Fagbulun 20
20
Pablu Nalo sas Talun Masidunya ay Talun Gresiya
1Nu ntabu wa ka fag ngay tagaringangan, Pablu nafaful Isus at ngay tagadal ay nafabitsug at amatanganan. Ay nalong te, “Glo kwan katsi.” Ay kanya nalo wa sas talun Masidunya. 2Ay nu nadalan wa sanya, kanya nafoyung yay nafatvngvd at ngay tagafanud sanya. Ay sanya ginan nalo wa sas talun Gresiya. 3Ay Pablu nut sanya, tuluk magdanun nu si aba. Ay kanya nu nasakay wa sas balutu laman lumo sas talun Sirya, kanya nadungug te, taw Udyu gananfateun way mangaro anya, nu katanya, naamatangan te, “Umfoli akwan ay ku dalan sa was Masidunya.” 4Ay Pablu at ngay ufud gina guli, Supater, sik taw Berea ay Piru at baguwama. Ay anggan sik duwama siginans Tesalunika, Aristarku ay Segundu. Ay anggan Gayu, sik taw Derbe, ay anggan Timutiyu. Ay anggan sik duwama siginans Asia, Tikiku ay Trufimus. 5Kayunya at naguna emi ay nafanya emi sas fulan Truas. 6Ay ami, nalo wami sas fulan Filipus. Ay nu ntabu wan at fagmafulun sa baliwas Tinafay at yud e Famadaul nasakay wami sa sik balutu siginans Filipus. Ay nu nlangfe limak menit indasug wami sas fulan Truas. Ay sanya yay ami fituk menit.
Pablu at Fakatabuwan wa nu Nansibo sas Truas
7Ay gina sis Sabadu sad yabi, maful yangay ami sat ngay tagafanud laman kon Isus at yafun. Ay Pablu nu gfoyung sa sangay taw sanya anggan wa kabat swa bilug yabi, teway balabag ataw glo wan. 8Ay si em fagmafulan sis tungud fag silid, sanya ngayu fag salung. 9Ay sanya sik baguwama, at ngayan Eutiku, malunggung sis fagbantayan, ay gtiyug wan kaduge Pablu gfoyung igfaaba. Ay kaduge gtiyug, kanya ntong siginan at fatuluk langkub salug. Ay at nabul at bilug nalag te, inkate wan. 10Ay Pablu ndaga, ay naarungan ay nagafus Eutiku. Ay nalong sanya fag ngay taw te, “Lag kalimu, kanya gleleg yay.” 11Ay Pablu gdog yay nasakbo, ay nafanramyukan sik fafa ay naon wan. Ay Pablu ay at ngay taw sanya gsulitanan anggan was balabag sirut. Ay rodi Pablu nalo wan. 12Ay at ngay taw gbiya nu guseganan guli gtaban ka fag baguwama at kinleleg.
Pablu Nalo wa sas Miletus
13Ay ami, nalo wami. Naguna wami Pablu, nasakay wami sa sik balutu. Ay nangadasug wami sas fulan Asus, sanya nu gladlagan ami. Katanya Pablu longan emi, ay kanya glo way sas Asus. 14Ay nu naladlagan wami sis Asus, nafasakay wami ay gaygaluwan wami gsakay nangadasug sas fulan Mitilene. 15Ay nu nalo wami sanya ginan, balabag di ataw indasug wami sas day furu Kiyu. Ay sit dayu fag menit indasug wami sas furu Samus. Ay sis fatuluk menit indasug yangay ami sas fulan Miletus. 16Pablu at fagnalangfeun fulan Efesu, laman wa glugo sis talun Asia. At fagmafaliun laman nu kadasug sas Erusalem gumuna yay ka fag fagmafulun at ngayan, Pentekustes.
