हिबुरु 2
2
फाक्मिम्पा खानावाँबि नुःर निवाँ टिमॆ
1मसॆ कानिऎ निवाँहाङ्मि पासामि बारेबि खेम्मिम्पा खानावाँबि एट्टान निवाँ टिमा लॆ। हॆॽनॆ हाङ्ग कानिमि लाम्फुबाङ् गरमर खाइकि। 2निवाँखाटॆखुबाचिऎ कानिमि पाप्पाटुबाचि पिॽमिम्पा खानावाँ#२:२ ग चाइ निवाँहाङ्ऎ इस्राएलि याॽमिचि सिनाइ लोमॆ पङ्पङ्माबि पिॽमिम्पा यायेॽमा यो। चाइबानऎ खाङ्मुसा। हाङ् आसॆ चाइ म खानावाँ मान्टिङुचि आठावा म खानावाँऎ लोमिम्पा मान्खेमुचि, आक्खाचिऎ टक्चामा लॆऎ डान्डा टक्चाउचि। 3मसॆ गरक्मा हिङ्वाबाङ् फाक्मॆ ढ्या खानावाँबि निवाँ मान्टिसि हाङ्ग निवाँहाङ्मि डान्डाबाङ् कुम्हिसिनि। पारभु येसुऎन ग हिङ्वाबाङ् याॽमिचि हिङ्चाक्मि लोमॆ याॽलि खेम्मिटा। हाङ् खोम् खानावाँ खेम्खुबाचिऎ आक्क खानावाँ चाइबानऎ कामानुङ् खाङ्मिटिङ्का। 4हाङ् निवाँहाङ्ऎ सङ्क आक्खॆॽमा लुहा खानावाँ, चिन्ना खाङ्मिॽमॆ योम्पक् हाङ् चॆक्मावाहा योम्पक् खाङ्मिॽमानुङ् हाङ् खोसॆ मिॽमिम्पा याॽमिचि सॆङ्सॆङॆ लावामि बारडाना पिॽमानुङ् आक्क खानावाँमि चुमॆक्सङ् पिट्टु।
येसु फाग्लाम्पि टॆखुबा
5कानिऎ इःमॆ पाइमिम्पा डॆङ्पि टाऎ बाखाटेम् निवाँखाटॆखुबाचिऎ ढुप्पाट्ट लॆःकुचि कामानुङ् निवाँहाङ्ऎ मान्लोसु। 6टर निवाँनेन् साब्चिरामि एक्क ठाल गरहाङ् साब्डा,
“याॽमि माङ्हाङ्र आनॆ खो निवाँबि युङुकुनॆ?
हाङ् याॽमिचि पासा माङ्हाङ्र आनॆ खो खाङुकुनॆ?
7आनॆ एच्छक्मि लागि
याॽमिचि निवाँखाटॆखुबाचिबाङ् मिःछुपा मुसुना।
हाङ् ह याॽमिचि निङ्लावा नुङ् ङेःप्सिखॆःॽमा पिःॽडुचिना,
8हाङ् चोब्न खानावाँ खोचिम् हुक्पि पिडुचिना।”#खोम्मिम्पासाम् ८:४-६
ग खानावाँऎ चाइ निवाँहाङ्ऎ “चोब्न खानावाँ खोचिम् हुक्पि युङ्पिडुचि” कामानुङ् वाप्टक्मॆ गारि इःकु। मरहाङ्स हन याॽमिचिऎ चोब्न खानावाँ हुक्पि पिस्सिमिम्पा खाङिनि।
9टर कानिऎ येसु खाङ्मॆ पाइकि। एच्छक्मि लागि खो निवाँखाटॆखुबाचिबाङ् मिःछुपा मुःसा,#२:९ ग खानावाँऎ येसु बाखाटेम्पि टामिम्पा खानावाँ लोमा यकुवॆ यो। टर ह खो एक्क निङ्लावा नुङ् ङॆप्सिखॆडा मान्ठाभनॆ खो निवाँहाङ्मि नाम्नावाँऎ डुखा आङुहाङ् चोब्न याॽमिचिमि साट्टबि सिखॆपिट्टि।
