Machitilo 21
21
1LOMBA yenzepo kuti tikapatukane naŵo tiima mu wato nofwika malungalunga ku Kowo, na mmawa mwake ku Rode, kufumila kwamene ku Patara: 2lomba petifwangako wato wotaukira kuya ku Foinike tiloŵamo noimako. 3Tikafwike poŵonekera Kupro tichisiya ku manzyere na kuya ku Suriya nofumamo mu wato pa Turo: pamene pechipangwa kutumpulula viya vya mu wine. 4Lomba petiŵafwanga asambili tiswapo nsiku zisano na ziŵiri: naŵo emuuzya Paulo mwa Mzimu kuti asakandamo mu Yerusalemi. 5Nipo yenzepo zikasile nsiku tiimapo na kuya ulwendo wasu; naŵo ŵonse na anakazi na ŵana ŵaŵo etipelekezya mnjira yasu mpaka petifuma mmunzi: nase tifukama pa chau nolomba 6nolailana naŵo; nipo tiloŵa mu wato, sembe ŵeve ewerera kwaŵo.
7Pamene tikasile ulwendo wofumila ku Turo tifwika ku Ptolemayi; nase tiŵalonjera akwasu noswako zuŵa limo. 8Mmawa mwake tiima nofwika ku Kaisariya: tiloŵa mng'anda ya Filipo evangelisti, umo wa mwa asano na aŵiri ŵala, nonkala naye. 9Lomba uyu muntu enze naŵo ŵana anakazi ŵane, mandola amene enzolosya. 10Petinkalapo nsiku zinyinji echiza kufumila ku Yudaya muŵirizi muyake zina lake Agabo. 11Etizila, noula chikoŵe cha Paulo nolimanga mendo na manja na kuti, Mzimu Mtuŵa wanena teti, Ayuda a ku Yerusalemi akammange tetino mwine wa chikoŵe ichi, nomvumbula mmanja mwa a Mitundu. 12Tikamvwe ivi seo na a kwamene timpapatira asaya ku Yerusalemi. 13Pamene apo Paulo eyasuka, Mulilanji nonififya mtima? pakuti nuliikira kaŵera nte kumangiwa kweka sembe soti kufwila pa Yerusalemi zina la Asikuru Yesu. 14Nipo pechikanoŵetekewa tileka tichiti, Kupangwa kwa Asikuru nakuchitiwe.
15Lomba pavuli pa masiku aŵa timangilatu viya vyasu na kuya ku Yerusalemi. 16Echiya nase pamo asambili ŵambi a ku Kaisariya, notitwala kwa chite Mnaso wa ku Kupro, msambili wotatika, tikalale mnanda yake.
17Lomba petifwika ku Yerusalemi akwasu etipokelela nosekelela. 18Mmawa mwake Paulo eloŵa nase pamo kwa Yakobo; naŵo akuru ŵonse enzeko. 19Pamene akaŵalonjere elulula chimochimo vintu vyechichita Mlungu mwa a Mitundu potumiki wake. 20Ŵeve akavimvwe emchinzika Mlungu, echiti kwake, Mkwasu, muŵona mawinji ali mwa Ayuda amene ozomera; na ŵonse olipimpizya dango: 21naŵo euzyiwa zyanu zyakuti muyeruzya ŵonse Ayuda ali mMitundu kulekana na Musa, kwauzya asasirimula ŵana ŵaŵo kano kuyendayenda mwa misango ila. 22Nga ni chinji nakale? ŵaŵamvwe ng'aleze kuti mwaza. 23Teti mchite ichi chitumuuzyani: Tiri naŵo analume ŵane amene elapa; 24ŵauleni aŵa, mkaliwamye naŵo pamo noŵalipilila kuti amete mpala: ninga ŵonse aziŵe kuti nte vyendi ivyo vyonse vyechimvwa vyanu; sembe kuti mweo mweka munkala paweme nolisunga dango. 25Lomba zya a Mitundu amene ozomera tilemba nopingula kuti aŵoleka vyopupila ku tulango na mlopa na vyonyongolola na kachenche. 26Pamene apo Paulo eŵaula ŵantu, lomba mmawa mwake akaliwamye naŵo pamo eloŵa mchipupilo, kuŵirizya chisilizyo cha nsiku zyoliwamya, mpaka peiti itiliwe nsembe ya aŵo ŵonse.
27Nipo nsiku izyo zisano na ziŵiri pezyenze pafupi nosila Ayuda a mu Asiya akamuŵone mchipupilo epyesya liumba lonse mitima nomkata 28nokuwa, Mwaŵantu a Israeli, tiyavyeni: Uyu ni muntu wosambizya ŵonse a mmalo monse kwasusya ŵantu na dango na malo ŵano: naye eloŵa naŵo Ahellene soti mchipupilo nofifya malo ŵano ŵozila. 29Pakuti emuŵona kale naye pamo mmunzi Trofimo wa ku Efeso, wechilinga kuti Paulo eloŵa naye mchipupilo. 30Nipo munzi wonse wiuka, na ŵantu ŵeutukira pamo: emkata Paulo nomkulila kunja kwa chipupilo: na lomba pano apa pa milyango pezaliwa. 31Pamene penzosakompaya mbili imvwika ku chilolo cha mpingo yakuti mu Yerusalemi monse muli kapiringupiringu. 32Lombalomba chiula manjolinjoli na akenturiyo noŵasikila luŵilo: naŵo akaŵone chilolo na manjolinjoli elekomnyata Paulo. 33Pamene apo chilolo chikapanamile chimkata nopanga kuti amangiwe na manjerenjende aŵiri; chikonsha, Ni ŵani uyu; wachitanji kansi? 34Nipo ŵambi ekuwa chakuti, ŵambi chakuti, mliumba: nacho pechipukapuka na chiwawa chisuzula kuti aze naye mu linga. 35Akaze pa makwerero yenzepo kuti etwaliwa na manjolinjoli chikomo chomkaŵizya liumba; 36pakuti fwingo la ŵantu likonka kuvuli nokuwa, Mfumyeponi.
37Pamene Paulo penze pafupi nouliwa mu linga echinenera chilolo, Nilaŵire namwe. Chichiti, Kansi uziŵa Chihellene? 38Kansi ntewe Mwegupto wamene kale pala witwangisya notangulila ku malambo Achipaya ŵala myanda makumi ŵane? 39Sembe Paulo echiti, Nine Muyuda, wa ku Tarso wa mKilikiya, mwanoŵene wa munzi womvwika: numpapatirani munizomezye nilaŵire na ŵantu aŵa. 40Pamene chikamzomezye Paulo epanama pokwerera, echeuzya na kwanja ku ŵantu; lomba pepenze kachetechete kakuru elaŵira naŵo mchilaŵiro cha Ahebrayo echiti,
ទើបបានជ្រើសរើសហើយ៖
Machitilo 21: MA23
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
Mapangano Alomba © Bible Society of Zambia, 1923.
