Fagbulun 15
15
E Nasugu Pablu ay Bernabe sas Erusalem
1Ay tibak taw indasug sas Antiukia siginans talun Udiya, ay nafoyung sa sangay yud Udyu fag ngay tagafanud te, “Nu dway am nafatuli kata Muisis at longan, wam umlangfe.” 2Ay Pablu ay Bernabe wa nkumsig ka fag foyungan, ay matvngvd at aringangan sanya baliwa. Nu katanya, at ngay tagafanud nafili Pablu ay Bernabe ay anggan tibak tagafanud sis Antiukia laman ro nanfasulitanan yay sa sangay Nasugu ay sa sangay tagmagurang bale fakafulan sas Erusalem te, tain at amatanganan sa baliwa nu gtuli.
3Ay at ngay tagafanud nafalo wa at filian fag ngay taw. Ay gina nadalan sas talun Finisya ay talun Samarya, nafoyung sa sangay tagafanud te, “Sik ngay yud Udyu fag taw gafanud yangay sa tam Fun Isus.” Ay ka fag ngay tagafanud nu nadungug, guseganan dawdaw. 4Ay nu ndasug wa sas Erusalem, at ngay tagafanud ay anggan ngay Nasugu, ay at ngay tagmagurang bale fakafulan sanya nafasakbo anya. Ay Pablu ay Bernabe nafamansulit sanya Diyus at natarabang sat fagbulun gina sit lakloan ebi. 5Ay tibak tagafanud siginans Parisiyu fag fulan taw inlindug ay glong te, “Ani tulii at yud Udyu fag ngay taw. Ay sugui yangay te, faningi Muisis at Suguwan.”
6At ngay Nasugu ay at ngay tagmagurang bale fakafulan inful laman gsulitanan sa ka fag longan baliwa. 7Ay nu glugo wan nu gsulitanan, Pedru nlindug ay nalong te, “Ku ngay fadugsay, nasaful wam te, gina ami bagu gfoyung, Diyus nafili wa angku, laman nanfoyung aw at Masine fag Barita sat yud Udyu fag ngay taw, ay e tagafanud wa fiya. 8Diyus at tagsaful taw at amatanganan. Kanya tagfatuyan te, at yud Udyu fag ngay taw gafanud wa fiya. Madyay nafat si wa sanya at Masine fag Falad, kata yangay at nafat si antam. 9Diyus we filian, anway gsud yay at fagbulun sat yud Udyu fag ngay taw ay sa antam. Anway Diyus nafasine ka fag ngay taw at amatanganan, madyay tagafanud tuwa. 10Ay nu katanya katsi, taw ro ay fagfaskudun Diyus at fagbulun te, go matuyan? Ay taw ro ay fagnalongun sat yud Udyu fag ngay tagafanud te, faningi sa ka fag longan, dewa ngani tam ngay aguyangan ay dewa itam katsi watam mafafaning ka fag longan? 11Itam, gafanud tam te, umlangfe tam anway tam Fun Isus kafanyu antam. Ay katanya yangay sa at ngay bagu tagafanud.”
12Ay fagayu at maful sanya maragangan way. Ay gdungugan Bernabe ay Pablu nu gfamansulit te, “Tam Diyus nafon emi fagmadaragangun ay nafagbulun ami at ngay madulawan ay madaragang fag ngay fagbulun sat yud Udyu fag ngay taw.” 13Ay nu ntabu wa Bernabe ay Pablu nu gelongan, Santiagu nalong te, “Ku ngay fadugsay, dungugani ku longan. 14Simun Pedru nafoyung antam te, siginan wa ebi tam Diyus gamatangan yangay yud Udyu fag ngay taw ay nafili at tiba laman at ngay taw mandi. 15Diyus at ngay taglong ebi kata yangay Simun at longan, madyay marirukan sis Diyus at longan te,
16‘Bandi gdog akyangay kadasug.
Ay gdog akyangay nangawat fun Dabid at fagbanwanan at marasrasan katsi,
17laman tibak taw sumarap angku, at masuwad te, at yud Udyu fag ngay taw ku nafili.
18Katanya wan ku longan,
ay nu nafoyung aw siginan wa ebi ebi.’#15:18 Amus 9:11-12.”
