Jestira 3
3
O Haman ćerol zavera te mudarol sa e Jevrejen
1Pale kava so sasa, o caro Kserks ćerda čast e Hamanese, savo sasa čhavo e Hamedatineso e Agagovcoso. Čhuta le ki embari pozicija pe sa pe šorutne. 2Sa e carose službenikura save sesa ke carosi kapija perena ke koča thaj klanjina pe e Hamanese, golese so o caro gija zapovedisada baše leste. Al o Mordehaj ni pelo ke koča niti klanjisada pe angle leste.
3Tegani e carose službenikura ki carsko kapija pučlje e Mordehaje: “Sose phađe e caroso zapovest?”
4Thaj gija vaćarde lese svako đive, al vov ni šunda len. Golese, von gova vaćarde e Hamanese, te dićhen dal ka vredil e Mordehajeso opravdanje, golese so vaćarda lenđe kaj si Jevrejo. 5Kana o Haman dikhlja kaj o Mordehaj ni perol ke koča niti klanjil pe angle leste, holajlo but. 6Al, kana dodžanglja save narodose o Mordehaj preperol, sasa lese zala te mudarol samo e Mordehaje, pa lija te rodol sar te mudarol sa e Jevrejen ane sa o carstvo e Kserkseso. 7Ano dešudujto (12.) berš sar vladisada o caro o Kserks, ano angluno čhon o Nisan, anglo Haman čhudije kocka savi akhardola “pur” sar bi odredina ane savo đive thaj čhon ka mudaren e Jevrejen. I kocka peli ko dešutrito (13.) đive ano dešudujto čhon o Adar.
8Tegani o Haman vaćarda e carose e Kserksese: “Isi jekh narodo so si rasejime thaj raštrkime maškaro narodo ane sa e provincije taro ćiro carstvo, thaj lenđe adetura razlikujin pe tare sa e adetura avere narodurenđe, thaj von ni pokorin pe e carose zakonurenđe. Golese naj šukar e carose te ačhavol len ko miro. 9Ako si e carose pali volja, nek dol zapovest te mudarol pe gasavo narodo, a me ka anav trišel thaj saranda (340) tone#3,9 trišel thaj saranda (340) tone Ano original ačhol: “Deš milje (10 000) talantura.” srebro ane caresi riznica te dol pe kolenđe save gova ka ćeren.”
10Gija o caro uljarda pi pečatno angrustik thaj dija la e Hamanese, e Jevrejenđe dušmanese, 11thaj phenda lese: “Ačhav gova srebro tuće thaj ćer gole narodosa sa so manđe.”
12Pale gova ko dešutrito đive ano angluno čhon, akharde e carose pisaren. Von pisisade sa so o Haman zapovedisada e carose zapovednikurenđe, upraviteljenđe ane sa e provincije thaj e šorutnenđe tare sa e narodura, ane sa e provincije pale lengo lil thaj dži jekhe narodose ki lenđi čhib. Sesa pisime ano alav e caroso e Kserkseso thaj zapečatisade lese pečatosa. 13E glasnikura inđarde gola proglasura ane sa e provincije e carose, te istrebin, te mudaren thaj te uništin sa e Jevrejen, taro terno dži o purano, lenđe čhaven thaj e romnjen, ano jekh đive, ko dešutrito đive ko dešudujto čhon o Adar, thaj te lol sa lengo barvalipe. 14Prepis tare kava proglas trubuja te avol zakon ane sa e provincije thaj te avol vaćardo sa e narodurenđe, sar bi avena spremna baše gova đive.
15E glasnikura premal e caroso zapovest sigate đele thaj gova proglas objavisade i ani palata ano foro Suza. Pale gova o caro thaj o Haman bešle te pijen, a ano foro Suza sasa bari pometnja.
ទើបបានជ្រើសរើសហើយ៖
Jestira 3: GSP
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល