Fagbulun 18
18
Pablu at Fagbulun sas Fulan Kurintu
1Ay bandi Pablu nalo wan siginans fulan Atenas ay indasug sas fulan Kurintu. 2Ay nalag sanya sik taw Udyu at ngayan Akila. Kanya fag taw siginans fulan Puntu. Ay kanya ay anggan at mangena Prisila, bagu yay indasug sas fulan Kurintu, siginans talun Italya. At fagnatsanyaun anway talun Ruma at fun fiya fiya at ngayan Klaudiu nasugu te, “Fagayu taw Udyu tagsis talun Ruma alini yap sanya ginan.” Ay Pablu nananlag yay sas Akila daduwa at bale. 3Ay ka fag daduwa at fagbulun faggugat kata yangay Pablu at fagbulun, kawat tulda. Ay nu katanya, Pablu gbanwan yay sanya fag daduwa at bale, ay gtarabang yay sat fagbulun. 4Ay kayu Fakamatoun fag Menit Pablu ay at ngay taw gfodfoyungan si sangay taw Udyu at bale fakafulan, laman taw Udyu ay anggan taw Gresiya gafanud ban. 5Ay gina Silas ay Timutiyu ndasug siginans talun Masidunya, Pablu at fagbulun faggugat igfoyung ay igfatuyan sa sangay taw Udyu te, “Tam Isus, tam Diyus at nafili fag Fun.” 6Ay taw Udyu gfaringangan way Pablu, ay kanya nafandagdag at dafug sit balukas. Ay nalong te, “Am wa mandi tagfadasug sa ayu sik faurianan. Ay bunwa siginan angku. Ay nu katanya, katsi ban nanfoyung akway sat yud Udyu fag ngay taw.” 7Ay rodi Pablu nalo wan siginans taw Udyu at bale fakafulan. Ay indasug wa sas Titius-Ustus bale, sas day bale fakafulan. Ay kanya sik tagseg Diyus. 8Ay Krispu at sadi tagmagurang taw Udyu at bale fakafulan sanya. Ay kanya ay fagayu tagsi at bale gafanud yangay sa tam Fun. Ay ngayuk taw Kurintu at tagdungugan Pablu at longan ay gafanud tuwa, ay e nafasurung anya sasad safa.
9Ay sik yabi, tam Fun e nafalag sas Pablu ay glong anya te, “Lag kalimu. Foyungi ay lag katuwas, 10teway gufud akwa emu. Ay we taw gfauri ay gfasait emu, ay we sak gfe fakarukan. Fakatanyaun, ngayu tuwa ku taw ste fag talun.” 11Ay Pablu gbanwan yay sanya, sik banwa ay sit dayu unumk magdanun. Ay kanya nafoyung Diyus at longan sanya fag ngay taw.
12Ay gina Galyu at gubernadur sis talun Akaya, taw Udyu nadiyuganan laman nan-gamat Pablu, ay nataban sas Galyu, sas fagfasinean fanlonganan sanya fag talun. 13Ay glong te, “Tuy fag taw igfabulun nu gewan ngay taw laman sumeg Diyus, dewa kamabo tam talun at ngay suguwan.” 14Ay Pablu gaelonganun wa nangus, ay roro Galyu naguna nu nalong sa ka fag ngay taw Udyu te, “Am fag ngay taw Udyu, tuy fag taw nu e asalanan wa fiya, tenday nu nabasing sik taw, kin, wa fiya, dumungug akwa fiya ay longan. 15Ay roro ay longan nu anway sa tibak longan, ay sa tibak ngayan, ay nut sa way taw Udyu at ugali, am wan tagfili at matuyan. Dakwa gsalag sanya fag fagbulun baliwa.” 16Ay Galyu nafalaklo ka fag ngay taw Udyu siginan at bale fakafulan. 17Ay at ngay taw sanya nagamat Sustenes, at tagmagurang sa sangay taw Udyu at bale fakafulan. Ay nafalang dawdaw anya sis day fagsarapan asalanan, ay roro Galyu wa gsalag.
Pablu nu Kafoli sas Fulan Antiukia
18Ay nu ntabu wa katanya, Pablu glugo yay sirut nu maful sat ngay fadugsay sis fulan Kurintu. Ay bandi, kanya nalo wan sanya ginan ay nasakay wa sa sik balutu, laman nangadasug sas fulan Sirya. At ufud Prisila ay Akila. Ay nu ndasug sas fulan Senkrea, Pablu nafabul at buk, anway ebi ataw e fatuyanan sas Diyus. 19Ay nu ndasug sas fulan Efesu, naubun yay at daduwa. Ay Pablu way at nasakbo sas taw Udyu at ngay bale fakafulan. Ay kanya ay at ngay taw gfodfoyungan yay sanya. 20Ay sanya fag ngay taw Udyu gfatawad yay te, “Lag yap glo, banwani yap ste sik kadugayun.” Ay roro Pablu wa nkumsig. 21Ay Pablu gina galoun, nalong sanya fag ngay taw te, “Kafoli kyay ban stiye, Diyus nu kaumsig.” Ay Pablu nasakay wa sa sik balutu ay nalo wa siginans fulan Efesu.
22Ay Pablu nu ndasug wa sas fulan Sesaria, nalo wa sas fulan Erusalem. Ay gfamatuwan yay at ngay tagafanud sanya. Ay nalo yangay sanya ginan ay nangadasug yay sas fulan Antiukia. 23Ay nu glugo wa sirut sanya, Pablu nalo yangay sanya ginan. Ay nangadasug yangay sas talun Galasya ay Frigia fag ngay fulan, laman nanfatvngvd sanya at ngay tagafanud at fagafanudun.
24Ay sik taw Udyu ndasug sas fulan Efesu, at ngayan Apulus, sik taw Aleandria. Kanya masafulan dawdaw gfoyung Diyus at longan. 25Ay e nafoyung yangay sa anya tam Fun Isus ugali baliwa. Ay kanya maseganama yangay gfoyung sa tibak taw sas Isus baliwa, ay matuyan tuwa at ngay foyungan. Ay roro at fagsafulun nu gsurung sa way baliwa Uan Tagfasurung at foyungan. 26Ay kanya maseganama tuwa nu gfoyung sas Udyu at ngay bale fakafulan. Ay Prisila ay Akila nu nadungug at foyungan, nataban yay Apulus laman nanfoyung Diyus at ngay ugali at tiba. 27Ay bandi Apulus kaumsig yay glo sas talun Akaya. Ay at ngay tagafanud sis Efesu nafatvngvd Apulus at amatanganan. Ay nafon yay anya sik rirukan, sa sangay tagfaning Isus sas Akaya te, laman gfasakbo tuwa Apulus. Ay Apulus nu ndasug wa sanya natarabang dawdaw sa at ngay taw at bagu gafanud anway Diyus kafanyu anya. 28Ay Apulus maseganama dawdaw nu gfoyung sa sangay taw fagdungugan. Ay nu katanya, kanya di galabawan dewa taw Udyu gfabadbaboan anya, teway at foyungan siginan was Diyus at longan te, “Tam Isus tam Diyus at nafili fag Fun.”
ទើបបានជ្រើសរើសហើយ៖
Fagbulun 18: TAWEAST
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
Copyright © 2023 by OMF International, Philippines