10चोब्न खानावाँ निवाँहाङ्मि रेम हाङ् चोब्न खोसॆ खोम् चॆक्मावाबाङ् मुसु। मसॆ याॽमिचि फाक्खुबा येसु निवाँहाङ्ऎ डुखा पिॽमानुङ् चोब्न खानावाँबि चाइबानऎ मुमानुङ् खोसॆ खोम् डिरिक् पासाचि सक्पि टाङ्पामि निङ्लावा पिॽमॆ पाइकुचि। 11मसॆ याॽमिमिचि सॆङ्सॆङॆ मुखुबा येसु हाङ् खोसॆ याॽलिन सॆङ्सॆङॆ मुसिॽमिम्पा चोब्न याॽमिचिमि आपा एक्कन। मसॆॽन येसुऎ खोचि खोम् बुबुनानुसाचि कामा मान्ङेसि। 12मान्ठाभनॆ खोसॆ निवाँहाङ् गर लोसु,
“काङॆ काङाम् बुबुनानुसाचिम् लुम्पि आनाम् निङ् खेम्मिकुङ्चि,
काङॆ खोचि खोम्मिम्पा ठालबि आनाम् निङ् ठेरुकुङ।”#खोम्मिम्पासाम् २२:२२
13हाङ् खोसॆ होइखेपा सङ्क लोसु,
“काङॆ निवाँहाङ्पिॽन निवाँयुङ् लॆकुङ।”#यासाइया ८:१७
हाङ् हस खोसॆ गरहाङ् लोसु,
“खाङानॆ, काङा निवाँहाङ्ऎ पिॽमिम्पा याॽमिचिनुङ चुःॽङा।”#यासाइया ८:१८
14मान्ठाभनॆ निवाँहाङ्मि पासाचि सङ्क सा नुङ् हारिमि सालुङ्बाङ् मुमिम्पा याॽमिचि लिमिम्पासॆ येसु सङ्क खोचि रक्मान याॽमि लिसा। खो टाङ्पान सिखॆॽमानुङ् खोसॆ ग योम्पक् याॽमिचि लावाबि सिखॆॽमॆ चॆक्मावा नासॆलॆःॽमाम् लागि यिगु। 15गरहाङ्, खोसॆ चोब्न डिना सिखॆॽमॆ खानावाँमि किसिमाबि पेन्ढाङ्मिम्पा आक्खा चोब्न याॽमिचि फागुचि। 16मान्ठाभनॆ कानि चोप्पसॆ लेऎ खानावाँ माङ्भनॆ येसु निवाँखाटॆखुबाचि पाइबाक्सि माटा, टर कानिमि टुबालाबा आबाराहाममि पासाचि पाइबाक्सि टाआ। 17मसॆ चोब्न खानावाँबि खो खोमि बुबुनानुसाचि रक्मान लिमा सिट्टा। हाङ् गरहाङ्न निवाँहाङ्मि योम्पक्बि निवॆँ चोडुवॆ हाङ् नाम्नावाँ नुङ्मा चोब्बाङ् ढ्या याटाङ्पा लिसा। हाङ् याॽमिचिमि हिङ्वा याङ्निॽमामि लागि खोसॆ खो टाङ्पान सङ्टिबिइट्टु। 18हाङ् ठाःक्माहा खानावाँबि सिॽमिम्पाचि ह खोसॆ पाइबाक्हिकुचि मान्ठाभनॆ खो टाङ्पान सङ्क ठाःक्सिआ हाङ् डुखा आङु।
ទើបបានជ្រើសរើសហើយ៖
हिबुरु 2: LBR
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
© 2023, Wycliffe Bible Translators, Inc. and Nepal Bible Society