रोमि 3
3
1मरहाङ्ग माल् याहुडि याॽमि लिमार माङ्स नुऎ खानावाँ माऎ? माल् खाट्ना लॆःॽमॆ योम्पक्ऎ माङ्स योम्पक् यिगुनिहॆ? 2आक्र हॆॽनॆ, गग ढ्या खानावाँ यो मान्ठाभनॆ निवाँहाङ्ऎ खोमि खानावाँ चोब्बाङ् याॽल याहुडिचि पिट्टुचि। 3ऎॽवा याहुडिचिऎ खोचिऎ निवाँहाङ् नुङ् ठुप्मिम्पा चुप्लाङ् माटिङुचि। आक्खाचिमि बारेबि चाइ माङ् लोमॆ टा? याहुडिचिऎ लोमिम्पा माखेमुचि कामानुङ् निवाँहाङ्ऎ खोम् चुप्लाङ् मिखॆकुवॆटा? 4आक्र हॆॽनॆ, चोब्न याॽमिचि टाङ्पामि खानावाँबि बङ्चाक्मि हाङ्स, निवाँहाङ्मि खानावाँ चाइ हानाम्स चाइबानऎन लि। निवाँनेन् साब्चिराबि खोमि बारेबि गरहाङ् साब्डा,
“ओ पारभु आनॆ माङ् खानावाँ इकुना हाङ्स आक्क चाइबानऎ लि।
याॽमिचिऎ आन्ना न्याये लॆःॽमार, आन्नॆन हेचाइकाम्नि।”#खोम्मिम्पासाम् ५१:४
5टर कानिमि हिङ्वा योम्पक्बाङ् निवाँहाङ् चाइबानऎ लॆ लोमॆ याॽलऎ बाङ्स काम्नुःर याॽमिचि खाङ्मुकु हाङ्ग माल् लोमॆ? मसॆ याॽमिमि निवाँ आनुसारा ग निवाँहाङ्ऎ खोम् सिरि कानि सक्पि होमॆ खानावाँ काम्नुऎ हॆॽनॆ कामॆ? ऎॽवा याॽमिचि आक्रक्न मिनुक्मि। 6आक्क ग लिनलिनि, निवाँहाङ्ऎ काम्नुःर न्याय मान्लॆटु हाङ्ग, मान्टहाङ्र खोसॆ बाखाटेम्पिहा होइढा चोब्न याॽमिचि न्याय लॆकुचॆ? 7ऎॽवा याॽमिचि गर सङ्क काग्मि, “काङॆ बङ्चामिम्पा खानावाँऎ निवाँहाङ् चाइबानऎ लॆ लोमॆ याॽलऎ बाङ्स काम्नुःर खाङ्मुकु हाङ् खोम् निङ्लावा झाना ढ्या मुकु हाङ्ग, ह सङ्क काङा हिङ्वा याॽमि लोमानुङ् आब्डिक् टिमा नुऎ टा?” 8आसॆ गरक्मा खानावाँ इकु खोसॆ गर लोमिम्पान, “काम्नुऎ योम्पक लिर कामानुङ् काइसॆ योम्पक् यिक्ढाङ्सिये।” ऎॽवा याॽमिचिऎ काङ्कॆरे आक्रहाङ् चिनुकुङ्का कामानुङ् काग्मि हाङ् हुन्न आब्डिक टिकिङ्का, टर आक्क खानावाँ चाइबानऎ हॆॽनॆ। गरहा याॽमिचिऎ निवाँहाङ्बाङ् डान्डा टक्चाकुचि।
आसास निवाँनेन माआमि
9गसॆ लोमा यकुवॆ खानावाँ चाइ माङ्भनॆ कानि याहुडिचि हॆॽनिबारेक्चिबाङ् नुऎ याॽमि लॆटिनि। मान्ठाभनॆ काङॆ आसिॽन इसिटुङ्, याहुडिचि हाङ् हॆॽनि बारेक् चोब्न याॽमिचि आब्डिक् नुङ्मा लॆःॽमि। 10निवाँनेन साब्चिराबि गरहाङ् साब्डा,
“निवाँनेन आसास माआमि,
एक्क याॽमि स माआमि। 11निवाँहाङ्मि बारेबि आसस माआमि हाङ् आसॆस निवाँहाङ् यगुचिनि।
12चोप्पासॆ निवाँहाङ् याइडुचि
हाङ् खोचि चोब्न योम्पक् आपिक्खुबा याॽमि लिडामि।
नुऎ योम्पक् यिक्खुबा ग एक्कस माआमि।”#खोम्मिम्पासाम् १४:१-३; ५३:१-३
13“खोचिऎ यामुमिम्पा खानावाँ ग एट्टान काइर नामुऎ माडॆक्मिम्पा येःॽमा रक्न लॆ।
खोचि बङ्चाखुबाचि लॆःॽमि
हाङ् उम्चि खानावाँ याॽमिचिमि लुङ्माबि ठक्खुबा चिचिङ् रक्मान लॆ।”#खोम्मिम्पासाम् ५:९
14“खोचि यामुक्मिर हानाम्स काइसॆ हाङ् चाप्हिमामि खानावाँ टे लाबकुचि।”#खोम्मिम्पासाम् १०:७
15“खोचि हानाम्स याॽमि सेॽमाबग्माबि हॆङुॽमि।
16हाङ् खोचि हाबि चुःक्मि हाङ्स याॽमिचि डुखा पिॽमॆ नुङ् नासॆलॆॽमॆ योम्पक् टेः यिगुक्मि।
17हाङ् खोचि होइढा याॽमिचि नुङ् टङ्चामॆ ग खानावाँन लिनि।”#यासाइया ५९:७-८
