रोमि 1
1
1ग साब्चिरा खिरिस्ट येसुमि योम्पक् मुखुबा काङा पावलऎ साप्मिम्पा यो। काङा चाइ निवाँहाङ्ऎ सॆगिङ् हाङ् सॆःक्ढुङ्पा मुसिङ् हाङ् खोमि नुऎ खानावाँ खेम्मिॽमॆ योम्पक्बि टिसिङ। 2खोसॆ ग नुऎ खानावाँ पिॽमॆ चुप्लाङ्मि बारेबि याॽलऎ बाङ्न निवाँहाङ्मि खानावाँ लोखुबाचिबाङ् निवाँनेन साब्चिराबि साब्मिमिम्पा लॆटुचि।
3-4ग नुऎ खानावाँ चाइ निवाँहाङ्मि पासा कानिमि पारभु येसु खिरिस्टमि बारेमि खानावाँ यो। खो याॽमि लिमानुङ् डाउड हाङ्मि सामॆक्बि जान्म लिसा। टर सॆङ्सॆङॆ लावाऎ येसु सिखॆम्पाबाङ् हिङ्पॽमिस्से चॆक्मावॆ निवाँहाङ्मि पासा लोमॆ खानावाँ खाङ्मिटु। 5निवाँहाङ्ऎ चोब्न ठालबिहा हॆॽनिबारेक्चिमि लागि माङ् योम्पक् यिक्पिटुचिहा लोमॆ खानावाँ खेम्मिॽमामि लागि कानिऎ खिरिस्टबाङ् सॆःक्ढुङ्पाचि लिमॆ नाम्नावाँ टक्चाडि। ग योम्पक् चाइ खोचिऎ खिरिस्ट निङ्लावा पिॽमामि लागि निवाँयुङ् लॆःसे खोसॆ लोमिम्पा खेमुचिर कामानुङ् लिमिम्पा रेम। 6हाङ् रोमबि चुखुबा आन्ना सङ्क येसु खिरिस्टऎ खोम् याॽमिचि लिमामि लागि सेःडानिहा यो।
7रोमबि चुखुबा चोब्न आन्ना निवाँयुङ् लॆखुबाचि काङॆ ग साब्चिरा साप्पिहाङ्मॆ पाइकानि। निवाँहाङ्ऎ आन्ना नाम्नाम् पिसिडानि हाङ् खोम् याॽमिचि लिसि सेःॽडानि। निवाँहाङ् कानिमि आपा हाङ् पारभु येसु खिरिस्टऎ आन्ना नाम्नावाँ नुङ् सान्टि पिट्टानिर।
पावल रोम खॆॽमा मिनुऎ
8चोब्नबाङ् याॽल आन्ना चोब्नमि लागि येसु खिरिस्टबाङ काङॆ कामि निवाँहाङ् ओहाक पिकुङ। मान्ठाभनॆ आन्नामि निवाँयुङ्मि बारेबिऎ खानावाँ चोब्न बाखाटेम्पि फुबक्मॆ पाइ। 9-10हाङ् खोम् पासामि बारेबि नुऎ खानावाँ खेम्मिॽमानुङ् काङॆ चोब्न निवाँऎ निवाँहाङ्मि योम्पक् मुकुङ। हाङ् आन्ना मिॽलासे आन्नामि लागि हानाम्स पारठाना लॆःॽङा लोमॆ खानावाँ निवाँहाङ्ऎ लेकु। निवाँहाङ्ऎ निवाँ टिकु हाङ्ग काङा डॆङ्पि हाङ्स आन्नाबि टाहिङार कामानुङ् सङ्क पारठाना लॆःॽङा। 11मान्ठाभनॆ आन्ना लावाबि चॆकुवॆ लिहिसानिर कामानुङ् निवाँहाङ्मि लावाऎ काङा पिॽमिम्पा आसिका आन्नानुङ् हामामि लागि चाइबान काङा आन्नाबि टामा मिनुॽङा। 12काङॆ लोमा यकुङॆ खानावाँ चाइ माङ्भनॆ, आक्कबि काङा टाइङ् हाङ्ग, कानि एक्कसॆ होइक निवाँयुङ्पि चॆकुवॆ मुबे चुहिकि।
