हिबुरु 4
4
1हस कानिऎ खोमि नाचामॆ खानावाँ टक्चाहिकि कामानुङ् निवाँहाङ्मि चुप्लाङ्ऎ लोसु। मसॆ नुःर पेनानॆ, आक्क नाचामॆ ठालबि भॆन्मा आटक्खुबा याॽमिचि आन्ना माडढेबि आसास आलिमिर। 2मान्ठाभनॆ पप्पाटुबाचिऎ रॽन कानिऎ सङ्क ग नाचामॆ ठालमि बारेबि नुऎ खानावाँ खेमा। टर पाप्पाटुबाचिमि लागि आक्क नुऎ खानावाँऎ माङ्स काम्नुऎ योम्पक् मान्यिगु मान्ठाभनॆ खोचिऎ आक्क खानावाँ खेमुचिहाङ् निवाँयुङ् मान्लॆटुचि।#४:२ ऎॽवा याॽलिहा साब्चिराऎ “खोचि खानावाँ खेम्मिखुबाचि निवाँयुङ् मालॆटुचि” सङ्क लोकु। 3कानि निवाँयुङ लॆखुबाचि ह आक्क नाचामॆ ठालबि भॆनुकि। हाङ् निवाँहाङ्ऎ लोसु,
“मसॆ काङॆ सोम्खेॽवाबि
गरॽहाङ् चुप्लाङ् ठुक्मानुङ् लोसुङ्,
‘आक्खाचि हानाम्स काङामि नाचामॆ ठालबि भॆन्टॽमिनि’!”#खोम्मिम्पासाम् ९५:११
निवाँहाङ्ऎ गरहाङ् लोसु, टर ग नाचामॆ ठाल चाइ बाखाटेम् सिरिस्टि लॆःॽमारक्न मुसिॽमिम्पा लॆटा। 4मान्ठाभनॆ निवाँनेन साब्चिराबि एक्क ठालबि वाङ्चि डिनामि बारेबि गरहाङ् साब्डा, “निवाँहाङ् चोब्न योम्पक्बाङ् वाङ्चि डिनाबि नाचाआ।”#उट्पाटि २:२ 5हाङ् होइक खेप्पा सङ्क खोसॆ गर कासा, “खोचि काङामि नाचामॆ ठालबि हानाम्स भॆन्टॽमिनि।”#खोम्मिम्पासाम् ९५:११ 6याॽलि नुऎ खानावाँ खेम्खुबाचिऎ निवाँहाङ्ऎ लोमिम्पा मान्खेम्मिम्पासॆ नाचामॆ ठालबि मान्भॆन्टक्मि। टर हस होइढा याॽमिचि नाचामॆ ठालबि भॆन्टक्मि। 7-8निवाँहाङ्ऎ नाचामिकानि कामानुङ् ठुक्मिम्पा चुप्लाङ् याहोसुऎ पिट्टुचिग, निवाँहाङ्ऎ डॆङ्पि होइक डिनामि बारेबि खानावाँ इमान ऎपाप्खुबा लॆटा। टर डिरिक् निङ् डॆङ्पि निवाँहाङ्ऎ होइक नाचामॆ डिना टङु, म डिना चाइ खोसॆ “आयु” लोसु। खोसॆ ग खानावाँ डाउड हाङ्बाङ् निवाँनेन् साब्चिराबि गरहाङ् इसु, ग खानावाँ चाइ याॽलऎ बाङ्न लोकॆॽमिम्पा लॆटा,
“आइ आन्नॆ निवाँहाङ्मि साम्ला खेमाम्नि हाङ्ग
निवाँ छाक्कॆ आमुसानॆ।”#खोम्मिम्पासाम् ९५:७,८
9मसॆ इघा चोब्न खानावाँबाङ् कानिऎ माङ् वाबुक् भनॆ, निवाँहाङ्ऎ वाङ्चि डिनाबि नाचामिम्पा रक्न खोम् याॽमिचिमि लागि सङ्क नाचामॆ लः युङ्पिडा। 10हाम्पॆ याॽमि निवाँहाङ् नुङ् नाचाक् खो निवाँहाङ्मि ङारिङ्बि नुऎ याॽमि लिमाम् लागि योम्पक् यिक्मा याइकु। हाङ् निवाँहाङ्ऎ सिरिस्टि लॆसिटुहाङ् नाचामिम्पा रक्न खोसॆ आक्खा यिक्मा याइकु हाङ् नाचाक्।
11मसॆ हेःर आक्क नाचामॆ ठालबि भॆन्मा यगिऎ, टर इस्राएलि याॽमिचिर निवाँहाङ्ऎ लोमिम्पा आखेम्खुबा हाङ् निवाँयुङ् माइखुबाचि आलिसिये।
12निवाँहाङ्मि खानावाँ चाइ हिङ्चाऎ हाङ् एट्टान चॆकुवॆ लॆ। ग चाइ हिच्चि पोट्टान ढारा चुऎ फेःयाबाङ्स येम्कुवॆ लॆ। ग याॽमिमि निवाँ नुङ् लावा, सॆकॽवा नुङ् आक्कमि मासि हङ्सिॽयुबाङ्स हङ्सिॽयु भॆनुक् हाङ् टेरुकु। गसॆ कानिमि निवाँ हाङ्सि बाङ्स हङ्सिहा खानावाँ हाङ् कानिऎ इमा मिन्मिम्पा खानावाँ ठागुकु। 13निवाँहाङ्बाङ् आसॆस माङ्स खानावाँ चुम्हिसुचिनि। चोब्न खानावाँ वाप्टडा। हाङ् कानिऎ यिक्मिम्पा चोब्न योम्पक् मान्टऎ कामानुङ् खोसॆॽन खाङ्कु।
येसु चोब्बाङ् ढ्या याटाङ्पा
14मसॆ कानिऎ लॆकॆॽमिम्पा निवाँयुङ्पि नुःर पेनिये मान्ठाभनॆ पारुबि खॆॽमिम्पा निवाँहाङ्मि पासा येसुन कानिम् चोब्बाङ् ढ्या याटाङपा यो। 15हाङ् कानिम् चोब्बाङ् ढ्या याटाङपाऎ कानि हाम्पि फेल्लिङ्खॆकि म खानावाँ वाप्पिकि मान्ठाभनॆ खो सङ्क कानिऎ रक्न चोब्न ठाःक्माहा खानावाँबाङ् ठाःक्सिआ हाङ्स हिङ्वा योम्पक् मान्लॆटु। 16मसॆ नाम्नावाँ नुङ् हाङ्डाम् लॆखुबा निवाँहाङ् पेन्ठाम् ठालबि कानि मॆङ्किसिरे खारिऎ। आक्कुबि कानिऎ कानि पाबुकिहा बेला नाम्नावाँ नुङ् सोम्टुॽवा टक्चाकि।
ទើបបានជ្រើសរើសហើយ៖
हिबुरु 4: LBR
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
© 2023, Wycliffe Bible Translators, Inc. and Nepal Bible Society