay. Nanfadait aw sa anya ebi tam Diyus at nafatuyanan sa tam aguyangan.” 10Ay ginanya Akub wa bangan glag, teway kafufuwama wa dawdaw. Ay nu kantanya Use nafaakbang wa fiya at dugsay sat fufuwama. Ay nut sanya wan, Akub naayuk ay nagafus. 11Ay Akub nalong sat baguwama Use te, “Ebi kwe fagsegun te, lumag kyay ban emu. Ay katsi guseganan aw te, roro mangaro tam Diyus at fasadan bundi o fagsadi ku faglumagun. Anggan tuwa am unga at duwa.”
12Ay Use nabul at dugsay siginan at fufuwama tungud balangbang. Ay Use natudan ay namalub, igfauseganan at tama. 13Ay nafaakbang yay fiya at dugsay sat fufuwama. Ay kanya fag talamian nu kadasug, siginan at fufuwama salubangan baliwa. Use nu gtaban at dugsay, nu gted at Manasis si at wala baliwa, laman ro gfalungud sit fufuwama siyun, ay nu gted at Efraim si at siyun baliwa, laman ro gfalungud sit fufuwama wala. 14Ay roro Akub nafasalibagan at take. Ay nafatungkud at daluwap at siyun sas Efraim at alfuyu dewa te kanya at ariyan way, ay nafatungkud at daluwap at wala sas Manasis at alfuyu dewa te kanya tuwa at turungana.#48:14 Ebi, ka fag fulan taw nu gfadait Diyus at fatuyanan, tiba ginan igted at alfuyu. Ay at fanted at siyun baliwa fag daluwap, teway kanya fag daluwap at ke fagmagongun. Ebi Use nu gtaban Manasis ay Efraim sa at tama, igfalungud Manasis sa at fufuwama at siyun baliwa teway Use at fasadan sai tuwa at turungana at fagmagongan laman ban glabi tuwa sat ariyan Diyus at famasegan anya. 15Ay Akub igdarangin wa dugsay laman ban Diyus gtarabang. Glong te,
“Dugsay am, siginan ngay ebi ku fufuwama Abrayam anggan sa ku mama Isaak, gfaning tuwa tam Diyus at longan.
Ay anggan si angku, siginan ngay ebi anggan katsi, ku banwanan fagngaba, tam Diyus wan tagufud angku.
16Ay nafalangfe angku siginan ku ngay fagatakanun.
Ay katsi glong aw te, kanya yangay ban tagufud ayu.
Ay kanya yangay ban tagfaayu dawdaw ay ngay fufu sat dagat daga.
Ay tam Diyus nu gufud tuwa ban gugat ay ngay fufu, ku ngayan ban kaamatang tuwa gugat.
Anggan ku aguyangan Abrayam ay Isaak at ngay ngayan, di kalyam.”
17Ay Use nu nalag te, at tama at siyun fag daluwap nu matungkud si way at ariyan at alfuyu, kanya inlimata at tama fagbulun. Ay nu katanya, nated at tama daluwap at siyun, satu nanfalin sat kaka at alfuyu. 18Kadugenya gelonganan te, “Mama, bundi kanya at kaka alfuyu. Tuy tuwa. Fastei tuwa am siyun.” 19Ay roro at tama wa kaumsig gfalin at daluwap. Ay glong sas Use te, “E kin sama, dewa katanya nasaful kwa te, kanya tuwa am turungana. Ay anggan ban si anya at ngay fufu sat dagat daga, ngayu tuwa. Ay dewa katanya at ariyan ban at ngay fufu ayu yap ay amadaragang yap ban sit kaka at ngay fufu. Sit ariyan ban at ngay fufu, sik ngay fulan taw tuwa ayuwayu.”
20Ay rodi Akub gfatunglus yay nu gdarangin sanya fag dugsay laman ban Diyus gtarabang. Ay glong te, “Tam Diyus tumarabang ban dawdaw ayu. Ay nu katanya, tam ngay fufu ban sat dagat daga gina gdarangin at tiba laman Diyus tumarabang, tiba ginan igdalan tuwa ban ayu ay ngayan. Glong ban te, ‘Tam Diyus tumarabang tuwa nangus ayu kata ebi nu gtarabang dawdaw Efraim ay Manasis.’ ” Nu katanya, Akub nu gdarangin dugsay, nafaguna nangayan at ariyan ngayan. At masuwad, Akub nafili at ariyan laman kanya ban taglabi at kaka.
21Ay Akub nalong sat baguwama Use te, “Katsi gakateun kwan. Ay dewa gina, dangay kalyam te, Diyus wa ban tagufud ayu ay tagfafoli tam ngay kalongan sas talun Kanaan, sa tam fagbanwanan siginan ngay ebi tam magurang yay. 22Ay si emu Use, e fon kwemu am daga sanya. Ebi nafabarangyan aw taw Amur. Ku famabarangyan, fana ay fiso. Ay nababo kwa fiya ay siginan ginanya, angku wan at daga. Ay kanya fag daga emui wa ban. Bunwa sam ngay fadugsay.”
ទើបបានជ្រើសរើសហើយ៖
Fagsigadan 48: TAWEAST
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
Copyright © 2023 by OMF International, Philippines