Machitilo 7
7
1MKURU wa ansembe echiti, Kansi ivi viri teti? 2Naye echiti,
Akwasu na ausu wasu, imvwani. Mlungu wa mchinzi emuŵonekera ausu wasu Abrahamu peenze mMesopotamiya pakaliyonkazikika pa Kara, 3echiti kwake, Fumapo pa charo chako na pa akwanu, iza ku charo chinti nkulangizye. 4Pamene apo efumapo pa charo cha Akaldayo echizonkazikika pa Kara: nipo akafwe awisi Mlungu emfumyako kwamene kula emnyezizya ku charo chino chimunkalamo lomba: 5ntempa upyani mwamene mula yai, chukanga pokanda lwayo lwake: epangana naye kumpa chamene chila kuŵa chake, na ku mbuto yake pavuli pake, apo pakaliye mwana. 6Mlungu elaŵira tetino kuti mbuto yake yakuzuŵaila mcharo cha chilwendo, na ŵantu akoŵachisya ukapolo noŵachitira viipa virimika myanda ine. 7Mtundu nawo uzoŵachisye ukapolo nize niupingule, echiti Mlungu: pavuli pake ninga afumemo nonitumikila pa malo apa. 8Naye empa mapangano a chisirimuko: teti Abrahamu evyala Isake nomsirimula nsiku yakasano na katatu; Isake evyala Yakobo, na Yakobo evyala amausu wasu ŵala kumi na aŵiri. 9Naŵo amausu wasu ŵala pomchitira Yosefe tima emsitisya ku Egupto: na Mlungu enze naye pamo, 10empokesya mmazuzyo ŵake ŵonse, empa chisomo na nzeru pa menso pa Faraŵo mfumu ya Egupto; naye emkoloŵeka umbiri pa Egupto na pa chiŵanza chake chonse. 11Lomba chichiza chilala mu Egupto na mKanane monse, na matamano akuru: ausu wasu aliyoŵone kantu kochila nako. 12Sembe apo akamvwe Yakobo kuti kuli mapira ku Egupto etuma ausu wasu ulwendo woyamba. 13Nipo polwendo wakaŵiri Yosefe elikumba kwa akwaŵo, na mtundu wa Yosefe wiziŵikwa kwa Faraŵo. 14Yosefe etumizya eliitira awisi Yakobo na akwaŵo ŵonse, ŵantu makumi asano na aŵiri na mpuzyo asano. 15Naye Yakobo echiya ku Egupto, efwilako mwine na ausu wasu; 16eŵatemba ku Sukemu noŵaika mu msitu wechisita Abrahamu na chitema cha ndalama kwa ŵana a Emori mSukemu. 17Sembe peyenzofwikila nsita ya chipango chechipangana Mlungu na Abrahamu ŵantu ekula nopaka mu Egupto, 18mpaka piiuka mfumu iyakwene ya Egupto ila iliyomziŵe Yosefe. 19Yamene ila iuchitira mochenjera mtundu wasu noŵachitira ausu wasu viipa, vyakuti aŵataisye malucheche ŵaŵo angaŵe moyo. 20Pa nsita ila evyalikwa Musa, enze muweme ngaye; enzomlela myezi itatu mwa awisi; 21naye akataiwe kunja mwana mwanakazi wa Faraŵo emtola nomlela aŵe mwana wake mwine. 22Naye Musa enzoyeruzyiwa nzeru zyonse zya Aegupto; ekosa mmalizu ŵake na mmilimo. 23Sembe vyaka vyake pevyenze pafupi na makumi ŵane kwiloŵa mu mtima mwake kwapempula akwaŵo ŵana a Israeli. 24Naye poŵona muyake ochitiwa lukanza empokesya nomuwezezyamo ula ozuzika, pomkoŵera Mwegupto: 25elinga kuti akwaŵo aziŵe kuti Mlungu enzoŵapa wanoŵene na kwanja kwake; sembe ŵeve aliyoziŵa. 26Nipo mmawa mwake eŵaŵonekera apo penzousyana echiti aŵayanisye enena, Mwe, nimwe pokwanu; ni chinji pamuponterana? 27Lomba wamene emchitira mnekwaŵo chiipa emkaŵizya echiti, Ni ŵani ekuŵika mkuru nopingula pali seo? 28Kansi usakonipaya neo umo muwimpaira Mwegupto mailo? 29Nipo Musa eutuka pa ili lizu echiyozuŵaila mcharo cha Midiyani, mwechivyala ŵana analume aŵiri. 30Vikasile virimika makumi ŵane malaika emuŵonekera mmalambo a lupiri lwa Sinai, mlulimi lwa mulilo mchimpuza. 31Musa pechiuŵona ezizwa pa choŵoneka: naye penzovwendera pafupi kuzoŵona lichiza lizu la Asikuru lakuti, 32Neo nne Mlungu wa ausu wanu, Mlungu wa Abrahamu na wa Isake na wa Yakobo. Na Musa etutumila noyopa kulolesyapo. 