19Nu katanya, nu si angku, lag tam gfatakan at yud Udyu fag ngay taw takakbang sas Diyus. 20Fangkabat di ro, riruki sanya fag ngay taw te, “Lag kon at nafon sa sangay tawtawan fag ngay fakonun, anway nu glag ami kanya mafurat. Ay lag kamayun. Ay lag kon taguk ay ate karni nu at narugut way fag balan. 21Anway siginan ngay ebi ebi gtap wan Muisis at longan sa sangay bale fakafulan kayu linggu. Ay kanya gfoyung yangay sas fagayu fulan.”
At Rirukan sa sangay Yud Udyu fag ngay Taw
22Ay nu katanya, ngay Nasugu, ay at ngay tagmagurang ay anggan fagayu at tagafanud insadi te, “Nanfili tam sik ngay ama siginan antam, laman tam fagfaloun at nangufud Pablu ay Bernabe sas fulan Antiukia.” Ay at nafili Udas (Udas at ngayan at sadi, Barsabas) ay Silas. Ay kanya fag duwa tagfangguna ngay tagafanud. 23Ay at nafauba fag rirukan glong te,
“Tuy fag rirukan siginan emi, ngay Nasugu ay anggan at ngay tagmagurang sa sangay tagafanud ste sis Erusalem, ay ngay fadugsay. Nariruk ami sa ayu, at yud Udyu fag ngay taw sas fulan Antiukia, ay sas Sirya, ay sas talun Silisya. 24Nadungug ami te, tibak taw ste ginan si emi dewa yud ami nasugu nalo yay sanya laman nanfaligbatan ayu, siginan at ngay foyungan. 25Insadi ami te, nanfili ami tibak ama ste ginan si emi fag fulan em fagfaloun sa ayu sas Antiukia, laman at nangufud sa tam fakesugun Pablu ay Bernabe. 26Em fagfiliun nangus fag mangama at ke fagbulun ebi sa tam Fun Isus. 27Ay nu katanya, nasugu ami Udas ay Silas. Ay kanya yangay ban at nanfoyung ayu em rirukan. 28Anway at Masine fag Falad ay ami, em fasadan antuwa te, laman di ami gfaayu em fagsalagun ay ugali. Ay kayui nangus tuy ay fagyudun fagbulun: 29Lag kon karni at nafon sa sangay tawtawan. Ay lag kon taguk. Ay lag kon karni nu at narugut way fag balan. Ay lag kamayun. Nu nafaning tuwam katanya, masine wan ay fagbulun. Kayu yamay anya em longan.”
30Nu katanya, nafaalo wan ka fag duwama. Ay nu ndasug wa sas fulan Antiukia, nafaful at ngay tagafanud sanya. Ay nafon at ba rirukan. 31Ay sanya fag ngay tagafanud nu natap wa ka fag rirukan, guseganan anway nafatvngvd tuwa at amatanganan. 32Ay Udas ay Silas, kanya fag duwa Diyus at taglong, ay matvngvd nu gatul ay nafatvngvd at ngay fadugsay at fagafanudun. 33Ay ka fag duwama nu glugo wa sirut sanya, at ngay fadugsay nafalo yangay anya manabayan. Laman masine tuwa nu kafoli sa at nasugu anya. 34Ay roro Silas at fasadan igfanya yay sanya. 35Ay roro Pablu ay Bernabe sanya yay sis Antiukia. Ay ka fag duwama gasfuwan tibak tagafanud igfoyung yangay sat ngay tagafanud ay anggan sa tibak taw.
Pablu ay Bernabe Nasaruwayan
36Ay Pablu nu glugo wa sirut sanya, nalong sas Bernabe te, “Glo wata. Gdog yay ta nansibo ta ngay fadugsay sas fagayu fulan ta nafoyung ebi tam Fun at longan, laman sumaful ta te, tain katsi sanya.” 37Ay Bernabe kaumsig gtaban Uan, at sadi at ngayan, Markus. 38Ay roro Pablu at fakaumsigun, lag gtaban at usama ebi tagfangubun gina sis fulan Famfilia. 39Ay Bernabe ay Pablu matvngvd at aringangan ay nasaruwayan wan. Ay Bernabe nataban wa Markus, ay nasakay wa sa sik balutu tagsas Sipre. 40Ay Pablu nafili Silas ay galoun yangay. Ay at ngay fadugsay igdarangin anya te, laman tam Diyus gtarabang tuwa sa at ngay fagnanloan. 41Ay Pablu nu glo, nadalan Sirya ay Silisya, laman nanfatvngvd at ngay tagafanud sanya.
ទើបបានជ្រើសរើសហើយ៖
Fagbulun 15: TAWEAST
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
Copyright © 2023 by OMF International, Philippines
