1 Akorinti 3
3
1NEO, mwakwasu, kwinikanga kulaŵira namwe nga nimwe a mwa mzimu, sembe nga ni na a mmuŵili, nga nimwe malucheche mwa Kristo. 2Nimchizyani na maziŵa, nte chakulya chosyeta; pakuti simwichikuma: inde, na lomba kumo simngakumeko, 3pamkali a mmuŵili: pakuti pavilimo muli mweo ukwa nousyana mwati nimwe a mmuŵili, noyendayenda mwa ŵantu? 4Chikomo apo paakuti umo, Ne nine wa Paulo; na muyake, Ne nine wa Apollo; mwati nimwe ŵantu? 5Nga Apollo ni chinji? na Paulo ni chinji? Ni atumiki emwizomera muli ŵeve, na ali wonse nga ni Asikuru mwechimpera. 6Nizika nine, Apollo ni etilila manzi, lomba ekuzya ni Mlungu. 7Teti ozika ntakufwa kantu, kano otililapo; sembe Mlungu wamene okuzya niye. 8Lomba ozika na otililapo ni umo na umo: sembe ali wonse azapokere chilambu chake mwine mwa mulimo wake mwine. 9Pakuti se nise a mulimo umo na Mlungu: mwe nimwe munda wolimalima wa Mlungu, mamangiwilo a Mlungu.
10Mwa chawanzi cha Mlungu chipewa kuli neo, nga ni bobo womanga ng'anda ne niyalika vya mmfololwa, na muyake elunduluzyapo. Sembe ali wonse nalole wino mwakulunduluzyirapo. 11Pakuti paliye muntu angayalike vya mmfololwa vimbi, sembe vila viyalikiwa, ni Yesu Kristo. 12Sembe kati ali wonse akalunduluzyapo pa vya mmfololwa goldi, lambo, myala ya chitema, vimiti, uzu, visinde, 13mulimo wa ali wonse uzoŵoneshewe: pakuti siku lize liulangizye, pauvundululiwa mmulilo; na mulilo wine uzouyezye mulimo wa ali wonse ni wosyani. 14Kati ukankalilila mulimo wa muntu wechilunduluzyapo azapoke chilambu. 15Kati ukapya mulimo wa muntu yeve azapyelwe: lomba yeve yeka azapuzumuke, sembe nga ni kulumpa mulilo.
16Mwati mnaziŵe kuti nimwe chipupilo cha Mlungu, na kuti Mzimu wa Mlungu onkala muli mweo? 17Kati muntu akachicheneka chipupilo cha Mlungu, Mlungu azamcheneke yeve; pakuti chipupilo cha Mlungu ni chozila, chamene ni mweo.
18Asalipempenyeka ali wonse. Kati muntu olilinga kuti ni wanzeru muli mweo mcharo chino cha pansi, naaŵe wopusa kuti aŵe wanzeru. 19Chikomo nzeru zya mcharo chino ni mapuso kwa Mlungu. Pakuti kwilembewa, Uyo oŵakata umfyala anzeru mu uchenjezi waŵo: 20nipo soti, Asikuru oŵaziŵa malingililo a anzeru kuti ni atyala. 21Teti ali wonse ni pati aŵolekomekera ŵantu. Pakuti vyonse ni vyanu, 22kano Paulo, kano Apollo, kano Kefa, kano charo cha pansi pano, kano moyo, kano imfwa, kano vya makono, kano vikuza; vyonse ni vyanu; 23namwe nimwe ŵake Kristo, na Kristo ni wake Mlungu.
ទើបបានជ្រើសរើសហើយ៖
1 Akorinti 3: MA23
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
Mapangano Alomba © Bible Society of Zambia, 1923.