33Asikuru enena naye, Mangulula nkwaŵilo zya pa mendo ŵako: pakuti pa malo pawapanama mpozila. 34Kuŵona nuŵona mazuzyo a ŵantu ŵangu ŵali mu Egupto na kumvwa kukungula kwaŵo, nane ni panasika kwapokesya: lomba iza nze nkutume ku Egupto. 35Uyu Musa wechikana kuti, Ni ŵani ekuŵika mkuru nopingula? wamene uyu ni wechituma Mlungu kuŵa mkuru na mnunuli pa kwanja kwa malaika emuŵonekera pa chimpuza. 36Uyu eŵatangulila apo akachite vyamazuzu na viziŵikwilo mu Egupto, na pa chimana Chisweta, na mmalambo vyaka makumi ŵane. 37Uyu ni Musa ula echiti ku ŵana a Israeli, Mlungu akampanamikileni muŵirizi mwa akwanu nga ni neo. 38Uyu ni ula enze mu eklezya ya mmalambo pamo na malaika wamene elaŵira naye mlupiri lwa Sinai, na pamo na ausu wasu: ni epokera malaŵililo amoyo kutipa seo: 39wamene wechichitonyanyaizya ausu wasu, nomkaŵizya kwaŵo nowererako mmitima mwaŵo ku Egupto, 40echiti kwa Arone, Tichitileni milungu yotitangulila: pakuti uyu Musa etifumya mcharo cha Egupto situziŵa chimponera ni chinji. 41Naŵo eyenga litole pa nsiku zilazya, echiza nayo nsembe ku kalango ako nosangalala na milimo ya manja ŵaŵo. 42Sembe Mlungu eŵakwenukila noŵapeleka atumikile winji wa mululu; umo mkwilembewera mbuku la aŵirizi,
Kansi mwenzonitilila zyonyema na nsembe
Virimika makumi ŵane mmalambo, mweo mwa chiŵanza cha Israeli?
43Namwe mwiula chimsasa cha Moloki,
Na ntandara ya mlungu Refani,
Nito tulango twimwiyenga kutulambila:
Neo nze nimsezyeni kuya namwe kunsei kwa Babuloni.
44Ausu wasu enze nacho chimsasa chontoni mmalambo, nga ni umo mwechisuzulila ula wamene epinga na Musa kuti achichite kwa mlingo wa chinngwa chechiŵona. 45Chamene ausu wasu soti popokezyana chechiza nacho pamo na Yoshuwa pechiloŵa mchipuna cha mitundu, yechiŵingila kunja Mlungu pa menso pa ausu wasu, mpaka nsiku zya Davide; 46wamene epewa chisomo pa menso pa Mlungu, nosenga kuti afwange ponkala kwa Mlungu wa Yakobo. 47Lomba emmangila ng'anda ni Solomoni. 48Sembe Uyo wa Kumulu ntonkala mmang'anda ŵomangiwa na manja; umo mwechinenera ula muŵirizi,
49Kumulu kula ni chilimba changu chofumu,
Na charo ni pokandila pa malwayo ŵangu:
Ng'anda yotyani imti mze munimangile? akuti Asikuru:
Kano pa malo pa chifuto changu ni pani?
50Mwati nte kwanja kwangu kwipoza ivi vyonse?
51Mweo mwayumu mikosi nosasirimuka mitima na matu, nsiku zyonse mumsusya Mzimu Mtuŵa: nga ni mwenzochitira ausu wanu tetyo na mweo soti. 52Ni ŵani wa aŵirizi waliyoutusya ausu wanu? naŵo eŵapaya ŵala ŵelangizyira katera zya kuza kwake Uyo Wolungama; wamene umkuŵa lomba ŵomvumbula nompaya; 53mweo mwilipokera dango nga ni mliikiwira na malaika, ntimwilisunga.
54Lomba pechimvwa ivi echontewa mitima nomkwiila menu. 55Sembe yeve, wozula Mzimu Mtuŵa, elolesisya kumulu, eŵona mchinzi wa Mlungu na Yesu opanama kwanja kwendi kwa Mlungu, 56echiti, Ŵonani, nuŵona kumulu kwazuliwa, na Mwana wa muntu opanama kwanja kwendi kwa Mlungu. 57Naŵo ekuwa na malizu akuru, esinka mmatu mwaŵo nomkutukila pamo; 58emtaya kunja kwa linga nompozera myala: ntoni nazyo ziikamo nyula zyaŵo mnkonde mwa mlumbwana woitiwa Saulo. 59Naŵo empozera myala Stefano enzoita Asikuru na kuti, Asikuru Yesu, pokerani mzimu wangu. 60Naye efukama ekuwa na malizu akuru, Asikuru, msaŵapa aŵa mlandu wa chiipa ichi. Naye akanene teti elala tulo.
ទើបបានជ្រើសរើសហើយ៖
Machitilo 7: MA23
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
Mapangano Alomba © Bible Society of Zambia, 1923.