18“खोचि निवाँहाङ्मि किसिमाबि स पेन्मिनि।”#खोम्मिम्पासाम् ३६:१
19यायेॽमाबि साप्मिम्पा खानावाँ यायेॽमा टिङ्खुबाचिमि लागि साप्मिम्पा कामानुङ् कानिऎ ले। मसॆ कानि गर काहिकि निवाँहाङ्ऎ बाखाटेम्बिहा चोब्न याॽमिचिमि न्यायॆ लॆःॽमार, याहुडि हाङ् हॆॽनिबारेक्चि आसॆस काङॆ ग हिङ्वा योम्पक् मान्लॆटिॽङा कामानुङ् कामॆ खानावाँन लिनि। 20मान्ठाभनॆ यायॆॽमा टिङ्मिम्पासॆ आसास निवाँहाङ्मि ङारिङ्पि निवाँनेन् याॽमि लिहिनि। बोरु कानि हिङ्वा याॽमि लॆकि लोमॆ खानावाँ कानिये यायेॽमाबाङे ले।
निवाँयुङ्बाङ् निवाँनेन् लिमॆ खानावाँ
21टर निवाँहाङ्ऎ ह यायॆॽमा माटिङ्रे सङ्क मान्टहाङ् याॽमिचि खोम् ङारिङ्पि निवाँनेन् मुहिकिहा लोमॆ खानावाँ खाङ्मिडि। ग खानावाँमि बारेबि यायॆॽमा नुङ् निवाँहाङ्मि खानावाँ लोखुबाचिऎ याॽलिन खानावाँ इसिडुचि। 22येसु खिरिस्टबि निवाँयुङ् लॆखुबा चोब्न याॽमिचि निवाँहाङ्ऎ खोम् ङारिङ्पि निवाँनेन् याॽमिचि लोडुचि मान्ठाभनॆ निवाँहाङ्ऎ चोब्न याॽमिचि एक्क मिगॆॽन खाङ्कुचि। 23मान्ठाभनॆ चोब्न याॽमिचि हिङ्वा नुङ्मा लॆःॽमि हाङ् निवाँहाङ्मि निङ्लावा टक्चामाबाङ् फेल्लिङ् खॆडामि। 24टर निवाँहाङ्ऎ कानि खोमि ऎखॆन्चाखुबा नाम्नावाँ पिस्से कानि निवाँनेन् याॽमि मुसि। खोसॆ कानि कानिमि हिङ्वामि डान्डाबाङ् फाक्मॆ योम्पक् खिरिस्ट येसुबाङ् लॆटु। 25कानिमि हिङ्वामि साट्टबि सिखॆॽमामि लागि निवाँहाङ्ऎ खिरिस्ट ग बाखाटेम्पि पाङ्हाङ्सु। हाङ् येसुऎ खोम् हिङ्खामा कानिमि लागि सङ्टिसे हारि अङ्मिटु। खोबि निवाँयुङ् लॆखुबा चोब्न याॽमिचि उम्चि हिङ्वाबाङ् फागुक्मि। ग योम्पक्बाङ् निवाँहाङ्ऎ खो निवाँनेन् लॆ लोमॆ खानावाँ खाङ्मुसु मान्ठाभनॆ याॽलिहा डिनाबि खोसॆ याॽमिचि हुङ्सेम हिङ्वामि डान्डा मान्पिट्टुचि। 26निवाँहाङ् खोन निवाँनेन लॆ हाङ् येसुबि निवाँयुङ् लॆखुबाचि खोसॆ निवाँनेन मुकुचि लोमॆ खाङ्मिॽमामि लागि खोसॆ हऎ लःबि ग योम्पक् यिगु।
27-28मसॆ कानिऎ कानिमि निवाँनेन् खानावाँबि हानाम्स नाबुक् ठॆँठॆँ लॆःॽमा हेसिनि। मान्ठाभनॆ यायेॽमा टिङ्मिम्पासॆ निवाँहाङ्ऎ कानि निवाँनेन् मुमिम्पा हॆॽनॆ, टर कानिऎ येसु खिरिस्टबि निवाँयुङ् लॆःॽमिम्पासॆ कानि निवाँहाङ्मि ङारिङ्पि निवाँनेन् लिकि काहिकि। 29आन्ना माल् मिनुकानिहा माल् निवाँहाङ् याहुडिचिम् टेः निवाँहाङ् हाङ् हॆॽनिबारेक्चिम् चाइ हॆॽनॆ? निवाँहाङ् चाइ हॆॽनिबारॆक्चिम् सङ्क यो लोमॆ खानावाँ कॆ आन्ना लोकानि। 30मान्ठाभनॆ निवाँहाङ् एक्क टेः चु। खोसॆ याहुडि हाङ् हॆॽनिबारेक्चि आक्क निवाँयुङ्बाङ् निवाँनेन् लोकुचि। 31हाङ् ह माल ग निवाँयुङ् टामिम्पासॆ ह यायॆॽमाऎ माङ्स योम्पक् यिगुनि मिनुकानिहा? आक्र हॆॽनॆ, मान्ठाभनॆ कानिऎ येसुबि निवाँयुङ् लॆकि हाङ्ग चोब्न यायेॽमाऎ लोमिम्पा खानावाँरे टिङुकि।
ទើបបានជ្រើសរើសហើយ៖
रोमि 3: LBR
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
© 2023, Wycliffe Bible Translators, Inc. and Nepal Bible Society
