याकुब 5
5
चासुम्टाङ्पाचि वोमिम्पा
1चासुम्टाङ्पा याॽमिचि, आन्नॆ काम् खानावाँ खेमाम्नॆ। आन्ना सक्पि टामा परक्मिम्पा डुखा मिॽलाआम्नॆ हाङ् निवाँ टुक्मानुङ् हाबानॆ। 2आन्नाम् चासुम् किम्खॆडा हाङ् आम्नि चेबि सिङ्किपा टॆखॆडु। 3आन्नामि फिःइया नुङ् सिःऎ माङ्स योम्पक् यिगुनि। आक्क चासुम्ऎ आन्नामि सालुङ् मिःऎ चाइन्टक्न चाकु। डॆङ्पिऎ डिनाबि आन्नॆ खोम्भुङ्मिम्पा चासुम्ऎन न्यायॆमि डिना आन्ना आब्डिक टिकानि। 4खाङाम्नॆ, आन्नाम् रोपाबि योम्पक् मुखुबाचि पिॽमा लॆऎ नाम्याक् आन्नॆ मापिट्टिटाम्चिनि। मसॆ खोचि आन्ना आब्डिक् टिसे हाबुक्मि। हाङ् आक्खाचिम् हाप्मिम्पा साम्ला पारुबिऎ सङ्पिऎ पारभु निवाँहाङ्मि नाबाक्पि सिडा। 5बाखाटेम्पि आन्ना काम्नुःर कम्नुःर चासे डुङ्से माङ्माङ् लॆःॽमा मिङ्कानिर मन लॆःसे सिखॆॽमॆ डिनामि लागि आन्नॆ टाङ्पा टाङ्पान याम्नुऎ मुडाम्नि। 6हाङ् आन्ना माङ्स काइर आलॆखुबा याॽमिचि आन्नॆ आब्डिक् टिमसे सेराम्चिनि।
हुङ्चामॆ नुङ् पारठाना
7काम् बुबुनानुसाचि, पारभु मॆटारढारि यङ्उक्मानुङ् हुङ्से पेनानॆ। मान्ठाभनॆ खाङाम्नॆ, रोपा लिखुबा एक्क याॽमिऎ चाम् सिकु कामानुङ् हिच्चिन माङ्कॆॽमा नुङ् चुङ्युक्मामि लबि बारि हुङुकु। 8मसॆ आन्ना सङ्क हुङ्से पेनानॆ हाङ् निवाँबि चॆकुवॆ लिसानॆ मान्ठाभनॆ पारभु टामॆ लः मुबिॽन चु। 9बुबुनानुसाचि, एक्कसॆ होइकनुङ् याटक्माटक् लॆपे आचुआनॆ, हॆॽनॆ हाङ्ग निवाँहाङ्ऎ आन्नामि आब्डिक्मि न्यायॆ लॆकानि। खाङाम्नॆ, न्यायॆ लॆखुबा चाइ मुबिॽन टाखॆडा। 10हाङ् बुबुनानुसाचि, डुखामि लःबि सङ्क मान्टहाङ् हुङ्से पेन्मा लॆऎ लोमॆ पारभुमि निङ्पि यामुखुबाचिबाङ् चिनानॆ। 11हाङ् डुखाबि सङ्क हुङ्चाखुबा आक्खा याॽमिचि कानिऎ नुक्मिहा याॽमिचि कामानुङ् काकि। आयुबऎ मान्टॽल हुङुवॆ लोमॆ आन्नॆ लेकाम्निन। हाङ् डॆङ्पि पारभुऎ खो मान्टहाङ् पाइबाकुचॆ लोमॆ खानावाँ सङ्क लेकाम्नि। मान्ठाभनॆ कानिम् पारभु चाइ एट्टान नाम्नावाँ नुङ्मा लॆ।
12काम बुबुनानुसाचि, आन्नॆ चोब्नबाङ् याॽलऎ खानावाँ चाइ पारु, बाखाटेम् हाङ् होइढा ठकामि निङ् लामानुङ् किरे आडॆन्टानॆ। आम्नि खानावाँ चाइ चाइबान हाङ्ग चाइबान हाङ् हॆॽनॆ हाङ्ग हॆॽनॆन लिर। हॆॽनॆ हाङ्ग आन्ना आब्डिक नुङ्मा लिकानि।
13माल् आन्ना हङ्सिबि आसा चाइ डुखाबि सिडॆ? खोसॆ पारठाना लॆटुर। हाङ् आसा चाइ चेन्चाक्डॆ? खोसॆ पारभुमि निङ् ठेॽमॆ साम् इसुर। 14हाङ् आन्ना हङ्सिबि आसा चाइ टुक्डॆ? खोसॆ मान्डालिबिऎ चिन्खुबाचि सेःरुचिर हाङ् खोचिऎ खो केवाऎ आबिसेक लॆःॽमानुङ् पारभुमि निङ्पि पारठाना लॆपिटुचिर। 15हाङ् निवाँयुङ् लॆसॆ लॆःॽमिम्पा पारठानाऎ टुक्खुबा याॽमि नुबक्। हाङ् पारभुऎ खो नुबक्मिकु। हाङ् आक्कसॆ हिङ्वा योम्पक् यिक्डुहाङ्स, आक्क हिङ्वा यङ्निमा लि। 16मसॆ एक्कसॆ होइकनुङ् टाङ्पॆ यिक्मिम्पा हिङ्वा योम्पक् कॆ लॆडुङॆन कामानुङ् कासानॆ हाङ् आन्ना नुबक्माम् लागि एक्कसॆ होइकमि लागि पारठाना लॆपॆ चुआनॆ। निवाँनेन् याॽमिऎ लॆःॽमिम्पा पारठाना चॆक्मावा नुङ्मा लि हाङ् गसॆ ढ्या योम्पक् यिगुकु। 17एलिया सङ्क टा कानि रक्मान याॽमि लॆटा। खोसॆ वारि ऎटार कामानुङ् नुःर पारठाना लॆःॽमार सुम्चि निङ् हाङ् ठुक्चि माइनाढारि वारि माटा। 18हाङ् फेरि खोसॆ वारि टार कामानुङ् पारठाना लॆटा हाङ् वारि टाआ हाङ् बाखाटेम्पि चारुङ् सिसु।
19काम बुबुनानुसाचि, आन्नाहङ्सिॽयुबाङ् एक्क याॽमि चाइबानऎ लाम्फुबाङ् काइसॆ लाम्फुबि खाइटा हाङ्ग, हाङ् आक्क याॽमि आन्नॆ ऎन्टॆटाम्नि हाङ्ग, 20आन्नॆ ग खानावाँ लेॽमा लॆ, आसॆ एक्क याॽमि उम् हिङ्वाबाङ् ऎन्टॆकाम्नि हाङ् आक्क याॽमि सिखॆॽमॆ खानावाँबाङ् हिङ्पमिकाम्नि हाङ् निवाँहाङ्ऎ खोम् डिरिक् हिङ्वा सःक्पिकु।
ទើបបានជ្រើសរើសហើយ៖
याकुब 5: LBR
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
© 2023, Wycliffe Bible Translators, Inc. and Nepal Bible Society