Pablu Gfamatuwan at ngay Tagmagurang siginans Fulan Efesu
17Nu ndasug wami sas fulan Miletus, Pablu nasugu sik taw, laman gfat sanya at ngay tagmagurang bale fakafulan sas fulan Efesu. 18Ay nu ndasug wan, Pablu nalong te, “Nasaful wam ku ugali ebi gina aw sanya si ayu, siginan ngay aw bagu kadasug sas talun Asia ay anggan katsi. 19Gfababaun ay galuwonun nu gfaning aw tam Fun at fakaumsigun. Ay ngayu ginan wan taw Udyu nu gfasadanan nu gfauri angku. 20Ay dakdi kapla nu gfoyung aw sa ayu, nus nge wain ku fagfoyungun laman e fanambagun tuwa sa ayu. Dewa sas fagngayuwan taw, ay dewa sa sangay bale. 21Ay nafoyung akyangay dewa sa sangay taw Udyu ay dewa sa sangay taw Gresiya, laman kanya mubun at ngay asalanan ay nanfaning sas Diyus, ay laman gafanud tuwa ban sa tam Fun Isus. 22Ay katsi glo kwa sas fulan Erusalem, anway at Masine fag Falad wan tagtaban angku. Ay dakwa gsaful te, tain at kumgurungan sa angku. 23Ku nasaful anway te, at Masine fag Falad tagfaamatang angku sas fagayu ku nadasugan fag ngay fulan te, e sumungsung ban angku, ay e gfauri ban angku. 24Nus nga katanya, kwa kesug ku leleg. Anway ku leleg we masuwad. Ku fakaumsigun fiya fiya laman gfatabu aktuwa tam Fun Isus at nafon angku fag fagbulun, at masuwad te, nanfoyung aw at Masine fag Barita sa baliwa Diyus nu kafanyu.
25“Ay katsi amatangani te, ebi batang akwan siginan ay fulan, ay nafoyung aw ayu Diyus nu gmagurang taw baliwa, katsi wa ban am lumag angku. 26Ay nu katanya, katsi nafatuyan akwa sa ayu te, dewa yud umlangfe sik taw sa ayu, bunwa aw at ke asalanan. 27Madyay ebi nafoyung akwa sa ayu Diyus at longan fagayu. 28Am wa mandi tagamatangan ayu ay anggan fagayu at ngay tagafanud at Masine wa fag Falad nafatanud ayu. Fatvngvduni Diyus at ngay taw, at nasali siginan at Baguwama at naatean at taguk. 29Anway nasaful kwa te, nu lumo kwa ban ste ginan, umdasug yangay at mauri fag ngay taw. Kata sik ngay idu talun nu kadasug sa ayu laman nanfasaruwayan ayu. 30Ay at sadi yangay te, siginan ay ngay taw umsure yangay ban tibak taw at nanfamuwagan. Anway at fakaumsigun at ngay tagadal maning anya. 31Ay nu katanya, tagaki. Amatangani ku fagbulun tuluk banwa nu si aba, dakdi gfangafoliun nu gfoyung aw ayu, dewa sad yabi ay dewa swa menit, nus nga aw guyway.
32“Ay katsi nanfatanud aw ayu sas Diyus ay sa at longan at takafanyu. Kanya wan at mafafatvngvd ay fagafanudun ay manga nanfon ban ayu at fagafonun sa at ngay kinsadi sa anya. 33Ay dakwa galabian nus nge wain siginan ayu. Dewa ay salafi, ay dewa ay nanuranan, ay dewa ay lanbung. 34Nasaful wam ku fagbulun ebi ginan. Laman e fanbul aktuwa ku ngay fagayudanun, ay anggan sa ku ufud at fagayudanun. 35Katanya ku fagbulun sik famasaful sa ayu te, sik taw maseganamai tuwa nu e fagbulun, laman mafatarabang yangay sa at yud mafabul fag taw. Ay amatangani tuwa tam Fun Isus at longan te, ‘Sik tagfon nu guseganan glabi yay sa tagbul nu guseganan.’ ”
36Ay nu ntabu wa Pablu nu glong katanya, natudan ay igdarangin sa ka fag ngay magurang akbang. 37Ay fagayu at taw nauyway, ay nagafus Pablu, ay naayuk at fingi. 38Fakatanyaun matvngvd nu kabalu anway sat nalongan te, “Wa ban am lumag angku.” Ay kanya nataban wa Pablu sas balutu.
ទើបបានជ្រើសរើសហើយ៖
Fagbulun 20: TAWEAST
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
Copyright © 2023 by OMF International, Philippines