13बुबुनानुसाचि, काङा आन्नाबि ऎॽवा टामा मिनिङ् लोमॆ खानावाँ लेसाम्नॆ कामानुङ् मिनुॽङा, टर हढारि काङा सॆक्सिखॆडिङ। होइढा हॆॽनिबारेक्चिम् लुम्पि मान्टहाङ् लावामि लागि नुऎ योम्पक् यिगिङ् मरहाङ्न आन्नामि लुम्पि सङ्क मुमा मिनुॽङा। 14मान्ठाभनॆ काङॆ चोब्नमि लुम्पि नुऎ खानावाँ खेम्मिॽमान लॆःॽमि। खोचि पाढालिमिम्पाचि हाङ् निवाँटाङ्पाचि आठावा निवाँ माआमिहाचि माङ्स आलेक्खुबाचि सङ्क लिहिक्मि। 15मसॆ काङा रोमबि सङ्क टामाहाङ् याॽमिचि नुऎ खानावाँ खेम्मिॽमा मिकुङ्चि।
16मान्ठाभनॆ ग खिरिस्टमि बारेबिऎ नुऎ खानावाँनुङ् काङा ङेसिङानि। गग निवाँयुङ् लॆखुबाचि हिङ्पक्मिक्खुबा निवाँहाङ्मि चॆक्मावामि योम्पक रेटा। ग नुऎ खानावाँ याॽलि याहुडिचिबि टाहा हाङ् हॆॽनिबारेक्चिबि टाआ। 17मान्ठाभनॆ ग नुऎ खानावाँऎ निवाँहाङ्ऎ कानि खोम् ङारिङ्पि मान्टहाङ् निवाँनेन् याॽमि मुसिहा लोमॆ खाङ्मिःडि। हाङ् ग निवाँनेन् खानावाँ निवाँयुङ्बाट लिबक हाङ् निवाँयुङ्पिॽन लुक्खॆ। गमि बारेबि निवाँनेन् साब्चिराबि गरहाङ् साब्डा, “निवाँनेन् याॽमि निवाँहाङ्बि निवाँयुङ् लॆःॽमानुङ् हिङ्चा।”#हाबाकुक २:४
याॽमिचिमि हिङ्वा हाङ् निवाँहाङ्मि सिरि
18काइसॆ योम्पक् यिक्खुबा हाङ् निवाँबि काइसॆ मिन्खुबा चोब्न याॽमिचि सक्पि पारुबाङ् निवाँहाङ्ऎ खोम् सिरि खाङ्मिकु। खोचि मान्टहाङ् लॆःॽमे पाइमि आक्क खानावाँऎ होइढा याॽमिचि निवाँहाङ्मि चाइबानऎ खानावाँ ऎवाप्टखुबा मुमे पाइकुचि। 19निवाँहाङ् मान्टक्मा लॆऎ लोमॆ चोब्न याॽमिचिबाङ् माङ्स मान्कुम्टि मान्ठाभनॆ निवाँहाङ् खोसॆॽन मुमिम्पा ठःकाबाङ् खो मान्टक्मा लॆऎ खाङ्मिॽमेपाइकुचि। मसॆ ग खानावाँ ग चोब्नमि लागि वाप्टऎन लॆ। 20चाइबान कानिऎ निवाँहाङ्मि हानाम्स लिढाङ्ऎ चॆक्मावा हाङ् खो मान्टहाङ् पाइऎ लोमॆ खाङ्टॽनि। टर खोसॆ बाखाटेम् मुबक्मिम्पा डिनाबाङ्न ग खानावाँ मान्टक्मा लॆऎ लोमॆ खानावाँ खोसॆ मुमिम्पा ठःकाबाङ्न चोब्न याॽमिचि खाङ्मिडुचि। मसॆ खोचिऎ निवाँहाङ् लेङानि लोमॆ आक्कुबि माङ्स खानावाँ माआ।
21खोचिऎ निवाँहाङ् चु कामानुङ् लेसुचि हाङ्स, खोचिऎ खो पिॽमा लॆऎ निङ्लावा मान्लॆटुचि। हाङ्न आक्खाचिऎ खो ओहाक् पिट्टुचि। आक्खाचि ग निवाँ माखेॽमिम्पा याॽमिचि लिसामि हाङ् उम्चि हप्पॆरॆक्मा निवाँ माॽयाक्टऎसॆ डॆक्खॆटु। 22हाङ् खोचिऎ टाङ्पॆ टाङ्पान निवाँटाङ्पा कासामि टर खोचिन निवाँ मॆड्डिङ्मा लिसामि। 23हाङ् खोचिऎ हानाम्स लुक्खॆॽनिऎ निवाँहाङ् चुङ्मॆ योम्पक् हॆॽनॆ, टर लुॽखॆखुबा याॽमिमि, पोसुचिमि, सवाँचिमि हाङ् बाखाबि सेनुक्मिहा पोसुचिमि मुर्टि चुङुॽमि।
