टिटस 1
1
1काङा पावल निवाँहाङ्मि योम्पक् मुखुबा हाङ् निवाँयुङ्पि सॆःक्मिम्पाचिम् लागि, हाङ् निवाँहाङ्मि लाम्फुबि लाम्ढुमिस्सि हाङ् चाइबानऎ निवाँ वाबुचिर कामानुङ् येसु खिरिस्टमि सॆःक्ढुङ्पाऎ ग साब्चिरा साप्हाङ्मॆ पाइकुङ। 2हाङ् आक्क निवाँयुङ् नुङ् निवाँ हानाम्स आसिखॆखुबा हिङ्खामा हुङ्मॆ खानावाँबि चु। म पिकानि कामानुङ् हानाम्स ढाँटु ऎबङ्चाखुबा निवाँहाङ्ऎ बाखाटेम् लिमाबाङ् याॽलऎबाङ् इसु। 3हाङ् खोसॆ म खानावाँ खोम् नुऎ लःबि काङॆ खेम्मिॽमिम्पा खानावाँबाङ् खाङ्मुसु। कानि हिङ्चामिक्खुबा फाक्खुबा निवाँहाङ्ऎ लोमिम्पा रक्न, ग नुऎ खानावाँ खेम्मिॽमॆ योम्पक् कॆ टक्चाडुङ।
4काङॆ आना साब्हाङ्मे पाइना, कानुङ् एक्कन निवाँयुङ्पि चुऎ काम् निवाँयुङ्बिऎ चाइबानऎ पासा टिटस, काङ्कामि आपा निवाँहाङ् हाङ् फाक्खुबा येसु खिरिस्टबाङ् आनॆ नाम्नावाँ हाङ् सान्टि टक्चाऎ।
केरेटबि टिटसमि योम्पक्
5आक्कुबि मायॆॽमिम्पा योम्पक् मुसि कॆ आना केरेटबि याइडाआना। मसॆ कॆ आना लोसिन्टक्न, आक्खा योम्पक् यॆरॆ हाङ् चोब्न हाटाबि टुङ्घङ्पाचि सॆगॆचॆ। 6टुङ्घङ्पा चाइ आब्डिक् मॆड्डिङ्मा, एक्क टेःॽन मेॽनुङ्मामि खिम्टाङ्पा लिमा लॆ। हाङ् उम् पासाचि निवाँयुङ् लॆखुबाचि हाङ् होइढा याॽमिचिऎ आब्डिक् लॆःॽमॆ रऎ लिमा फॆन्नि हाङ् लोमिम्पा आखेम्खुबाचि लिमा फॆन्नि। 7मान्ठाभनॆ बिसाप् निवाँहाङ्मि योम्पक् मुखुबा रेम, मसॆ खो आब्डिक् मॆड्डिङ्मा लिमा लॆ। खो ढ्या लॆङ्खुबा, सॆॽलन सोम् खेक्खुबा, सॆङ्खॆखुबा, खिटिखुबा हाङ् याङ्मि खिट्टुबाङ् लिमा फॆन्नि। 8खो होइढाचि नुःर लॆखुबा, नुऎ खानावाँ नेन्चाखुबा, टाङ्पॆॽन खाङ्हिखुबा, नुचाऎ, निवाँनेन् नुङ् सॆङ्सॆङॆ हाङ् काम्नुःर पाइखुबा लिमा लॆ। 9खोसॆ होइढाचि सङ्क काम्नुऎ खानावाँ चिन्मा हाङ् चाइबानऎ खानावाँ सिच्चोखुबाचि सङ्क ङेसिॽखॆॽमिॽमाम् लागि खो चिन्मिम्पा खानावाँबि काम्नुःर पेन्ढाङ्खुबा लिमा लॆ।
10आक्कुबि डिरिक् याॽमिचि कानिम् खानावाँ सिच्चोखुबाचि, हुन्नहा खानावाँ इखुबाचि, ढाटु बङ्चाखुबाचि चुक्मि। खाट्ना लिमिम्पा याॽमिचि गरहाचि लिक्मि। 11आक्खाचिम् या हेम्मा पिॽमा फॆन्नि, मान्ठाभनॆ खोचिऎ याङ् डुप्माम् लागि चिन्मान फॆन्निहा काइसॆ खानावाँ चिन्से चोब्न खिम्खिम्पि याटक्माटक् टिबिडुचिमि। 12खोचिम्न एक्क निवाँहाङ्मि खानावाँ लोखुबाऎ लोडुचि, “केरेटबिहा याॽमिचि ढाटु बङ्चाखुबाचि, काइसाहा पोसुचि हाङ् ऎट्टुबाङ्नुङ् खिक्टुबाङ्चि टे लॆःॽमि।” 13ग खानावाँ चाइबान। मसॆ आक्खाचि वोहिर वोसॆचॆ, खोचि निवाँयुङ्पि चॆकुचॆ लिहिमिर। 14हाङ् चाइबनऎ खानावाँ सिच्चाखुबाचिम् हाङ् हुन्नहा याहुडिम् खानावाँ आखेमुचिर। 15सॆङ्सॆङॆचिम् लागि चोब्न खानावाँ सॆङ्सॆङॆ लि। टर काइसाचि हाङ् निवाँयुङ् ऎलॆखुबाचिम् लागि माङ्स सॆङ्सॆङॆ लिनि। मान्ठाभनॆ उम्चि निवाँ काइसॆ लिमिम्पासॆ माङ् काम्नुऎ हाङ् काइसॆ लोमॆ स फाक्हिसुचिनि। हाङ् योम्पक्न काइसॆ लि। 16खोचिऎ निवाँहाङ् लेकुङ्का ग काग्मि टर उम्चि योम्पक्बाङ् खो मालेमिम्पा खानावाँमि चुमॆक्सङ् पिकुचि। खोचि सिच्चामा लुहा हाङ् खानावाँ आखेम्खुबाचि लिक्मि। हाङ् माङ्स काम्नुऎ योम्पक्पि टामिनि।
ទើបបានជ្រើសរើសហើយ៖
टिटस 1: LBR
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
© 2023, Wycliffe Bible Translators, Inc. and Nepal Bible Society