M. Marko 10
10
1LOMBA yeve eima kulakwa echiza ku chitwa cha Yudaya na kusilya lila la Yordani: na maumba elongana kwake soti, naye nga ni mwechiyoŵerera eŵasambizya soti. 2Nipo echiza kwake Afarisayo emkonsha, Kansi chuzomereka kuti muntu amsuzule mkazi wake? enzomuyezya. 3Naye eyasuka eŵanenera, Musa emuuzyani chinji? 4Ŵechiti, Musa ezomezya kulemba kalata ka nsuzulo nomsuzula. 5Sembe Yesu enena naŵo, Chikomo choyuma kwa mitima yanu ni pechimlemberani tetulo ili. 6Sembe chitatikile pa chiyambiyambi chopozewa vyaro, Eŵaumba mwanalume na mwanakazi. 7Mlandu woteti mwanalume ni pati aleke awisi na anyina nosungana na mkazi wake; 8naŵo aŵiri aŵekuŵa muŵili umo, tetyo ntali aŵiri lomba, sembe muŵili umo. 9Teti chamene chechilundika pamo Mlungu, muntu asachipatula. 10Lomba mnanda asambili emkonsha soti zya mlandu uyu. 11Enena naŵo, Ali wonse ati amsuzule mkazi wake nolingula muyakene ochita uchende kumpontera yeve: 12naye mwine akamleka mulume wake nolinguliwa na muyakene ochita uchende.
13Nipo emletera tuŵana atukumye: naŵo asambili eŵatuzula. 14Sembe Yesu akaŵone echipya mtima noŵanenera, Tulekeni tuŵana tuze kuli neo; msatulesya: pakuti ufumu wa Mlungu ni wa toteti. 15Lezee numuuzyani, Ali wonse asapokera ufumu wa Mlungu nga ni kamwana sangaloŵemo peka patonto. 16Naye etufukata notushukisya potusintilila manja.
17Lomba penzekuya ku njira muntu emuutukira emfukamila nomkonsha, Msambizi muweme, nichitenji kuyoloŵa mu upyani wa moyo wosasila? 18Yesu enena naye, Ni chinji paunitula neo muweme? paliye muweme sembe umo mpera, ni Mlungu. 19Uŵaziŵa matetulo, Usapaya, Usachita uchende, Usapunsha, Usachita untoni wa wenye, Usachencheneka, Wolemekezya auso na anyoko. 20Naye emuuzya, Msambizi, ivi vyonse nuvisunga chitatikile penenze msaza. 21Nipo Yesu emlola emtemwa nomnenera, Chintu chimo chukusoŵa: nkoya, ukasite vyonse vyuli navyo noŵapa akavu, teti ni muuti ukaŵere na mpango kumulu: tiye unikonke. 22Sembe uyo eswema ku menso pa lizu ili noluta kokwinyilila: pakuti enze nacho chuma chinyinji.
23Naye Yesu elolalola noŵanenera asambili ŵake, Ati kukosa ana chuma kuloŵa mu ufumu wa Mlungu! 24Naŵo asambili edodoma pa malizu ŵake. Sembe Yesu eyasuka soti echiti kwaŵo, Ha! mwanamwe, ati kukosa aŵo ochetekera chuma kuloŵa mu ufumu wa Mlungu! 25Ni chipepu kuti ngamila ipule pakati pa mpanga ya mnyenda nte kuti ana mpango aloŵe mu ufumu wa Mlungu. 26Naŵo ezizwa kwene kantu emnenera, Nga ni ŵani angapanuke nakale? 27Yesu eŵalolesya echiti, Ku ŵantu ntechuchitika, sembe kwa Mlungu chuchitika: pakuti vyonse vuchitika na Mlungu. 28Petro eyambonena naye, Ŵonani, tisiya vyonse nomkonkani mweo. 29Yesu echiti, Ng'aleze numnenelani, Paliye muntu esiya ng'anda, kano akwaŵo, kano alongosi, kano anyina, kano awisi, kano ŵana, kano minda, pa mutu pangu na evangelo, 30ati akanopokera makumi kumi lomba mnsita ino mang'anda, na akwaŵo, na alongosi, na anyina, na ŵana, na minda, pamo na mazuzyo, na pa nsita iyo ikuza ni moyo wosasila. 31Sembe anyinji a pantanzi azaŵe a pavuli, na a pavuli azaŵe a pantanzi.
32Naŵo ŵenze pa njira ŵenzekuya ku Yerusalemi; Yesu enzoŵatangulila, naŵo ŵenzozuzuka; na aŵo ekonka echita mwezo. Lomba eula soti kumi na aŵiri ŵala, eyamba kwauzya ivyo viti vize vimponere, 33echiti, Ŵonani tikuya ku Yerusalemi: naye Mwana wa muntu akapunziwe kwa akuru a ansembe na kwa alembi; naŵo akampingule kuti owamila kufwa nomtwala ku Mitundu: 34naŵo akamfweye nomtila mata nomkwapula na nsinga nompaya; nipo siku la mazo azauke soti.
35Naŵo emfwinda Yakobo na Yohana, ŵana a Zebedayo, enena naye, Msambizi, tupangwa mze mtichitire chiri chonse chititi timsengeni. 36Eŵanenera, Mupangwanji nimchitireni? 37Ŵeve echiti kwake, Tipeni tikonkala umo kwanja kwanu kwendi, muyake ku manzyere, mu mchinzi wanu. 38Sembe Yesu enena naŵo, Ntemuziŵa chimusenga. Kansi mngamwereko ntumo yamene inumwerako neo? kano kubatiziwa na ubatizo unubatiziwa nawo neo? 39Emuuzya, Tingakumeko. Naye Yesu enena naŵo, Ntumo yamene inumwerako mze mumwereko mweo; soti na ubatizo unubatiziwa nawo neo mze mbatiziwe nawo: 40sembe kunkala kwanja kwangu kwendi kano ku manzyere kupa nte kwangu, lomba ni kwa aŵo akwiikiwira futira. 41Nipo pechimvwa aŵo kumi eyamba kwanyekera mitima Yakobo na Yohana. 42Naye Yesu eŵaita kwake enena naŵo, Muziŵa kuti aŵo ochishiwa mafumu a Mitundu oiŵera asikuru: na akuru ŵaŵo oichitira mantunya. 43Nte teti pali mweo: sembe ali wonse opangwa kuŵa mkuru pali mweo aŵekuŵa mtumiki wanu: 44na ali wonse opangwa kuŵa wa pantanzi pali mweo aŵekuŵa muzya wa ŵonse. 45Pakuti lezee Mwana wa muntu ntezila kutumikiliwa, sembe kutumikila niko, nopeleka moyo wake uŵe mbombola kwa anyinji.
46Lomba echiza ku Yeriko: naye penzofuma mu Yeriko pamo na asambili ŵake na liumba likuru mwana wa Timayo, Bartimayo, mpofu yosenga, enzenkezi mmbali mwa njira. 47Pamene pechimvwa kuti ni Yesu wa mNazarete eyambolilisya nonena, Mwe Yesu, mwana wa Davide, munichitire lusungu. 48Anyinji emtuzula kuti amyalale: sembe yeve epulamo nolilisya, Mwe mwana wa Davide, munichitire lusungu. 49Lomba Yesu epanama echiti, Muiteni. Naŵo eiita mpofu enena nayo, Nkazika mtima: ima, okuita. 50Nayo potaya mwinjira wake inyotoka ichiza kwa Yesu. 51Yesu eiyasuka echiti, Upangwa nikuchitirenji? Mpofu imnenera, Asikuru, nanipoke soti kulola kwangu. 52Naye Yesu eiuzya, Nkoya; mvwano wako wakupuzumusya. Nipo lomba pano apa ipokera kulola kwake nomkonka pa njira.
ទើបបានជ្រើសរើសហើយ៖
M. Marko 10: MA23
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
Mapangano Alomba © Bible Society of Zambia, 1923.