24मसॆ निवाँहाङ्ऎ खोचि उम्चि निवाँऎ यगुकुवॆ ङेसिमा लुऎ काइसॆ योक्पक्बि चुमिटुचि। हाङ् खोचिऎ उम्चि लुम्पि टाङ्पामि सालुङ् काइसॆ योम्पक्पि टिमानुङ् ङेसिमा लुहा योम्पक् यिगामि। 25आक्खाचिऎ निवाँहाङ्मि बारेबिऎ चाइबानऎ खानावाँ ग हुन्नहा खानावाँनुङ् रे लॆनुचि। चोब्न खानावाँ मुखुबा निवाँहाङ् चुङ्मा याइसे निवाँहाङ्ऎ मुबक्मिम्पारे स्यामिपक्कुचि हाङ् आक्खा ठकान चुङ्पकुचि। निवाँहाङ्मि निङ् चाइ हानाम्स ठेॽमा खॆन्चाकु। आमेन।
26खोचिऎ आक्र लॆःॽमिम्पासॆ निवाँहाङ्ऎ खोचि उम्चि सालुङ्ऎ माङ्माङ् ङागुकुर आक्खान चिक्सिॽमा लुहा योक्पक् यिक्माम् लागि याइटुचि। हाङ् उम्चि मेॽनुङ्माचि सङ्क वाठाङ्पा नुङ् हॆॽनॆ टर मेॽनुङ्माचिनुङ्न इम्चाबक्कामि। 27हाङ् वाठाङ्पाचि सङ्क आक्रक्न लॆटामि। खोचि मेॽनुङ्माचि नुङ् हॆॽनॆ, टर वाठाङ्पा वाठाङ्पामि लुम्पि एट्टान इम्चामा मिनामि। हाङ् उम्चि लुम्पि ङेसिमा लुहा योम्पक् यिगामि। हाङ् खोचिऎ हिङ्वा योम्पक् यिक्मिम्पासॆ, निवाँहाङ्ऎ खोचि गरहा ङेसिमा लुहा योम्पक् यिक्मिम्पासॆ डान्डा पिॽमॆपाइकुचि।
28आक्खा याॽमिचिऎ निवाँहाङ् ङेःप्मा मामिन्मिम्पासॆ, खोसॆ आक्खा याॽमिचि यिक्मा फॆन्निऎ योम्पक् यिक्मिर कामानुङ् उम्चि काइसॆ निवाँबि याइडुचिमि। 29खोचि चाइ चोब्न खालाह काइसॆ, हिङ्वा, लोभा, होइढाचि काइर लॆःॽमॆ, सिरि लॆःॽमॆ, याॽमि सेॽमॆ, खिमॆटुमॆ, बङ्चामॆ हाङ् निवाँ टुक्मिॽमॆ खानावाँऎ चॆप्खॆॽमिम्पा लिक्मि। हाङ् खोचि खुनिङ्म खानावाँ इटिखुबा, 30ठक्चिनुङ् वाचिक् काखुबा, निवाँहाङ् सिच्चाखुबा, कायङ्पा मिन्खुबा, होइढाचिबाङ् नुचाङा मिन्खुबा, कायङ्पाये मिन्खुबा लिक्मि। हाङ् खोचि काइसॆ लाम् लाम्ढुखुबा, आपा आमामि खानावाँ आखेम्खुबा, 31खानावाँ ऎवाप्खुबा, टाङ्पॆ यामुमिम्पा योम्पक् आलॆखुबा, नाम्नाम् आपिसिखुबा लुङ्कॽवा रक्मा निवाँहाचि लिक्मि। 32आक्रहा योम्पक् यिक्खुबाचि निवाँहाङ्ऎ सिखॆॽमॆ डान्डा पिकुचि कामानुङ् निवाँहाङ्ऎ लोमिम्पा खोचिऎ लेकुचि हाङ्स, खोचि आक्रक्न लॆःॽढाङ्मि। आक्र टेःॽन हॆॽनॆ, आक्रक्मान योम्पक् यिक्मामि लागि होइढाचि सङ्क चोम्पकुचिमि।
ទើបបានជ្រើសរើសហើយ៖
रोमि 1: LBR
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
© 2023, Wycliffe Bible Translators, Inc. and Nepal Bible Society
